African Stars ota kala e shiwike natango

0
228

WINDHOEK – Ospana yoAfrican Stars oyi ilongekidha nawa noya  tegamena oku sindanapo ekopi lyo Standard Bank Super Cup muudhano wayo nospana yoTigers Olyomakaya ndjika pokapale kuudhano kaSam Nujoma Stadium moKatutura.

Einekelo ndika nomukumo nguka ogwa tumbulwa nokuulikwa komudheuli gwokulipo gwospana ndjika, Andrew Tjahikika pethimbo a li ta longekidha aadhani ye, konima yokukundana kutya omudheuli gwawo Woody Jacobs okwa ethapo iilonga.

“Aadhani oya li ya gumwa konkundana ndjika ndele otwa popi nayo, noku yuuvithako kutya aadheuli oha yeya eta ya yi ihe ospana African Stars otayi kalapo oshowo edhina lyayo itali dhimipo, onkene ngashingeyi oshinakugwanithwa shetu mboka twa kalapo,otu ye komeho ngaashi ashike twa adhika twa longekidha. Woody kepo we pospana ndjika  ihe nando ongaaka onkalamwenyo oyi na okuya komeho” Tjahikika  a ti.

Omukwatheli kwali gwa Bobby Samaria ngoka ngashingeyi a ulikwa oshiwike shika oye omudheuli omupe gwospana ndjika, omanga ndjika inaayi ka dhana muudhano wekopi lyo Super Cup, Tjahikika okwa ulike kutya elalakano lye enene olyo okusindanapo ekopi ndika.

“Otwa li twa kanitha ompito okuli sindana omumvo gwayi sho twa dhengwamo kospana ya li yiilongekidha nawa yo BA ndele nuumvo tse otatu ka kondjela ekopi ndika nospana yo Tigers na kehe gumwe okushishi nkene shasimana okusindanapo ekopi ndika, opo tse tu tameke omumvo omupe guudhano netameko ewanawa”.

Tjahikika okwa ti ospana ye oyiilongekidha nawa oshoka opo yaadhika ashike ya dhana methigathano lyuudhano wekopi lyOmundohotola Hage Geingob ehulilo shiwike lyapiti.

“Otwa dhanene noospana oondhigu dho Julinho no Sundowns,  momaudhano gaali omadhigu notu shishi kutya aadhani yetu oya dheuka , noshikwawo otu shishi omikalo dhokudhana ndhoka tuna okulongitha opo  tu sindane. Ondi itaala kutya nonkalo ombwaanawa otatu vulu okusindanapo uudhano mbuka Olyomakaya”, Tjahikika a ti.

Omudheuli okwa ti ospana ye otayi kakala naadhani yayo ayehe ya gwanapo, sho taya ka dhanitha omudhani gwayo gwokonima, oshowo gwoBrave Warriorss Ferdinand Karongee ngoka  ta ka dhana pamwe naDennis Ngueza ngoka a li a thigipo okapale ta tina pethimbo Stars ya li ya dhana noMamelodi Sundowns Olyomakaya gayi.

“Dennis okwa li eehama kashona ihe ota kakala eli nawa mOlyomakaya ndjika . Ferdinand okwa tegelelwa a kale a galuka okuza koSouth Africa hoka a li a ya oku ka tala ngele ota taambwa kospana yimwe ndjoka ye mu hala. Onkene ospana yetu otayi kakala yiigwanapo lela .Shoka shasimana osho owala oku ilongekidha nawa pamadhiladhilo oshowo okugoyako nawa keilongekidho lyetu molwuudhano wekopi lyoSuper Cup tse tatu tala kutya oshike tashi ningwapo”.

LEAVE A REPLY

Please enter your comment!
Please enter your name here