Ya hogolola ongundumutima yoSwapo

0
287

ONAYENA – Iilyo mewilikongundu lyoSWAPO mOnayena oyali ya gongala oshiwike sha ziko yo ya hogolole iilyo yewiliko epe moshikandjohogololo ndyono tali kala tali nana nokukwatelakomeho mOnayena.

Konyala oshikandjo kehe moshikandjohogololo oshali sha tuma aatumwa kalelipo yo ya hogolole mboka ta ya yi mokangundumutima. Omahogololo ngoka ogali taga wilikwa ku Ngoloneya gwaShikoto Henock Kankoshi ngoka a ti okwali a tumwa owina kewiliko lyOmbelewa yOshikoto eye eyi kalelepo ye a kwatelekomeho omahogololo noku kwashilipaleka kutya oga ningwa pamautho no ga enda pamulandu.

Aakalelipo mbono ya za koosenda dhili 13 oyali yayi momahogololo no yali ya hogolulula, Mathew Kamati  a kale natango omukwatakanithi nokumukwatelikomeho gongundu yoSwapo moshikandjohogololo. Kamati okwali a hogolululwa nokushunwa miilonga yongundu yoSwapo ye a tsikile newiliko lye ngaashi a kala te shi ningi oomvula dha piti.

Esiku ndyoka okwali woo kwa hogololwa yalwe ngaashi Hosea Kambonde uulikwa a ninge omudhiginini gwiiniwe (treasure) mongundu yoSwapo omanga Selma Shikongo Hinawino a hogololwa a ninge amushanga guuyelele oshowo omahwahwameko (mobilize) moshikandjohogololo ashihe.

Ngoloneya Kankoshi okwa ti aahogololwa naya kaleke ayihe melandulathano yo taya wilike nombepo ombwaanawa, yo naya longe nomukumo . Okwa gwedhapo kutya ongunduwiliki ndjika ya hogololwa otayi kala mewiliko uule woomvula mbali  po tapu ka hogololwa natango ewiliko  limwe ngele oshikako shawo sha puko.Okwa tseyitha wo kutya omahogololo ngoka oga ende nawa nopauyuuki.

Kamati okwa pandula aaNayena sho yemu hogolulula. “ Otandi pandula aantu yomoshikandjohogololo shetu sho ya dhimbulula kutya natango ote vulu okutsikila newiliko lyokukwatakanitha oSwapo moshikandjohogololo,otandi uvaneke tandi ka longa nomukumo nonuudhiginini mokuyambulapo oSwapo noku eta omahumokomeho moshikandjohogololo ashihe,” Kamati ta ti.

Okwa indile woo ayehe ya longe muuwanawa woshigwana yo ya longe muukumwe opo ya vule ya adhe esindano. Kansela goshikandjohogolo okwa pandula ayehe ta ti otaka longa pamwe nongundumutima ndjoka ya hogololwa  noku eta omalunduluko neyokomeho li iwetikile mOnayena.

Re--Elect-1

LEAVE A REPLY

Please enter your comment!
Please enter your name here