Peter Ondume yomomufitu:   Iita pOshamambo nOmupembe

0
391
Peter Jungle Fighter

Omalugodhi ngaka gaali oga kondjwa omumvo 1980 mu Auguste oshowo muDesemba omumvo 1981. Mu Auguste 1980 otwa tsakaneke nokukondjitha omutondi pOshamambo. Pethimbo twali mondjila okuza kOngudi okupitila mOshamambo otwa kundana kutya aakwiita yomutondi ya thikama unene maakwiita aateti yiinkoti yoludhi lwAankala oya li ye tu landula. Mbaka oya thiki pOngudi konyala ootundi dhontumba konima sho tse twa thigipo ehala ndyoka. Aakwiita ya tengenekwa ya li lwopomilongo hamano oya ziilile mokamba yaakwiita yomukolonyeki mOkongo.Molwashoka natse oyo twali tatu kongo otwa tokola opo tu ya langele miihwa ya thita pokati kEkoka nOshamambo. Otwa ningi oshilangela noku ya tegelela ya thike. Omanga twa tegelela, Kommanda gwetanga lyetu Hailwa Ruben Neshiko Matondo ga Niilonga okwa lombwele ndje opo ndi tume oondaadhi mbali kOshamambo oku ka konga uuyelele kombinga yaatondi yetu okutseya kutya oye thike peni momwaalu oshowo momatati ngoka ya li ya homata. Mbaka oya li yena okugaluka mbala noku eta uuyelele konima yokugongela mboka ngaashi ye shi longo. Etanga lyetu olya li lina aakwiita yeli lwopomilongo hamano  ya homatekwa iikondjitho ya gwana okudhenga omutondi pwaana omalimbililo. Kokutya otwa li twa homata oobazooka dhi vule hetatu, oondjembo dhomashina dho PK dhili ntano, oondjembo dhokuumba oomortiira dhuunene woomilimeta 60 dhili ndatu oshowo dhilwe. Kommanda omukuluntu okwa li Ruben Neshiko Matondo ga Niilonga ta kwathelwa ku Nairobi, Nigegeti, Uukulo oshowo kungame, ndali mewiliko lyoDetachment yuundaadhi. Otwa li twa kundana kutya aatondi oye tu landula okuza kOngudi hoka oko twa lala uusiku wa piti. Konima sho oondaadhi mbali dha yi dhi ka, ndaadhe omutondi , aakwiita ayehe mboka ya thigalapo oya lombwelwa opo ya fule iilambo yokuholamamo noshowo okuumbilamo uuna olugodhi lwa tameke, moku ilongekidhila okukondjitha omutondi ngele okwa holoka.Pehala mpoka twali opwa li pena iihwa ya thita nomiti omile nonando opwa li omwiidhi omushona.Otwa koneke kutya otwa gamenwa komudhingoloko ngoka okuyeleka naatondi yetu. Oshikwawo nguka ogwa li wo gwetu gamena kiiponokela mbyoka yomombanda okuza komadhagadhaga gomutondi.

Oshikwawo ehala olye tu gamena opo oshilangela shetu shaa monikile kokule kaatondi yetu.Otwa tegelele konyala uule wootundi mbali opo omutondi a thike pOshamambo. Oondaadhi mbali ndhoka twali twa tumu odha galuka tadhi endelele okutu londodha kutya omutondi okuli mondjila. Oya hokolola kutya aatondi oya li lwopaakwiita yeli 40 lwaampoka, nonando kaya li ya vulu okumona kutya mbaka oya li ya humbata oondjembo dhomaludhi geni. Ndele tse ka twa li naanaa tatu ipulileko koondjembo ndhoka omutondi a humbata oshoka olundji otwa kala tu shishi kutya uuna mbaka yeli mopatololi ohaya humbata iilwitho yoludhi lunipo.Konima yethimbo otwa uvu ekudhilo tali ziilile hoka twa ziilile. Otwa kala twa tegelela ishewe uule wetata lyowili omanga omutondi inaa thika moshilangela shetu.Omutondi okwa kwata ethimbo ele opo a thike, ngiika shika okwe shi ningi unene tuu sho a koneke oompadhi oontalala dhaakwiita yoondaadhi mboka twa li twa tumu kehala hoka.

Omutondi sho eya moshilangela okwe yamo eli momukweyo gumwe omanga aakwiita a shike aashona oyo yali ya tegama. Ohaluka ondjembo oya topa okuza mokati koshilangela shetu, naandjika oya landulwa kokuumba kwoondjembo adhihe dhali moshilangela. Omutondi kali nethimbo lyoku tu yamukula mbala oshoka ngiika okwa ka holama manga, nenge pamwe oya li ya thindilwa pevi kiikuti yetu mbyoka tse twe ya umbu, inatu tseya kutya omolwashike inaa ya yamukula, nenge oye tu yamukula ya nkundipala. Nani olugodhi opo talu ka tameka. Sho Kommanda gwetu a igidha kutya natu uke komeho omutondi okwetu umbu , noku tu thiminika opo tu holame kashona.Ihe nando ongaaka otwa li twa umbu omutondi okumu mweneka oshowo okumu thiminika a shune monima.Sho olugodhi lwa tsikile otwa uvu ooniita yalukunku yatatu taya ndunduma kombanda yehala lyolugodhi yeli kokule kashona. Shika oshe tu yelithile kutya aatondi yetu oya fadhukapo opo ya gandje ompito komadhagadhaga ogo ga kondjeko taga umbu omakolokela ge tu li kokule, konima otwa ka thiminikwa oku shuna monima no inaatu monika komadhagadhaga ngoka,otwa ende twa tegama noku ya kEkokofi konyala ookilometa 18 kuumbangalantuzilo wEkoka, hoka oko twali tuuvathana tuna oku ka tsakanena konima yolugodhi.

Otwe shipondola okukuthapo aakwiita yetu yaali mboka yali yeehamekwa molugodhi nduka twali twa kanithilemo omukwiita gumwe awike. Omuthitu moka twa kondjele ogwe tu gamene kaatondi yetu oshoka mboka oya gwile moshilangela inaa ilongekidha. Nongeyi otwa li twa vulu oku ehameka omutondi gwetu sho ye a kanithilemo aakwiita konyala yeli ya heyali, mboka omidhimba dhawo dha monika tadhi londekwa moondhila konima yolugodhi. Omutondi okwa li wo a yi naakwiita ye vule omulongo yeehamekwa.

Molugodhi lwopOmupembe ndoka lwa kondjelwe mu Desemba 1981 otwa li twa ningi olukongo okukondjitha omutondi pEepembe moshikandjohogololo Okongo. Ongundu yili kumwe yetu oya li naakwiita yaadha pethele limwe. Sho tweya sigo opOnhumba lwopomulongo gwongula, aakalimo oyetu tseyithile kutya aatondi yeli lwopomilongo ntano oya lala momudhingoloko ngoka ongulohi yayi. Kommanda okwa lombwele ndje mbala opo ndiye pamwe naakwiita oondaadhi yatatu tu ka  tale kutya aatondi oye shi gama peni. Otwa thigi etanga lyetu lili konima omanga tatu ka konga aatondi mpoka ye li. Otwii tsu oompadhi dhawo dheenda dhuuka uumbangalantu tse otwa galuka okuhokololela Kommanda ngoka etu shunitha ko ishewe opo tu landule oompadhi ndhoka hoka dhuuka.Manga tatu taaguluka ondjila yomamanya ya Okongo –Eenhana otuuvu omindundumo dhomaloli taga ziilile muuzilo tse otwa tegelele etanga lyetu li thike omanga inaatu taaguluka oondjila ndjoka noku langela omutondi mooha dhayo. Manga twa tegelela moshilangela otwa mono aakwiita yomutondi taya ende kolupadhi ya landula ondjila , ngiika taya kongo oomboma.Otwa li twa langela omutondi gwetu mooha dhondjila opo tu mu yahe nawa ngaashi tashi vulika. Otwa tegelele sigo aakwiita mbaka yokolupadhi oya thiki mokati koshilangela opo ihe olugodhi lu tameke.Elago enene oondyoka kutya aakwiita omulongo mboka ya li komeho sho ya mono oompadhi dhetu oya ithana yakwawo opo yee ya tale oompadhi dhetu opo ashike dha endepo. Yamwe mboka twa li  kuuzilo wondjila otwa mono nkene aakwiita mbaka taya  tondoka oku ka tala oshinkoti shetu. Otwa ka uva sho mbaka taya patathana nando inatu uva kutya oompata odhuuka peni. Manga taya kudhile ngaaka tse otwa li owala tatu nyata evi twa hala oku ya yaha.Mbaka oya li yaa shiwo kutya oyeli mokati koshilangela. Omahauto gawo gaali ogeya  na limwe lyago olya li lyuuka mokati koshilangela.Sho ololi yimwe ya thiki konyala aakwiita omulongo oya li yi inyenge okuuka moshilangela naasho ya lyata ondumba yomavi koongenge dhopate omuumbi gwetu gumwe okwa yahapo omukwiita gumwe gwomutondi. Oyendji yomaakwiita yomutondi oya matuka okuka holeka omifudho oshoka kaya li ya tegelela, no ina ya mona ompito opo yiipopile.Konima sho kommanda gwetu a ti natu uke komeho, ololi ndjoka ya li inaayi thika moshilangela oya tameke okutuumba nondjembo yomashina ngiika ndjoka ya li kololi hoka.

Omutondi okwa li wo te tuumbu noomisile okuza mokamba yaKongo nonando ndhika odha li tadhi palutha. Molugodhi nduka omukwiita gwetu gumwe okwa ehamekelwamo mokugulu. Mwaanduka omutondi otwa li twe mu ehameke, sho twa dhipaga aakwiita ye oyendji, unene sho tuu a gwile mekelo lyetu inee shi tegelela.

Aakwiita ayehe mboka ya kondjele emanguluko oye shiningi  pa ku igandja,yamwe yomwaambaka oya sile mekondjo ndika , ya li ya kondjitha limwe lyomomatanga giita lya homatekwa nawa pamatati muumbugantu wAfrika. Onkene osha simana opo tu simanekeni eigandjo lyawo ndika tatu shi ningi pwaana ondjoolola oshoka mbaka oya kondjo okumangulula omuNamibia kehe noku mweetela emanguluko oshowo ombili ndjoka kehe gumwe ta tyapula nena.

LEAVE A REPLY

Please enter your comment!
Please enter your name here