Peter Ondume yomomufitu: Iita pEpalala laHamukoto

0
395
Peter Jungle Fighter

Olugodhi lwopEpalala la Hamukoto olwa kondjelwe mu Novomba 1981, sho kuyele omwedhi ngoka ndali nda lombwelwa kukommanda hailwa Ruben Neshiko Matondo ga Niilonga opo tu kondjithe omutondi gwetu mehala lyolugodhi moka ongundu yandje ya li hayi longele moku kondjela emanguluko. Kommanda Matondo ga Niilonga okwa adhika a pingenepo hailwa Shikuma Kamati ngoka aadhika a tuminwa ketanga lyoMechanised Brigade koLubango moshitopolwa sha Huila moAngola. Opo tu longepo oshinakugwanithwa shika shokuhomona omutondi, ngame onda pewa aakwiita yeli lwopomilongo ne oshowo oondjembo dhoonkondo niikuti ya gwana okukondjitha nayo omutondi moshitopolwa kohi yoshinakugwanithwa shetu. Hailwa Nairobi ngoka ali kommanda yopevi yoPlatoon ontiyali oye a li Kommanda gwopevi  metumo ndika lyoku ka lwitha omutondi pEpalala la Hamukoto. Pethimbo lyolugodhi nduka ngame onda adhika ndili okommanda yoDetachment yUundaadhi, nda yi pehala lya Hailwa Sacky ngoka aadhika a lundululilwa koombelewa oonene dhiita pashitopolwa shetu. Esiku ndyoka otwa lala momukunda Ondema guli konyala ookilometa  40 muuninginino wOkongo moka omo mwali okamba onene yaakwiita yomukolonyeki. Otwa thigipo Ondema pethimbo lyongula onene notwa thiki pEpalala  lwopotundi 11h00. Omukunda nguka tse otwe gu gama kuumbangalantu zilo. Lwopotundi ontiyali yomutenya konima ashike yokulya omwiha otwa tseyithilwa kaanamukunda kutya opena aakwiita yomutondi ya landula oompadhi dhetu mboka ya thiki momukunda nguka. Sho twa mono uuyelele mbuka otwa lombwele aakwiita yiilongekidhile olugodhi. Onda tumu aakwiita yaali yokundaadha ya ye lwaahoka taku ziilile aatondi yetu opo ya vule okutu londodha uuna mbaka ya thiki popepi.Potundi ontine komatango oohailwa mbaka yaali oya galukile kutse taya tondoka ye tu londodha kutya aatondi oya li taya iinyenge yuuka mpoka tuli. Onda lombwele kommanda omutiyali kungame opo a lombwele aakwiita mboka ya li kuumbugantu yiilongekidhile olugodhi. Manga omupevi gwandje a li ta gandja omalombwelo kaakwiita yokuumbugantu ngame ondali tandi lombwele mboka yeli kuumbangalantu naamboka yali mokati kehala lyoshilangela opo yiilongekidhile olugodhi.Otwa mwena nokutegelela sigo aatondi ya thiki popepi opo ihe omukwiita ngoka a li iinekelelwa okuumba okwa hwanuna uukitha maakwiita yomutondi. Yo aakwiita ayehe yetanga lyandje otaya umbu okuyaha omutondi noku mu thiminika a shune monima oku kiiyunganeka opo a vule okutu yamukula. Sho omutondi a galuka konima yokushuna monima kashona tse otwa adhika twa zapo mpoka twa li. Olugodhi lwolwene olwa ka tameka konima sho aatondi yiilongekidhulula oku tu homona. Otwa kala tatu iyumbu uule wethimbo omanga aatondi inaa ya shuna monima oshikando oshitiyali. Konima onda ka lombwela aakwiita yandje ya shune monima sho nduuvu omadhagadhaga taga ndunduma okuza muuninginino.Ngaka oga tameke taga umbu miihwa ya gama muuninginino womukunda ngoka. Pethimbo twa li tatu thigipo olugodhi onda adha omukwiita gwetu gumwe eehamekwa  mokugulu. Onda indile omukwiita gumwe opo a kwatehele ndje tu humbate hailwa nguka okumu fala pehala linegameno. Manga twa humbata hailwa aatondi yetu oya kumikwa komadhagadhaga ngoka gaadhika gathiki pehala lyolugodhi noya tameke oku tuumba ishewe.Mbaka oye tu landula sho ya mono ombinzi ya hailwa ngoka twali twa humbata. Shika osha li sha thiminike ndje okuyamukula okuumba kwawo no ngeyi ondeya thiminike opo ya holame po kashona. Pamukalo nguka tse otwe shi pondola okufadhukapo okuza mo moshiponga. Konyala omukwiita omukwetu ngoka a li ta kwathele hailwa ngoka eehamekwa naye okwa zi keungu a dhipagwe sho oshikuti shomutondi sha piti ashike mohema ye lwoposhiya. Onkene otwa li twa thiminikwa okuthigapo omukwiita omukwetu ngoka a li eehamekwa, nonando ondjembo ye otwa li twa yi nayo.Shika osha li oshikando shotango tatu thigi omukwiita omukwetu ena omwenyo mehala lyolugodhi. Otwali tuuvathana kutya konima yolugodhi otatu ka tsakanena pEmbwanya. Polugodhi nduka opwa li pweehamekelwa aakwiita yetu yaali .Olugodhi otwelu tala lwali lwa sindana nonando twa li twa thigipo omukwiita gwetu gumwe.Konima otwa ka kundana kutya omidhimba hamano dhaakwiita yomutondi odha li dha tsilikwa momadhagadhaga ngoka gali ga lambele mehenene ndyoka lyali mokati komukunda nguka konima yolugodhi. Aakwiita yomutondi yeli omulongo nayo oya li yeehamekelwa molugodhi nduka.Konima yesiku limwe olugodhi sho lwa hulu otwa tumu aakwiita yoondaadhi opo ya ka tale nkene oondjembo dhetu dha longa. Oya ndhindhilike kutya iikuti yoondjembo dhetu oya li ya longa nokuhanagula apehe mpoka ya gwile, oya teyagula iihwa nomiti.Oshikwawo pehala lyolugodhi opwali ombinzi oyindji tashi ulike kutya aatondi oya li yeehamekwa oyendji.Oshikwawo mbaka oya mono kutya hailwa ngoka twali twa thigipo pehala lyolugodhi okwa dhipagwa komutondi shika oye shi koneke kombinzi oyindji ndjoka yali ya ndondela pehala mpoka a li a thigala , oshowo sho aatondi ye mu kookolola sigo oompoka pwa li pwa lambele edhagadhaga.Komahokololo ngoka tuuvu kaanamukunda oshowo okutala kwetu yene osha ulike kutya olugodhi ndoka twa li twa kondjo olwa sindana. Shoka shali tashi ehamandje noku thigila ndje eiyuvo lyondjo ooshoka sho twa thigipo omukwiita gwetu ngoka a gwile momake gomutondi.

LEAVE A REPLY

Please enter your comment!
Please enter your name here