Iivula Ithana a yemba edjo meefikola

0
244

OLYAVAHENGE – Namibia, ota dulu ashike kuwanifa po ondjodifaneko yokweeta po eefabulika domaludi moshilongo okuka fika komudo 2030, ngeenge e na oshiwana sha hongwa. Edi, oda tumbulwa kOministeli yoshikondo shoikwameni loshilongo nepashukilo leembelewa koupitilo weengaba Pendukeni Iivula Ithana.  Eshi a talela po ofikola ye mu lukilwa Pendukeni Iivula Ithana moshitukulwa shaMusati oshivike shaya, Ithana okwa kumaida unene oukadona va diinine eilongo vahe li tule moihole/ komhepo yokuya momakwatafano neehonda dovalumenhu opo vaha kanife eemhito deihongo.

Ithana okwa twa omukumo oukadona ta ti, omukainhu oye ina yoshiwana, ngeenge owa honga omukainhu nena oshiwana ashishe owe shi honga. Ta weda po kutya, okufimbapala ino hanga efikilo meihongo omukalo wokudjuupaleka onakwiiwa yoye noyokaana wa teelela, Iivula Ithana, okwa twa ovalihongo oukadona omukumo va endele pamwe nova wanife ondjodi yefaneko yaNamibia yokuyambula po oshilongo okuka fika komudo 2030. Okwa lombwela oukadona vehe leefele va kale oilongifo youmati, ta ti eshi otashi etifa va kwatwe komahongololo okufimbapala inava hanga efikilo, nokuninga ovadali vehe na eifano loilonga ya sha moshiwana nokuninga omutengi kepangelo nokovafilishisho vavo.

Ithana ota ti, Namibia ota pumbwa ovakwashiwana va hongeka, ve na oshinakuwanifwa va dule kuwanifa po omalalakanofaneko epangelo okuuka kokule komudo 2030. Te va shiivifile omafaneko epangelo omonakwiiwa kutya, epangelo otali faneke opo monakwiiwa eeministeli dokabinete otadi ka hoololwa she li kwatelela kouhongelwe wado.

Ouhewa waIivula Ithana nofikola mbushaye ya totwa po 1957, owa tameka 2008 ongehewa nomuyambididi munene, elalakano letalele po pofikola ei i na ovahongwa 535 meengudu okudja pondondo 8-12 okuva twa omukumo va kufe yoo ombinga mexumokomesho longhalo nomaxupilo oshilongo. Okwa ile pamwe nokakadona okafuuli dingi kaNamibia 2014, Brumhilda Ochs. Poshivilo opa li ovanafikola novadali mwa kwatelwa ovaleli voshiwana momidingonoko

LEAVE A REPLY

Please enter your comment!
Please enter your name here