Ekengho lovalumenhu mOshana

0
257

OSHAKATI – Ongudu ashike  yovalumenhu ve li koshi 700 ya kenghwa okudja odula ya dja ko, onghee oshikondo shOnghalonawa  nOundjolowele moshitukulwa Oshana,  osha tameka vali oshikonga shekengho lovalumenhu pahalo lavo. Ouyelele wa yandjwa komukwatakanifi woshikonga eshi moshitukulwa shaShana, Aina Iitula ou a ti, oshikonga sha tameka Juli 13-25, 2015 osha tofa mo owina eenhele  opo tapa yakulilwa ovalumenhu

Iitula okwa lombwela oshifo Kundana ta ti,  oshikonga osha shoneka ovalumenhu vopokati keedula 15-49 va kufe ombinga meyakulo tali ningilwa peenhele da yooloka moshitukulwa shaShana; okapangelo Eluwa mOngwediva, Epandulo community Hall mOneshila, pomatungo pa li hapa havalelwa opendjela mOndangwa, poTonateni Start Centre  mOshakati nopongerki yaLulongo. Elalakano okuyakula ovalumenhu vahapu, ta ti nande elalakano lakula okukandeka etandavelo loHIV/AIDS okwa twa omukumo naava ve na ombuto ve uye kekengho.

Ovalumenhu otava shivwa ve liyambe okukenghwa molweameno linene komulumenhu a kenghwa shaashi okwa amenwa kokukwatwa koHIV/AIDS shi fike 60%. Ekonaakono la ningwa moilongo imwe po muAfrica moKenya, moUganda nomoSouth Africa ola yandja oshidjemo nghee ovo va kenghwa va amenwa shi fike peepelesenda odo.  MoNamibia ekengho ola tameka 2009 fiyo Juni 2015 omo omwaalu wavanini va kenghwa. Nande mefudo laApiilili 15 fiyo Mai 17, 2015 kwa li oshikonga showina sha nuna ovanafikola meefikola 20 moshitukulwa Oshana, mefimbo olo okwa kenghwa ovalumenhu 1406.

Iitula ota ti, omwaalu ou ou li pedu paku u yelekanifa  nomwaalu wa halika kepangelo okuka fika 2017 ovalumenhu omayovi 29 a kale kenghwa moshitukulwa ashishe. Ovo tava kenghwa ohava shuna komaumbo fiku olo. Okwa yelifa kutya pefimbo lekengho ohaku ningwa neikonaakonifo kombinga yoHIV/AIDS kwaau a hala. Konima yeevili 48 keshe ou a kenghwa oku na kwaalukila koshipangelo a talike nghee ta xwepopala, noku na vali kwaaluka konima yomafiku aheyali. Omulumenhu a kenghwa oku na okukala oivike ihamano ina ya mekwatafano nakaume kaye wopamilele.

Nande oshikonga sha hala kuyakula ovalumenhu 100 mefiku keshe, okwa didilikwa ovalumenhu tava ende kaniingholi okuuya keyakulo loludi eli. Onghee Iitula ota shivi ovalumenhu va kufe ombinga shelixwapo meyakulo eli. Kwaavo va koya peedula 49 itava anyenwa eyakulo eli ashike ngee taku ningwa omavalulo itava kwatelwa mo. Ovanafikola otava kumaidwa va teelele oikonga ye va ukilila  pefudo laAguste nefiku opo tali ka shiivifwa.

LEAVE A REPLY

Please enter your comment!
Please enter your name here