Iilyo yaTuudila Musical Works ya hangana

0
597

EENHANA  – Iilyo yoongundulwiimbo dhaTuudila Musical Works oyali ya hangana mehuliloshiwike lya piti  pontanda yiilyo ayihe yongundu ndjika megongala mEenhana.

Tuudila musical works oongundu dhomalwiimbo ndhono dhili mewiliko lya Tulonga Nakamhela dha dhikwapo mo2000, nopethimbo ndino oyina  konyala oongundu dhili 23 niilyo yili 1600 oshilongo ashihe oshowo moAngola.

“Ohatu longekidha ontanda yoongundu dhetu omumvo kehe mono oongundu hadhi hangana noku imba omaimbilo,okukondjela epandela nomakopi  oshowo hatu kala neimbilo lyo shilongwa, eimbilo lyoshilongwa ohali longwa oongudu adhihe kohungi yokOmuvo ndjono hayi kala ko ku Novembeaomuvo kehe yo taya ka longa woo iilyo mbyo inaayi holoka kohungi ndjoka. Opo nee eimbilo ohaliya li imbwe pontanda, mEtitano oku tala ngoka eli imba pamukalo ngaashi naanaa lyu uthwa” Nakamela ta ti.

Ohungi ndangala yomvula ndjika oyiliko mu-8 Novemba, kengongalo kOmundundu, hono kwaza wo Tulonga Nakamhela, nonuumvo otashi ka ningwa wo pamwe nokudhimbulukwa, oshowo okukusiikulula emanya lyaangoka ali amushanga gwotango gwaTuudila, Martin Hafeni Musheko.

Ontanda ndjino yoongundulwiimbo dhaTuudila oyali yina iipopiwa mbyono yali ya nuninwa aayimbi ayehe oshowo ya ningilwa otundimbiimbeli komuwiliki gwIiniwe moombelewa dhongerki mOniipa Adolf Hashikutuva.  Omusita Hashikutuva okwali a indile aayimbi ya kale yena Kalunga yo ya taandelithe aluhe elaka etoye tali pitile moondjimbo. Hashikutuva tati okwa pumbwa ku totwe ehangano lyaayimbi ayehe mOnooli, yo ya kale taya hangana noku paathana omayele, yo ya tungathane woo pambepo.

“ Omwiimbi oye omuuvithi omunene oshoka omupulakeni oha kala a pulakena nawa kiitya nokongowela, netumwalaka ndyoka tali gandjwa okupitila meimbilo ndyoka omwiimbi ti imbi. Gandjeni etumwalaka liye nuuyuni awuhe notandi mu halele omukumo noonkondo mokulonga oshilonga shika shoku imba noku taandelitha etumwalaka lina ongushu,” Hashikutuva ta gwedhapo ngaaka.

Omusita Hafeni Mwaningange naye okwali a popitha aayimbi, teya kumike ya kale aatiliKalunga yo ya longele Kalunga meudhililo. Teya indile ya kale yena ekwatathano lyakola yo ya kale aluhe haya talelepo iitayi mbyoka yina iilyo yoongundu dhawo. Mwaningange ta tsikileko noku ya kumika ya pangelwe kombepo yuukumwe yo ya kale onga omuntu namumwayina.

Omuwiliki goongundu ndhika dhaTuudila okwa hokolola kutya ogendji gomomaimbilo oye mwene ega tota oshowoo oongowela mekwathelo lyiilyo ye.Tati nonande ongundu yawo yali ya tameke noongundu oonshona pethimbo ndino otayi ende tayi koko esiku nesiku oshoka omuntu kehe okwa hala a kale omwiimbi ye a gandje etumwalaka pandjimbo.

Eimbilo Lyoshilongwa nuumvo, olya sindanwa po kongundu Nafimanekwe  yokOngenga mompito yotango, Tulikemanya yokOkalongo omutiyali na Ndaunda Ondaka yokoWindhoek mompito ontintatu. Epandela ndyono hali kondjelwa painiwe olya sindanwapo ku Tsenaye Epola Alihe Choir yokEenhana monomola yotango, Ndaunda Ondaka yokOvenduka oye ya  ontiyali nontitatu Nafimanekwe.

Nakamhela ta gwedhapo kutya ontanda yawo yonuumvo oya enda nawa oku yelekanitha noontanda ndhi dha pita. Ta ti shino oshe mupe omukumo kutya nani Tuudila musical works ota koko nawa, noya humakomeho oku yelekanitha noomvula dha piti. Ta pandula iilyo ayihe sho yili mombepo yimwe teya ku mike ya kale yi imanga kumwe yo ya uvithe tashi pitile moondjimbo.

LEAVE A REPLY

Please enter your comment!
Please enter your name here