Young Chiefs onaka dhanena uudhano womegumbo koTsumeb …uupale koNooli wa nyayika, ita u vulu okudhanenwa…

0
202

OSHAKATI-Aalanduli yosipana yo Young Chiefs ndjoka tayi ka dhana uudhano wayo moliha yopombanda moshilongo pamwe itaya ka mona osipana yawo ta yi dhana mOshakati ngele okapale kokUukwangula okandopa okupondola ondondo ndjoka yapumbiwa kolutu lokulela oliha moshilongo.

Pauyelele mboka twa mono po, osipana ndjika oya tegelela osheendo shaataleli okuza koVenduka okuya ya konaakone okapale kopUukwangula ngele okeli pondondo tayi vulu okudhanenwa.

Okapale ko Indpendence Stadium ka Shakati okeli pondondo ya nyayika onkene ita ka vulu oku longithwa oku dhanenwa omaudhano goliha yopombanda moshilongo.

Ngele okapale kopUukwangula kakeli pondondo ndjoka yapumbiwa nena oYoung Chiefs oyina ashike oku kadhanena uudhano wawo koTsumeb oshoka oyo ashike ondoolopa yili popepi yina okapale keli pamuthika omwaanawa.

Omunambelewa gumwe gwopokapale kaShakati ngoka ali inaa hala okutumbulwa kedhina okwa li etu yakeleko kutya okapale kaShakati okeli ka ka kwatelwamo momutengenekwafaneko ashike sigo onena iilonga inayi tameka omunambelewa ta ti.

Oonkambadhala dhokumona omayamukulo kombinga yuupale mbuka uyali odhali dha huulile muunyengwi sigo Kundana tayi koshinyanyangidho.

Kakele kuupale wokudhanena oosipana dhokoNooli odha taalelwa komukundu guupale wuli pamuthika omwaanawa mpoka tadhi ningile omadhewo gawo na odhindji mwakwatelwa Young Chiefs  ohadhi longitha omahalandjandja momalukanda ngoka geli wo haga longithwa kiinamwenyo nokaantu yomomalukanda okwiiwatela uusiku.

Naashika omudheuli gwoYoung Chiefs okwa ti shika ohashi shunitha pevi omaudhano koNooli.

Oshi li sha yela kutya natango kapuna ngoka ahala oku kuthako oshinakugwanithwa shuupale koNooli.

Ngele ina puningwa sha kombinga yuupale nena ependulepo lyomaudhano koNooli ota li tsikile oku kala lya thigalapo.

 

LEAVE A REPLY

Please enter your comment!
Please enter your name here