NFA natango ota kundathana na Mannetti

0
253

WINDHOEK -“Sho tatu popi pethimbo ndika ospana yopashigwana yetanga lyokoompadhi, Brave Warriors ka yi na omudheuli okuza tuu sho Ricardo Mannetti eethelepo iilonga yuudheuli wospana ndjika omwedhi gwayi. Konima yoku ethapo iilonga mbika ye okwa li a shuninwa iilonga ye yuudheuli womegumbo, ta longo nokudheula oospana dhaagundjuka dhopashigwana okuza pwaandjoka yaadhani yokohi yomimvo 17 na oha kwathele wo mokugandja omadhewo gaadheuli yoospana ongoshimwe shomiinakugwanithwa ye,” osho Barry Rukoro Amushangandjai gwo NFA olutu oluwiliki lwosoka mEvi lyOmapenda ati.

Rukoro okwa popi kutya Brave Warriors sigo oompaka kena omudheuli omukuluntu nokwa tseyitha kutya olutu oluwiliki lwetanga lyokoompadhi moNamibia otali kundathana natango na Mannetti neinekelo kutya otashi vulika lu longe naye ishewe ongomudheuli gwospana yopashigwana yetanga lyokoompadhi.

Nonando opwa kala engwangwano kutya Mannetti oye omudheuli gwoBrave Warriors nenge okwa fa ashike omudheuli gwayo pauteknika, Rukoro okwa koleke kutya Mannetti ngashingeyi oye omudheuli gwomegumbo kokutya ha longele NFA na keshi we omudheuli omukuluntu gwoBrave Warriors konima yoku thigapo iilonga mbyoka.

“Ndele nee itaala ndje ,kutya oonkundathana pokati ketu naye  kombinga yokondalaka ompe yiilonga yuudheuli otadhi tsikile notuna einekelo kutya  otashi vulika a galuke ongo omudheuli omukuluntu gwoBrave Warriors” Rukoro okwa li moonkundathana nOmuperesidende gwoNFA, Frans Mbidi moka oshikumungu shiilonga ya Mannetti sha li sha kundathanwa, okwa li a ti okuna omukumo neinekelo kutya Mannetti otashi vulika a galuke ongo omudheuli omukuluntu. Mannetti okwa thigilepo iilonga yuudheuli woBrave Warrior moompadhi oontalala konima sho a tindi okushaina euvathano epe lyiilonga ndyoka a li a pewa ku Namibia Football Association (NFA). Ndika okwa fotofotolwa inee li nyanyukilwa anuwa oshoka olya nikondjala sho eli tala.

Mannetti okwa ningi ependa lya Namibia sho mesiku lyahugunina lyomwedhi Mai nuumvo a li wilike ospana yopashigwana yetanga lyokoompadhi noku yi fala kesindano lyayo enene lyotango mondjokonona sho ndjika ya ningi enyakwa lyuudhano wetanga lyokoompadhi lyiilongo yokuumbugantu wAfrika nenge COSAFA.Namibia okwa li a dhengemo ospana ya Mozambique nookoola mbali muyimwe medhingoloko lya hugunina lyuudhano mbuka wa dhanenwa moSouth Africa.

LEAVE A REPLY

Please enter your comment!
Please enter your name here