Omulongi gwosikola yoSoondaha a tumwa kondholongo omimvo 30.

0
377

OSHAKATI – Evukule, ethipambinzi nomumbalambali… mbika  iitya yimwe mbyoka Omupanguli, Mafios Cheda, a longitha omanga inaa gandja egeelo komulongisikola yoSoondaha a monika ondjo yedhipago lyokatekulugona.

Frieda Kalukuma omunamimvo 50, okwa pewa egeelo lyondholongo yomimvo 30 kOmpangu yOpombanda mOshakati Omaandaha oshiwike shika.

“Kungame shika ina shi opala. Owa fa owala ethipambinzi li indilwa li keele oshiyuma sha pungulwa ombinzi… Kandi shi wo kutya owa kala ngiini ho thikama komeho yaanona yosikola yooSondaha, omanga wu shishi kutya omake goye ogatiligana noga luudha kombinzi yomunona gulwe,”osho Omupanguli ngoka uuvite nayi a popi. Nando Kalukuma anuwa okwa tindi okugandja ehokololo kutya oshike shaningwapo shoka sha fala meso lyomunona  gomimvo ndatu Kauna Sakaria, okwa itaalwa kutya omunona nguka okwa si pokati komasiku 27 nenge 28 ga Maalitsa 2011 omolwa okuhepekwa kwa longekidhwa nokwethimbo eku ningilwa ku Kalukuma. Omathano nomahokololothano ngoka ga ulikwa mOmpangu oga ulike kutya Sakaria okwa li a fikwa olutu aluhe nomeya omapyu. Okwa itaalwa wo kutya nguka okwa li a monithwa iihuna yaashi kutumbulwa nokufikwa niikuni yomulilo. Ondohotola ndjoka ya gandja uumbangi mOmpangu oya lombwele Ompangu kutya shoka sheeta eso lya Sakaria osho okudhengwa komutse. Otaku tengenekwa kutya oshiti shoka shili oshitopolwa shiinima mbyoka ya ulikwa mOmpangu onga uumbangi, osho sha longithwa okudhipagitha omunona ngoka. “Omunona nguka okwa li a tegelela okutekulwa nokugamenwa kungoye. Ashike osheende ngiini opo wu ninge evukule? Shika osho oshilonga shuubarabari. Omuntu ito tegelele omukiintu ngoka eli woo omuvali, opo a ehameke omunona ngaaka,” osho Cheda a pula.

Manga inaa gandja egeelo ku Kalukuma , Cheda okwa ti nando Kalukuma okwa li omuvali, nokwa thigwapo komusamane gwe, Ompangu oyi na okutala shoka shi li muuwanawa woshigwana okuyeleka naashoka shi li muuwanawa we mwene.

Cheda okwa ti sho Kalukuma a indike oyana yaa landele nakusa Sakaria oshiketha, osha ulike kutya ye kali iitedhulula, ye ishewe iniipa uusama molwiilonga ye mbyoka. Ishewe Kalukuma kali nando uulike okuuva nayi nenge uulike a hendwa komutima ethimbo alihe sho ta tamanekwa mOmpangu, ina holola nando ehaluko nenge a kukume sho a lombwelwa egeelo kOmpangu.

“Ompangu otayi gandja egeelo ndyoka tali ku kuthamo moshigwana uule wethimbo ele,” osho Omupanguli Cheda a ti omanga inaa gandja etokolo lyOmpangu sho ya tumine Kalukuma kondholongo uule womimvo 30.

LEAVE A REPLY

Please enter your comment!
Please enter your name here