Ya tindi ku gandja oompale

0
264

UUKETE – Aakalimo yomomukunda Uukete moshikandjohogololo Onayeba moshitopolwa Oshikoto oya tinda okugandja iifendela yomagumbo oshowo oompale ndhono hadhi gandjwa aluhe konima shampa aantu ya mana okuyungula.

Aakwashigwana mbaka oya ti oya tindi okugandja mbika omolwa mwene gomukunda gwawo Tomas Shituku ngoka anuwa itaa longo muuwanawa woshigwana.

Yamwe mboka ya holola omakemo gawo taya popi kutya mwene gomukunda oye tuu nguka okwa tula owala iinima yaana oshilonga komeho, ye ta dhimbwa aakwashigwana ye. “Mwene gomukunda gwetu okwali a tindi okutupopila opo tu mone omeya tse tu kale tuna omeya geli popepi, ohetu tindile woo opo tu mone omayakulo gopaunamiti nomayakulo ngaashi gokuhawalekwa oonete dhoomwe oshowo oshikukuta,” Aanamukunda taya lundile ngaaka.

Taya hokolola kutya mwene gomukunda oye tuu nguka oha landitha owala omavi kondilo,naashino oheshi ningi paumwene na iha pula anuwa nande ookapatashu yo yeshi popyemo ayehe noha pula aantu ya fute oodola 2000 peha lyo600 ndji ya tulwapo kelelo lyaNdonga. Ye anuwa iha kwatathana na kapatashu gomukunda Uukete.

Mwene gUukete Tatekulu Shituku sho ali a ningwa omakwatathano naye  pangodhi okwali naye a yelitha kutya nonande ali a gandja elombwelo opo aanamukunda ye ya ete oompale sigo opompaka ka puna nange ogumwe a eta oompale niifendela yomagumbo, ashike okwati ina tseya nande omatompelo kutya omolwashike inaa ya eta . Ta gwedhapo kutya otaka ninga oshigongi mbala ye a pulakene kutya aanamukunda gwe oyena omadhiladhilo gatya ngiini.Kombinga yomalundilo ina tya kosha,okwa uvaneke taka galukila oshifo shika  mbala.

Aakwashigwana shino oyali yeshi yelitha oshiwike sha ziko pOshiyayeka sho yali ya ningilwa oshigongi ku kansela goshikandjohogololo Eenhana, Nehemia Haufiku. Sho yali ya holola montaneho yamwene gomukunda kutya oyafa ashike kaayena mwene gomukunda oshoka ihaya mono omayakulo ngono ya pumbwa ku pewa mekwatelokomeho lye.

Aakalimo yomomikunda ngaashi Oshiyayeka,Oniiwe yaNdapanda, Olyaambwa nayo oya koleke kutya ihaya mono we omayakulo molwaashoka mwene gomukunda ngoka otati ita gandja omayakulo gaantu ya tendelwa kOhangwena, nonande a hala aakwashigwana mboka ya gandje oompale niifendela yomagumbo ye inaa hala oku yapa omayakulo ngoka ya pumbwa, shono she ke eta opo aanamukunda nayo ya ndjike oonyala mevi yo yaa ha gandje mbyoka taya pulwa.

Oya gwedhapo kutya oya hala mwene gomukunda gumwe dho omikunda tadhi topolwa dhi kale A naB oshoka omukunda omunene unene na mwene gomukunda okuli kokule nayo. Ta yati pamwe omolwa uukule osho ihaaya mono omayakulo okuza ku ye.

Kansela goshikandjohogololo Eenhana, Nehemia Haufiku ngono naye ali poshigongi sho a ningwa naye omakwatathano okwa koleke kutya opwa fa puna omananathano pokati komuwiliki gwomukunda naakwashigwana mboka taya nyenyeta sho ihaaya mono omakwatho kuza ku mwene gomukunda anuwa.  Ta gwedhapo kutya opuna uukwamuhoko oshoka omukunda ngoka oguna aantu yamwe yeli poongamba dhoshikandjohogololo Onayena nEenhana. Ta gwedhapo kutya omukundu nguka otagu ka kala gwa kandulwapo mbala.

 

LEAVE A REPLY

Please enter your comment!
Please enter your name here