Albertina Daniel a tungilwa egumbo epe

0
376

OSHOOPALA-Ombelewa yoshikandjohogololo Uukwiyu-Uushona okupitila mopolograma yelelo lyoshitopolwa Oshana oya gandja egumbo lyoondunda mbali lyiipeleki komukulukadhi omunamimvo 49  Albertina Daniel noothigwa dhe.

Omagano ngaka oga kwatelamo olugumbo lwa kunduka egumbo oshowo ndoka lwa kunduka epya opo mbaka ya vule okulonga iikulya ngele omvula ya loko. Iinima ayihe mbika kumwe oya tengenekwa ya gu ooN$26 000.

Omuvali gwaanona yahetatu okwa kala noyana motenda konima sho oondunda mbali ndhoka dhomwiidhi dhali megumbo lye lyomiti dha ende noku halakanapo. Otenda ndjoka okwa li eyi pewa kelelo lyoshitopolwa Oshana omumvo 2014. Daniel ogwoludhi lwaayelele nenge aaSan. Daniel kali ta vulu okuthitikininamo omahodhi ge genyanyu sho a kala noku pandula nomaimbilo genyanyu omolwekwatho ndyoka a pewa.

Kansela gUukwiyu-Uushona, Andreas Amundjindi okwa ti ombelewa ye oya kuthako oshinakugwanithwa shika konima sho omushiinda gwaDaniel, Frieda Ndafenongo ngoka a kala noku ya kwatha a hokolola onkalo yawo.

Okuza mpoka ombelewa ya kansela oya kala noku kwathela Daniel naanona ye  mokuyapa uusila wepungu.

“Oya kala woo yaana uumutse noodokumende dhoshilongo, ndele otwe shipondola okuya monena oodokumende ndhoka , nena aanona yane oyena oombapila dhoshilongo naambaka ngashingeyi ohaya taamba omakwatho okuza koholomende ya Namibia,” kansela Amundjindi a hokolola.

Okwa tsikile a ti ombelewa ye ohayi kwatha Daniel okumu fala komahala hoka ta ka landa oompumbwe dhaanona , mboka na otayi kala noku tsikila okumukwatha ngaaka.

Daniel okwa silwa aasamane lwaali nokonima yeso lyomusamane omutiyali, oondunda mbali ndhoka odho dhali egumbo lye odha halakanapo.

Daniel ngoka ali a nyanyukwa noonkondo  okwa popi iitya iishona yowala okupandula ombelewa Uukwiyu-Uushona sho ye mu kwathele moohepo dhe.

“Otandi ti shike? Otatu ti ishewe shike nenge otatu ningi ishewe shike?Tse otwa pandula dhoshili,” osho Daniel a popi.

Daniel okwa ti egumbo lyawo epe olili nawa oshoka ohali pata.

Nale okwa kala ha adha uusila we wa yakwamo okuza motenda moka ya li ya kala. Oshikwawo omayoka oga li woo haga iyakele motenda moka eta ga hiti kohi yomatalashe nolundji uuna ya lala ohaya uvu omayoka sho taga inyenge ga hala okuya lumata ye pamwe naanona. Frieda Ndafenongo, omushiinda gwawo okwa uvaneke ta tsikile okuya kwatha. “Ohandi topola oshishona shoka ndina  pamwe nayo , uuna ndamona omweelelo ohandi ya pe. Aanona ohaye ya aluhe kaandjetu ngame tandi ya pe iikulya,” Ndafenongo a hokolola.

Amundjindi okwa indile efamilia ndika opo li kaleke ehala lyawo lili nawa nokusoshimpwiyu kutya oya longitha olugumbo ndoka okulonga iipalutha yawo okwiihupitha yoyene. Nuumvo ombelewa ya Kansela oya pe efamilia ndika uuhoho oshowo oya pulula epya lyawo.

Ombelewa ndjika okupitila mwaandjoka yOmuprima Minista oya gandja woo omakwatho keefamilia dhilwe dholudhi lwaNaluteze dhili ndatu .

Daniel naanona otaya galikana oshigwana oshisahenda shaNamibia shi ya kwathele omatalashe nomakumbatha geli nawa opo yi igamene kuutalala, oshoka pethimbo ndika ngoka yena ita ge ya  gamene  nawa kuutalala.

san-2-(1)

LEAVE A REPLY

Please enter your comment!
Please enter your name here