Young Chiefs natango kena omukwashilipaleki

0
269

OSHAKATI-Nando oyendji oya li ya tyapula esindano enene ndyoka lya adhikilwe kosipana yoshigwana oYoung Chiefs ya Shakati sho ya li ye shi tompola oku ya koliha yopombanda moshilongo, osipana ndjika natango ina yi mona ngoka te yi yambidhidha pashimaliwa.

Sho kuna owala omasiku omashona opo uudhano woliha yo MTC Namibian Premier League wu tameke oYoung Chiefs oyili natango tayi ligamene koombinga ne dhevi ngele ota ku ya zile ekwatho lyokashona hoka ta ya ka tamekitha nako onkalamwenyo ompe methigathano lyoosipana oonene moshilongo.

Daniel Shuumbwa gumwe gwomaadheuli yosipana ndjika okwa ti osipana oya pumbwa konyala N$ 300 000 opo yi vule okuya mela lyondjila yoliha yopombanda.

Okwa ti iimaliwa mbika oye yi pumbwa opo ya gwanithepo iipumbiwa yosipana ngaashi oondjambi dhaadhani, omalweendo, iizalomwa, omilalo nosho tuu.

Shuumbwa ota indile aanangesefa moshilongo opo ya tule oshimaliwa mosipana ndjika yili oyo awike yakalelapo oNooli yoshilongo moliha ndjika opo ku yambulwepo evi lyiimpungu oshoka olya kala konima yesiga ethimbo ele.

Okwa ti aamati oyi ilongekidha oku ya molugodhi lwoPremier League nando yeli kohi yompumbwe yoshimaliwa.

Shuumbwa ta tsikileko ta ti iimaliwa yimwe ota yi ka longithwa oku landa aadhani aape okuza koosipana dhilwe.

Ota ku tengenekwa kutya omudhani ena ombiliha oha kosho konyala N$ 8 000-00.

Ngele osipana ndjika ina yi mona ekwatho lyoshimaliwa meendelelo nena osipana ndjika ota yi ka tameka uudhano wayo yili pokati komwele nolumpangwa naantu yoko Nooli inaya ka tegelela iiyimati iiwanawa oshoka oosipana dhomuushimba odha manga dha pama na ohadhi kwashilipalekwa komahangano omanankondo pashimaliwa.

LEAVE A REPLY

Please enter your comment!
Please enter your name here