Ambunda uuvanekele omuArgentina iita molugodhi

0
266

WINDHOEK -Enyakwa nale lyuuyuni lya Namibia Paulus ‘The Rock’ Ambunda okwa ti ngele osha pumbiwa omukondjithi gwe gokoArgentina okuna okumu taaguluka ngele okwa hala okusindana epaya lyuunyakwa ndyoka taya ka kondjela ongulohi yOlyomakaya ngaka poRamatex Hall moVenduka.

Ambunda okwa tegelelwa kaaNamibia oyendji opo a longe ngaashi he shi ningi okweeta epaya lyuunyakwa muudhengingonyo ndyoka lyaana mwene lyo Super Bantamweight lyehangano lyo International Boxing Organisation [IBO] sho taka kondja nomukondjithi gwe omukwashigwana gwArgentina, Leandro Esperante.

Oshinyanga oshinene shaRamatex mOtjomuise sha Venduka osho sha hogololwa mu ka dhanenwe  ombokisa kohi yoshipalanyolo ‘Night of Champions’ Boxing Bonanza. Uudhano mbuka otau kakala ,wuna aambokisi yomegumbo oyendji taya ka kondja omanga mboka wongulohi ndjoka uunene inaawu thika. Uudhano moka Ambunda ye nomukondjithi gwe taya ka kambadhala oku toolapo epaya ndyoka lyuunyakwa muuyuni lyaana mwene owo tau ka edhilako ongulohi ndjoka. Mbuka owo uudhano moka Namibia ta galikana noku tegamena a ka mone enyakwa etine lyuuyuni mokudhenga oongonyo.

Omudhengingonyo omukulu nokuli enyakwa inaali dhengwa sigo oompaka , Harry Simon oye gwotango mokweeta oshishani shuuyuni mombokisa mEvi LyOmapenda omumvo 1998, ye ta landulwa ku Paulus ‘The Hitman’ Moses mo-2009 noku Paulus The Rock Ambunda mo -2013.

Ambunda sho a popi poshigongi shoonkundana moVenduka oshiwike shika okwe shi popi shuukilila kutya oshinakugwanithwa she ngele a palamene omukondjithi gwe osho okusoshimpwiyu kutya okolonela ye oyo tayi ka sindana pehulilo lyuudhano mboka. Okwa ti ote ke shi ninga kutya otashi mu pula shike.

“Otandi uvaneke kutya itandi ke mu uvitha nayi, oshoka okusindana epaya lyuuyuni osho oshilalakanenwa shandje shasimana ethimbo ndika.Ondi ilongekidha nawa okuumba oongonyo tadhi fuula dho tadhi ehameke.Olugodhi nduka otalu kakala iita, oshoka otandi ke mu landula mu kehe edhingoloko sigo uuna ndoka itaaka vula we okwiidhidhimikila okudhengwa,”osho Ambunda uuvaneke.

“Inandi hala okuuvaneka kutya otandi kuumba yimwe nopevi, ihe ondiinekela ndjika otayi keya. Otandi kumike kehe gumwe opo eye a tale uudhano mbuka, amuhe ileni momangungo okutala iita itaayi nuwa meya nolwithi talu tsina pwaana omulilo,”.  Ambunda okwa tulwa pehala etitatu muuyuni kehangano lyo WBO, puutimulongo-11 kehangano lyoIBF, puutimulongo-14 kwaandyoka lyo WBA oshowo puutimulongo 17 kehangano lyo IBO.

Esperante sho a popi okupitila momutolokeli gwe okwati  okushishi kutya omuNamibia okuna owino nuunongo owindji  oshowo oonkondo dhe okuumba oongonyo moringa, ndele ye okwa ti omulumentu ena omukumo noshinakugwanithwa okukuthako epaya ndika lyuuyuni.

“Nando onde mu simaneka ongo omudhengingonyo , nakale a tseya kutya shoka sheenditha ndje osho iilonga, nomOlyomakaya  ngame otandi ka popya moringa ngaashi ndeshi endela. Ondishishi kutya okuna omuhingo omwaanawa gwokudhenga oongonyo , ye ishewe oha dhenge oongonyo dha dhiginina onkene ngame itandi mu tala ongo omukondjithi omupu,” Esperante osho a popi pahupi.

Uutikete otau landwa kooN$100 kukehe omuntu omanga mboka waasimani otawu futilwa ooN$500  , yo itaafula pwa kuutumba aantu omulongo taya li iikulya, yo ye na po omeya omatalala otayi gu ooN$20,000. Uutekete otau adhika poositola mpoka pena Computicket poShoprite na Checkers  oshilongo ashihe. Okulanda iitaafula yoVVIP kwatathana na Vivian Kambatuku ko email ndjika vkambatuku@gmail.com

LEAVE A REPLY

Please enter your comment!
Please enter your name here