Julinho Sporting  ota ka dhana mekopi lyaHage Geingob

0
284

WINDHOEK – Ospana yokoRundu ndjoka hayi dhana moliha yopombanda yaMTC , Julinho Sporting oyo ya mono omawi ogendji methigathano lyooSMS opo yi kuthe ombinga muudhano wekopi lya Hage Geingob ehuliloshiwike lyomasiku 23-25 gomwedhi nguka moVenduka.

Julinho Sporting okwa halutha oyendji sho oye ospana ya mono omawi ogendji okuza moshigwana opo a ka kuthombinga methigathano lyekopi ndika nuumvo. Uudhano mbuka tawu dhanwa koospana dhili ne, mbali dhomegumbo nambali dhiithanwa okuza piishiindalongo otau dhanenwa mokapale okanene kEmanguluko moVenduka oshiwike tashiya.

Iizemo yomahogololo gospana oya tseyithilwe poshigongi shiikundaneki Etiyali oshiwike shika moVenduka, moka Julinho Sporting oye a zimo nomawi ogendji. Ospana ndjika oye shi pondola okusindana nokudhenga oospana dhilwe oonene noosimani ngaashi Black Africa, Orlando Pirates, Tigers no Tura Magic, nongeyi oya ningi ospana ontine mokati koospana dhili ne ndhoka tadhi ka thigathanapo opo yimwe yi sindane ekopi ndika.

Julinho Sporting okwa mono omawi 30 664 okuza momawi agehe kumwe omayovi 57 636 ngoka ga li ga tumwa pokati komasiku 11 Juni sigo omasiku 13 Juli nuumvo. Ospana ndjoka yeya pehala etiyali methigathano ndika oyo Tura Magic ya mono omawi 14 231 omanga ndjoka yoTigers oye ya pehala etitatu  nomawi 7 420.

Young Chiefs okwe ya pehala etine nomawi 2 983; Black Africa puutitano nomake 1 003 Orlando Pirates puutihamano nomawi 902. Mehogololo lyomumvo gwayi omawi omayovi 17 955 ogo ga li ga ga monika.

Omuwiliki gwomangeshefo gwo Julinho Sporting, Daniel Tjongarero okwa gandja epandulo kaayambidhidhi yospana sho yo ya li ya kuthombinga neitulemo okuhogolola okupitila momakwatathano gopankalathano giikundaneki ngaashi ngoka goFacebook noTwitter.

“Tse ospana ongundjuka noya sa ondjala,  tuudha ondjuulukwe oku ka kuthombinga lwotango methigathano ndika, onkene ekwatathano lyetu naayambidhidhi yetu momakwatathano gopankalathano ngaka oga etele ospana uuwanawa.Ndjika ompito ombwaanawa nehala lili nawa opo aadhani yetu ya mone uunongo nowino wokudhana omanga tayi ilongekidhile etameko lyomumvo guudhano tagu landula,’ osho Tjongarero a ti.

Shika oshikando oshitiyali ethigathano ndika hali ithanwa Ekopi lyOmundohotola Hage Geingob tali longekidhwa noku etwa koshigwana kaakwashilipaleki yalyo ngaashi, Windhoek Draught, MTC, Air Namibia , Namibia Airports Company (NAC), nayalwe oyendji. Uudhano otau tameke potundi onti-17h30 komatango mEtine lyoshiwike tuuka. Oospana yoAfrican Stars na Julinho Sporting odho tadhi yimo tango omanga enyakwa lyuudhano mbuka Mamelodi Sundowns otaka tsakanena nospana yokoAngola,Primeiro de Agosto.

Uudhano otau hulu Olyomakaya  potundi 17h00 omanga oospana ndhoka dha dhengwa medhingoloko lyotango otadhi ka kondjela ehala etitatu netine potundi 15h00 esiku ndyoka.Otapu ka kala wo uudhano pokati kospana yaadhani aakulu yoBrave Warriors taya dhana nospana yIilyo yoParliamende oshowo yoodiplomate ndhoka dha kalelapo iilongo yadho moNamibia.

Uutekete wokuya mokapale oku ka tala uudhano owo oodola 20 naambuka otawu landithwa nale poComputicket. Oospana dhomegumbo African Stars na Julinho Sporting otadhi ka pewa ooN$ 350 000 kehe yimwe omolwokuholoka puudhano mbuka.

 

LEAVE A REPLY

Please enter your comment!
Please enter your name here