Elikufilo ledu

0
225

WINDHOEK- Nande omukonaakoni omukulunhu wetanga lopolifi a kunghilila ovo va hala ku likufila edu vehe shi hetekele, apa naapenya onghee pena vamwe tave li tu omaminimini okwiikufila edu. Ekunghililo lomukonaakoni ndjai wopolifi Sebastian Ndeitunga, ola tukululwa  keenghatu dongudu yovanyasha va fikama ongula yoSoondaxa yadjako tava kokola nokukunghula ve li tendele ko eenhele davo momudingililo waGoreangab naHavana moWindhoek.

Leitenanda-ndjai wopolifi  yaNamibia, Ndeitunga  okwa kumaida aveshe va hala ku likufila oveta momake kutya, kape na ou e na oufemba wokwiikufila edu moNamibia.  Nande pena ovo va pumbwa edu nove udite va loloka okuteelela, ove na ku landula eeveta nomilandu adishe da tulwa po kepangelo. Konima  eshi ongudu yovanyasha ve dule 600 vati va unganekwa koAffirmative Repositioning AR, ya  shingwa ponhele opo ya li tai hetekele kwiikufila edu Ndjai Ndeitunga okwa ti, opolifi oye lilongikida okukwatela po ovetaa nelandulafano keembinga adishe doshilongo.

Nande oshiningwanima eshi sha tameka moshitukulwa shaKhomas, opolifi yoshitukulwa shaShikoto inai pitika okangudu kavamwe ve li koshi 100 modoolopa yaTsumeb ve shi hetekele Omaandaxa oshivike  eshi omo ondjai yomatanga opolifi Ndeitunga  ya ifana eekommissiona adishe dopolifi moitukulwa 14 yoshilongo okukumika opolifi i kelele omafaneko oilyo yoAffirmative Repositioning ei yuudite kutya, otai li longikidile Juli 31, 2015 kutya otai likufile edu keenghono ngeenge epangelo inali nyamukula komhumbwe yedu.

Leitenanda Ndjai Ndeitunga okwa kumaida ongudu ei iha piyaaneke ombili nengungumano loshilongo, idilaadile nawa opo iha shonge opolifi, shaashi opolifi oye lilongkidida okwaamenena po  ombili yoshilongo momukalo keshe .

Pokati opo omukulunhu wopolifi yoshilando shaWindhoek ou a kwatela komesho ovapolifi va shinga po ovalikufili vedu momudingililo waGoreagab moWindhoek, okwa kunghilila ongudu  ei kutya, opolifi oya didilika vamwe tava heke vakwao nokutandavelifa omutoto opo vahapu va kufe ombinga mwaashi.  Te va kumaida va landule omukalo u li mondjila  okupitila kovaleli  vopamifyuululwakalo momikunda  ilo veedoolopa ngeenge opena ou ahala edu.

 

LEAVE A REPLY

Please enter your comment!
Please enter your name here