Yalulilwa komaihumbato gaanona

0
192

EPATO-Aalongisikola poskola pEpato oya lulilwa komaihumbato gaaanona omawinayi posikola uunene tuu omalugodhi.

Omukuluntu posikola mpoka okwa lombwele Kundana  oshinima shika oshiwike sha ziko poshituthi shegandjo lyomapapa kaanasikola mboka ya longa nawa posikola mpoka.

Eliaser Iiyambo ngoka a yambukile pomukunda Olundjinda okwa ti ye okuna ohole yosikola ye onkulu komwenyo na okwa kambadhala opo a ninge ha gandja ooN$2 500 komumvo kehe kaanasikola mboka ya longa nawa posikola.

Okwa ti shika okuwete kutya otashi kwathele mokugandja omukumo kaanona posikola mpoka unene mboka inaya itula melongo.

“Ondina ohokwe nohole yosikola ndjika komwenyo na onda tokola opo kehe omumvo ndi kale handi gandja oondola N$2 500, maanasikola mboka yalonga nawa opo ya kale ya tsuwa omukumo,” Iiyambo ati ngaaka.

Iiyambo okwati woo kutya okwali a uvithwa nayi keihumbato nayi lyaanasikola mboka haya kondjithathana nokuwete kutya  ngele aanamukunda oya tameke oku tsa aanasikola omukumo okupitila mwaamboka ya longa nawa nena otashi kala shili nawa.

Mathe Christopher Musialela omukuluntusikola posikola mpoka okwali a pandula Iiyambo sho a gandja omukumo posikola mpoka ta ti nkene sha tameke momumvo 2012 okwali sha lundulula epito posikola mpoka.

“Osikola ndjika oyali hayi thigala unene ngele tashiya pepito lyuunona mboka wuli mondondo 10, ashike ngashingeyi uunona ohawu piti nawa oshoka owa tsuwa omukumo kuIiyambo ngoka haga ndja sha,” Musialela.

Musialela okwa ti kutya aanona mbaka oyena omaihumbato taga piyaganeke aalongi oshoka oye hole okukondja mokati kayo yene.

Omukuluntusikola okwa ti kutya osikola ndjika oya pumbwa ongulu yoocomputer noshowo ongulu yaalongi .

Ongulu moka muna aalongi ngashingeyi oyili ya thinana omanga ongulumambo kayi po.

Musialela okwa ti kutya elaka lyopambelewa nalyo wo otali nyengana posikola mpoka oshoka aanona ohaya popi ashike mOshiwambo.

Osikola ndjika oyili momukunda gwedhina Olundjinda, moshikandjolongo Okahao moshitopolwa shaMusati.

Osikola oyina ondondo oku tameka yotango sigo onti 10.

LEAVE A REPLY

Please enter your comment!
Please enter your name here