Peter Ondume yomomufitu

0
275
Peter Jungle Fighter

Olugodhi lwopOshushu olwa li ashike oshitopolwa shiilonga yetu yesiku kehe yokukondjitha aakwiita yomutondi opamwe naamboka haya longele kumwe nayo moshitopolwa moka tse twa li hatu longele. Molugodhi nduka otwali twa kondjitha aakwiita yokugamena Elenga lyopamuthigululwakalo mElelo lyUukwanyama pomukunda Oshushu  muuzilo wOkongo. Otwa li twa tokola okuponokela aagameni yomuwiliki nguka a li oshilongithwa shepangelo lyuukoloni konima sho twa kundana kutya mbaka oya li taya ka ninga etyapulo lyesiku lyoKrismesa mokamba yawo ndjoka ya li pegumbo lyElenga Ekuluntu Silas Cornelius Weyulu. Mbaka oya li ya longekidha okudhana esakalo momasiku 24 Desemba 1980. Uusiku mboka etanga lyetu olya homona okamba yaakwiita mbaka  mboka haya gamene egumbo lyomuwiliki ngoka a li oshilongithwa shepangelo lyuukoloni lya South Africa.

Esiku ndyoka otwa zi kEhafo twa pitile mOshikuni, Okalukulwena nOlukula lakula sigo otatu thiki pOshushu konyala lwopotundi 18h30 komatango. Okamba ndjoka oya li yi na aakwiita yokugamena aawiliki yopamuthigululwakalo yahomata yeli lwopomilongo 30, yondjika oya li pooha dhegumbo  lyelenga ndyoka. Aakwiita mbaka oya li yena oshinakugwanithwa shokugamena elenga ndyoka  lya li lina oshinakugwanithwa shokukalekapo ewiliko lyomavigumbo pehala lyepangelo lyuukoloni. Ongundu yetu oya li naakwiita yaadha pomilongo heyali, ya homatekwa ondjembo yimwe yomortiira dhuunene womillimeta 82, oondjembo mbali dhoomortiira dhuunene woomillimeta 60, oombazooka dhili heyali, oondjembo dhomashina dholudhi lwo PK dhili ne oshowo oondjembo nomatati galwe ngoka ga pumbiwa okweehameka omutondi noku mu etela ehanagulo  nekanitho enene.Molwashoka omatanga getu ka ga li haga endemo mOshushu, kommanda gwetu Hailwa Ruben Neshiko Matondo ga Niilonga okwa tumu ongundu yoondaadhi komeho getanga lyetu. Yo ongundu yoondaadhi oya li ya thikama moohailwa Markus Namuxwika Mu’ngongolo wa Nekulu Eembwadakondjelandiba, Sackaria  Andreas Haidenga[kommanda gwosectiona] Kaunda, Ngoma ya Kashaka oshowo ngame ongo kommanda gwosectiona . Mekwathelo lyomukwashigwana ngoka a li eshi nawa oshitopolwa nenge omukunda ngoka otwa ende sigo twa thiki pOshushu komatango etango inaali yamo natango.Molwashoka okwa li kwa yela natango otwa tegelele etango li ningine omanga twa holama miihwa opo tu tameke iilonga yetu okundaadha okamba ndjoka nawa kohi yomilema.Potundi ontimugoyi yuusiku otwa hedha popepi nokamba. Ka  twa li tu shi kutya mokamba omuna oondjembo dhi thike peni. Oshoka tse ka twa li tuna ko nasha kutya oondjembo ndhoka yena odha tya ngiini oshoka otwali twi itaala kutya oondjembo dhetu itadhi dhengwa kaakwiita yegameno lyomalenga.Konima yokundaadha kwetu nawa okamba ndjoka yatatu yomutse otwa shuna kongundu onene yaakwiita yetu  omanga yatatu yakalapo okutala omainyengo gaakwiita. Pethimbo lyokundaadha kwetu otwa mono kutya okamba oya li ya kondekwa nomavi nelalakanop oku yi gamena kiiponokela oshowo okugamena egumbo lyelenga ndyoka.Shiikwatelela kuuyelele mbuka kommanda gwongundu yetu okwa ti otuna okutegelela sigo omokati kuusiku opo tu ponokele okamba ndjoka, oshowo pethimbo ndyoka aakwiita yomutondi taya kakala taya tyapula Okrismesa.

Lwopotundi omulongo nayimwe yuusiku tse otwa yi pomahala getu gokuumbila momukunda. Pethimbo twali tatu ilongekidha nkene tatu umbu okamba ndjika omaloli gaali gaakwiita yomutondi ogeya mokamba ndjoka okuza kokamba yopakwiita kOmauni, ngiika dheetele aagameni yelenga iikunwa oshowo yilwe mbyoka mbaka ya li ya pumbwa okutyapula nayo Okrismesa.Ekudhilo olya li tali uvika okuza mokamba ndjoka sho aakwiita mboka ya li pokutameka omatyapulo. Potundi ontimilongo 24h00 tse  otwa tameke tatu kookaya sigo osho twa thiki konyala oometa omilongo ntano okuza pokamba manga inaatu tameka okuhomona okamba ndjoka. Ombinga yetu yokuhomonena oya li ya andjagana okuza kuumbangalantu-uzilo sigo okuuninginino noshowo kuumbugantu ninginino.Okuumba kwetu ka kwali taku vulu okuyamukulwa onkene konima yokuumba hoka otwa ende tuuka komituni dhokamba. Aakwiita mbaka ya li inaa ya dheulikika oya li ya yamukula oshiponokela shetu ihe tse otwa mweneke okuyamukula kwawo mbala. Ihe konima sho yetu uvu tatu kudhile unene omanga tuuka mokamba oya tameke ishewe taye tu umbu noku tu thiminika opo tu holame opo konima otwe yuumbu ishewe.Konima sho twa mweneke iita yawo tse otwa uka komeho sigo oosho twa thiki komituni dhokamba . Inatu vula we okuuka komeho molwashoka okamba oya li ya hwama omulilo na otwa li twa thiminikwa okushuna monima kashona omolwomulilo oshowo  etopo lyiikuti mboka yali tayi topothwa komulilo.Opwa li omukwiita gumwe gwomutondi ngoka a li tuumbu ondjembo yomashina ihe omupya omunene nguka okwa li ashike tuumbu uukitha mombanda oshowo uukitha ashike ombinga yimwe . Nguka otwe mu mweneke mbala sho twe mu umbile omboma yopeke nenge ohandgrenade. Pethimbo lyolugodhi otwa ndhindhilike kutya aakwiita yomutondi oya li taya fadhukapo okuza mokamba taya pitile kombinga yokuuzilo.Ongundu yoondaadhi oya tumwa yi game kuuzilo opo yi kwate aakwiita mboka yena omwenyo nenge ngele inashi vulika ya dhipage mboka inaaya kwatwa.Konima yokathimbo sho twa gama kuuzilo wokamba otwa mono aakwiita yaali yuuka kutse omanga inaatu ya lombwela yiigandje , nenge ngele hasho otaya si. Gumwe okwiigandja manga omukwawo okwa fadhukapo. Otuumbu ooholo dhuuka lwaahoka uuka no inatu tseya ngele okwa hupa nenge pamwe oye gumwe gwaakwiita yomutondi 11 mboka ya li ya sile moshiponokela shoka.Omukwiita ngoka twali twa kwata okwa li a indile aakwiita yetu mboka ya li ta ye mu tonatele opo eki iwatele miihwa, naashi a yi poshihwa shimwe okwa matuka  noku fadhukapo.Okwa yi inaa tu mu mona we.Olugodhi nduka olwa li lwa faalele aakwiita yomutondi yeli 11 oshowo elenga ndyoka ya li taya gamene nalyo olya kanene moshiponokela shoka.Nduka olwa ulike kutya oondjembo dhetu odhina oonkondo oshoka ehanagulo ndyoka dha ningile okamba ndjoka olyali enene.Polugodhi nduka otwa li twa kanithilepo omukwiita gumwe omanga yaali oya li yeehamekwa pethimbo twali tatu londo komituni dhokamba okuya meni lyayo.

LEAVE A REPLY

Please enter your comment!
Please enter your name here