BoN a londodha aalandithi yiimaliwa shaali paveta pOshikango

0
293

Windhoek-Aalandithi yiimaliwa yaali paveta oyendji aakwashigwana yAngola oya tameke iilonga yawo yaa shi yopaveta pOshikango. Oshinima shika mbaka oye shi tameke sho ya mono ompito yuunangeshefa mbuka konima sho Angola na Namibia ya tulapo euvathano opo iimaliwa yiilongo mbika iyali yi kale nokutaambathanwa pambelewa piilando mbika yopoongamba dhiilongo mbika. Euvathano ndyoka lyeeta opo iilongo mbika iyali yi taambathane iimaliwa yayo pomuthika gu thike pamwe olya tulilwepo konyala konima yiiwike yimwe ya pitipo.Aalandithi yiimaliwa shaali paveta nopambelewa mbaka inaya pandika kOmbaanga yopashigwana ya Namibia nenge Bank of Namibia.

Mboka taya landitha iimaliwa kokutya taya pewa oodola dha Namibia yo taya gandja ooKwanza nenge taya pewa ooKwanza yo taya gandja oodola kaye shi ashike oohandimwe ndele nee naanangeshefa yamwe piilando mbika Oshikango naSanta Clara oya mono wo ompito okushendjela aalandi yawo oshowo yalwe iimaliwa momuhingo nguka inaagu pitikwa pautho lyoveta yetaambathano lyiimaliwa.

Oshinima shika shokutaambathana nenge okushendjela iimaliwa yiilongo mbika iyali shi ikwatelela kun a ku shendja osha papudhula Ombaanga ya Namibia opo yi londodhe oohandimwe mbaka oshowo aanangeshefa kutya kapena gumwe gwawo a pitikwa okulanditha ooKwanza a pewe Oodola kakele komahangano gopaimaliwa ngoka gena uuthemba okushininga.”

“Ombaanga otayi tsikile okukonakona epogolo ndika lyokushendja iimaliwa yiilongo mbika iyali ta shiningwa kwaamboka inaa ya pitikwa okushilonga.Noonkatu dhapumbiwa nenge dhomondjila otadhi ka kuthwa okugeela aapogoli,” omupopiliko gwOmbaanga noshowo omuwiliki miipambele yeyokomeho moshikondo shiimaliwa, Ndangi Katoma osho a londodha.

Onkatu yotango ndjoka Ombaanga ya Namibia ya katuka oshiwike shika oondjoka yokuutha omwaalu gwopombanda gwooKwanza omuntu gumwe a pitikwa okushendjela miimaliwa ya Namibia poongamba dha Shikango.

Okuza oshiwike shika omukwashigwana gwAngola omukuluntu okwa pitikwa okushendja ooKwanza 500 000 mesiku okupewa ooN$ omanga omunona omuAngola ota shendjele ooKwanza 150 000 miimaliwa ya Namibia. Mboka yaashi aakwashigwana yAngola oya pitikwa ya shendje ooKwanza 250 000 komukuluntu nokomunona ooKwanza 50 000.

Katoma okwa ti euvathano lyokushendja iimaliwa pokati kiilongo mbika iyali olya pitika ashike shika shiningwe kOombaanga dhopaipindi oshowo komahangano omashendji giimaliwa yiilongo niilongo muuyuni.

Katoma okwa ti euvathano ndika olya shaininwe mesiku eti 18 lya Juni nelalakano opo iimaliwa yiilongo mbika iyali yi vule okulongithwa ongo oshimaliwa shokulanda moNamibia nomoAngola okupitila momahangano gopaimaliwa geli paveta, ngoka taga longele poongamba pOshikango nopoSanta Clara.

“Elalakano lyeuvathano ndika olyo okuhumitha komeho iipindi nomalanditho pokati kiilongo mbika unene tuu miilando mbika iyali koongamba dhomavi ngaka’ osho a ti.

 

LEAVE A REPLY

Please enter your comment!
Please enter your name here