Omivo 82 komukwatinkonga nomudhipgi gwokanona 

0
342

OSHAKATI – “Omutamanekwa okuli oshiponga koshigwana, onkene oshigwana oshina okugamenwa koshiponga shika sigo aluhe… onkene itashi kumitha sho yamwe yomoombangi ya ti oya hala a pewe egeelo lyedhipago. Ompangu oyi mu uvitile olukeno nonando nakutamanekwa nguka kali nohenda sho a longele oshihakanwa she omuyonena”.

Ngaka omatumbulo gamwe gomwaangoka ga tumbulwa kOmupanguli mOmpangu yOpombanda mOshakati omanga inaa gandja egeelo lyondholongo yomimvo 75 komukwatinkonga ngoka lala omunona gwomimvo mbali lwiikando iyali nokonima okwa thingonona othingo nokuponda nokudhipaga oshihakanwa she.

Oshiwike shayi Omupanguli  Herman January okwa gandja egeelo lyondholongo yuule womimvo 20 mu kehe etamaneko lyomugaali gekwatonkonga kuFanny Mahamba (30), omukalimo nale gwomo Macaravan West Compound moKatima Mulilo. Mahamba ota ka la woo ondholongo yuule womimvo 35 molwedhipago nomimvo heyali mokukwatombambyona. Egeelo lyomimvo heyali oteli longele pamwe naandyoka lyotango lyekwatonkonga.

Ompangu oya  uvu nkene Mahamba, uusiku wesiku eti 13 lya Februali , 2014  aadha omunona Namushi Dorkas Pumulo a kana molukanda moka konima sho a puguma po puyina ngoka eli omulandithi gwomomapandaanda. Pehala lyokufala omunona nguka kuyina Mahamba okwa fala omunona nguka pehala lyomwiidhi omule emu hula omizalo noku mu lala kenganga iikando oyindji. Ndohotola ngoka a gandja uumbangi mOmpangu okwa ti iilyo yopaumwene yomunona oshowo endjandja lyokonima oya li ya ehamekwa noonkondo, onkene eyonagulo lyopamilalo oshowo lyopalutu olyo lyeeta eso lyomunona ngoka. Mahamba ngoka ena omukulukadhi pampango yoshigwana okwa li lombwele Ompangu kuyele kutya okwaadha omunona nguka talili molukanda lwa Macaravan West Compound ndele ina tya sha konima yokumu kutha pevi.

Omunona nguka okwa tameke ishewe talili  sho ye a tameke okumu kwata koonkondo.Konima okwa mwena. Sho a mana iilonga ye yekwato koonkondo okwa pondo omunona ngoka oshowo okwa thingonona othingo ya Dorkas sigo omwenyo gwa pumo.Okwa thigi olutu lwomunona ngoka lwaanomwenyo mpoka nokwayi.

Opolisi oye ke mu kwata esiku lya landula konima shono ya tseyithilwa kutya oye a li a monika kongulohi ya ziko a humbata omunona ngoka. Mahamba okwa ka zimina ondjo ye nonando petameko lyiihokolola okwa li tiipatana kutya oye a longo shoka.Okwiihokolola kutya okwa li eshi kutya shoka ta ningi osho epogolo na otali ke mu geelitha. Okwa hokolele Ompangu kutya omanga inaa longa uudhudhu mbuka okwa li a nu momalovu , nuukolwi owa li we mu undula okulonga epogolo ndika.

Omupanguli January okwa ti eipopilo lya Mahamba lyuukolwe itali itaalwako moshinima shika, oshoka omaihumbato ge oga ulike kutya oshinima shika okwe shi ningi palongekidho. Okwa ti egandjo lye lyombili nalyo kalina ondjundo oshoka ye okwa li ena ompito okupula edhiminopo kuyina yomunona nguka, ndele petameko okwa kala tiipatana kutya oye a longela omunona nguka uuhwapindi waashi kutumbulwa. Okwa li keena we ompito yimwe yaashi ndjoka yokuzimina ondjo ye molwashoka okwa li a monika a humbata omunona ngoka pahapu dhomupanguli January. Mahamba okuna aanona yaali nomunona gumwe gwomukadhona gwe okuna omimvo dhi thike pudhomunona ngoka a dhipaga.

“Ando omunona ngoka okwa li omumwandje a kwatwa kenganga nokudhipagwa , andola ngame onda dhipaga omufekelwa nenge ndi mu lopote kopolisi “ osho Mahamba a li lombwele Ompangu pethimbo lyiihokolola ye.

Hope Ngara omutseyiveta okuza koLegal Aid oye a li ta popile Mahamba omanga omuAdvokaata, Philippus Brink okwa li a kalelapo Epangelo.

LEAVE A REPLY

Please enter your comment!
Please enter your name here