Oondjuhwa mOnambiya ota tadhi thipwa ombinzi

0
295

ONAMBIYA  – Aakalimo yomomukunda Onambiya moshikandjohogololo Eengodi oya kuminwa oshinima shili momukunda gwawo moka tashi thipi oondjuhwa ombinzi nokudhi kutha omitse.

Gumwe gomaanamukunda ngoka ali a hokolola okwati ye megumbo lye okwa kanitha oondjuhwa dhili 19, mono ndhono dhili 17 dha penduka dhasa omanga dhili mbali dha kasa momitenya moka.

Kuku Tekla Shiyavali okwa hokolola kutya oshinima shika osha ningwa uusiku wosoondaha ku pendukila omaandaha. “Oshinima shika oshali sha ningwa muusiku moka sho twa kala tu uvite oondjuhwa tadhi kudhile dho dhimwe tadhi igi, katwali twa penduka oshoka okwali uusiku otwa kala ngaa tatu ti pamwe odhina owala shi shedhi halutha,” Shiyavali tati ngaaka.

Okwali a gwedhapo kutya ongula yomaandaha sho ya penduka oyi ki itsa owala oondjuhwa dha langathana dhasa kakele kwaandhoka mbali dha kasa momitenya. “Molwaasho megumbo ondi limo owala naatekulu yandje yo ohaya yi kosikola onda kala ngaa nee tandi anaana ando ndi tale kutya pamwe sho shalya oondjuhwa dhandje tandi shi mono, ashike onda mono owala omakondo limwe olyafa lyandoongi na limwe olyafa lyeyuhwa enene, omakondo ngano ogelipo owala limwe ando toti oshinamwenyo shina omakondo inaa giifa,”ta gwedhapo ngaaka.

Shiyavali tati oondjuhwa adhihe odha dhipwa owala oombinzi dho dhimwe tadhi kuthwa omitse. Tati omakondo ngoka oga sindolola egumbo alihe oshowo poshikuku shoondjuhwa. Ta hokolola kutya oondjuhwa dhimwe odha likila koshikuku, na dhimwe odha likila megumbo sho dhazi kondje ando dheya dhi ipopile megumbo ashike enima lyaashiwike olye dhi landulile megumbo nokudhi thipa oombinzi ngaaka.

Ta hokolola kutya dhimwe ndhoka dha adhika dha langela pomayi odha dhipwa nokusa , ashike omayi inaga ningwa nande osha omaanga uuyuhwana nawo owa dhipagwa. Tati kayena nande uuyelele kutya oshikwashike tashi dhipi owala oondjuhwa ombinzi noku dhi kutha omitse sho itaashili onyama.

Kakele ku kuku Shiyavali oshinima shino osha dhipaga woo oondjuhwa momagumbo ga adha pugatatu momukunda ogo tuu nguka, mu limwe omwasa dhili 15, mulimwe 8 na limwe mwasa lili omulongo. Tati yamwe mboka oondjuhwa dhawo dha thipwa oombinzi oyali yedhi teleke nokuka landitha kuundingosho nonande kayeshi kutya odha lika koshike. Ashike Shiyavali okwa hokolola kutya oondjuhwa dhe okwedhi fulile oshilambo etedhi fikepo oshoka ia vulu alye nenge a ka landithe onyama keeshi kutya odha lika nana koshike, nombinzi keshi kutya oya falwa peni.

 

LEAVE A REPLY

Please enter your comment!
Please enter your name here