Yi ilongekidha okutsakaneka Omuperesidende gwoshilongo

0
259

ONGWEDIVA- Ongundu yo Affirmative Repositioning moshilongo oyati oya ilongekidha oku ka kuutumba nOmpresident gwoshilongo Hage Geingob opo ya kundathane shina sha nomukundu gwevi lyomoondolopa ndyoka lina ondilo.

Omupopiliko gwongundu ndjoka ya totwa nelalakano okukonga nokundungika epangelo noshowo omalelo gondoolopa nkene taye shiningi oshipu opo kehe gumwe a kale ta vulu oku mona evi, Job Amupanda okwa ti kutya yo kayena uupyakadhi naamboka ya hala oku kala omutumba nawo oshoka oonkundathana odho ya hala.

Okwa ti kutya yo oya tegelela ashike esiku li kolekwe kutya uunake okuya kegumbo lyepangelo ya ka kuutumbe nomukuluntu.

Amupanda okwa ti kutya yo enene dhiladhilo lyawo kalishi oku ikuthila evi koonkondo ashike oku mona ekandulopo lyomukundu ngoka.

Amupanda nooyakwawo yaali Dimbulukeni Nauyoma na George Kambala oya pele epangelo omweedhi omugoyi opo ya kale yaya moonkundathana dhoshinima shika ashike epangelo olya li lya kala lya mwena sigo omweedhi nguka sho aagundjuka ye li dhimbulukitha kutya esiku lyokwiikuthila evi inali shendja.

Ondundu tayi pangele oyali ya tokola opo yi thidhe aagundjuk mbaka moSwapo oshoka aniwa otaya lengitha aakuluntu sho taya ikuthile evi ndyoka kaayena.

Amushangandjayi gwongundu ndjoka, Nangolo Mbumba okwa ti aalumentu mbaka yatatu kayena esimaneko lyaakuluntu na ina ya pumbiwa mo moSwapo.

Ashike Amupanda okwa ti Nangolo woo naye oku shiwike nawa sho ali a tumbula etumbulo ewinayi moshilongo ati “Omake aathigona ne” ihe ina tidhwa mo moSwapo.

Peresidende Geingob okwa ti kutya nando Swapo ina hala we okupopya naagundjuka mbaka evi omukundu omunene moshilongo na okuna oku pulakena kaagundjuka oshoka pamwe oyena edhilaadhilo lili hwepo.

Omupresidende okwa ilongekidha okupopya naagundjuka oshiwike shika omanga esiku lya hugunina ndyoka lya pewa epangelo kongundu ndjika inali thika.

Aagundjuka oyendji moVenduka noshowo moTsumeb oyali ya ulike nale nokuli kutya yo oya ilongekidha mpoka taya ka mona omahala opo ya mone oondunda dhawo dho kulala.

Ashike omukuluntu gwopolisi Sebastian Ndeitunga okwali ati aagundjuka mbaka otaya piyaganeke ombili nengungumano sho taya pula evi na aapolisi ye oya ilongekidha oku keelela mboka ya hala okuli ikuthila.

Mwaashoka sha yooloka kushika, Amushangandjayi gwewawa lyaagundjuka moSwapo Ndokotola Elijah Ngurare okwa li a tidhwa moSwapo oshoka aniwa ota yambidhidha mboka taya pula evi.

Omupeha amushanga gwewawa ndyoka Veikko Nekundi naye woo okwali a tulwa pevi kaagundjuka mewawa ndyoka oshoka aniwa ota eta etopoko mokati kaagundjuka.

LEAVE A REPLY

Please enter your comment!
Please enter your name here