Ambunda  a ningi ishewe enyakwa lyuuyuni

0
265

Windhoek-Paulus ‘The Rock’ Ambunda okwa ningi ishewe enyakwa lyopaigwana muudhano woongonyo sho a sindanapo olugodhi moka a li ta kondjele epaya lyondjundo yo Super Bantamweight yolutu lwoongonyo lwo International Boxing Organisation (IBO) Olyomakaya gapiti.

Ambunda okwa dhenge omukondjithi gwe a kindja omukwashigwana gwa Argentina niitsa konima yomadhingoloko 12 poshinyanga shaRamatex moVenduka.Oshinyanga shika osha li shuudha aaholi yuudhano woongonyo ongulohi ndjoka.Ambunda nomukondjithi gwe omuArgentina, Leandro Esperante ayehe oya li taya kondjo opo ya tale kutya olye ta ningi enyakwa mondjundo ndjoka oshoka mwaandjika kamwali we ngoka oye ena oshishani shuunyakwa mboka.

Ambunda, ngoka a ningile enyakwa lyoBantamweight molutu luudhano woongonyo lwedhina World Boxing Organisation (WBO) sho a dhengelemo enyakwa mondjundo ndjoka , Pungluang Sor Singyu mu Maalitsa 2013, noku kanitha epaya ndika sho a ka dhengwa kuTomoki Kameda,gwa Japan konima yoomwedhi ntano.

Ihe molweetho nduka Ambunda okwa li iilongekidha nawa molugodhi ndoka lwa hulile koongulasha dhoSoondaha sho ye a ulikwa enyakwa lyuuyuni mondjundo ndjika ompe konima yomadhingoloko omulongo nagaali gali taga pula aadhengingonyo mbaka omazigudhe nepupyu.

Omudhengingonyo Esperante naye okwa li iilongekidha nawa oshoka okwa li oye ta tip ii mokuumba oongonyo momadhingoloko gatano gopetameko.Medhingoloko etiyali  lyomwaangaka okwa li konyala a halutha aayambidhidhi ya Ambunda sho a li e mupepo ongonyo yimwe yomoombati naanguka okwa gwile pevi, shalongo okatenda ka dhengele , oshoka osha li tashi ulike kutya enyakwa olya li lyeehama kongonyo ndjoka.

Nando okwa li eehamekwa ngaaka Ambunda okwa li eshi pondola opo a thikamepo omanga omuhikihiiya omuSouth Africa Andile Matika inaa thika peyalulo etimulongo. Ambunda okwa ka kondja olugodhi luupenda okuza medhingoloko etitatu, ndele nee Esperante naye okwa tsikile oku mwiikanyuna nokwa kala te mu tala nawa.Oshizemo shuudhano mbuka osha ka uthwa kegandjo lyiitsa kaagandji yiitsa konima yomadhingoloko 12.

Aagandji  yiitsa yaali oya gandja olugodhi nduka ku Ambunda metokolo lyolutandu, omanga omugandji gwiitsa gumwe olugodhi okwe lu pe omuArgentina.

Iitsa oya li ya gandjwa ngaashi tashi landula  114-133, 114-115, 115-113, sho Ambunda eshi pondola oku kala komeho kashona ku Esperante niitsa nongeyi okwa ningi enyakwa epe mondjundo  ndjika kohi yolutu lwoongonyo lwo IBO.

Ambunda sho a popi konima yolugodhi okwa ti okwa li a uvaneke okuninga enyakwa ishewe olutiyali onkene okwa li a nyanyukwa sho a gwanithapo euvaneko ndika.

“Onda hala okusimaneka tatekulu ngoka a manene oondjenda nuumvo nesindano ndika, oshowo meme ngoka a kala omuyambidhidhi gwandje omathimbo agehe” osho a ti.

Uusiku owo tuu mboka omudhengingonyo gumwe omuNamibia, Jeremia Nakathila, okwa sindi  Paul Maxilana omu South Africa sho e mu dhenge yimwe nopevi medhingoloko lyotango lyolugodhi lwawo itaalu kondjele sha mondjundo yo International Junior Lightweight

Molugodhi olukwawo itaalu kondjele sha woo  mondjundo yo International Middleweight , Paulinus Paulus okwa dhengemo omukondjithi gwe kaali eshi  sho ta ningi medhingoloko lyotango nongonyo yimwe nopevi. Keith Karimbika omuZimbabwe okwa fa kaali eshi naanaa kutya okweendela shike.Olugodhi nduka olwa hulile ashike medhingoloko lyotango

Sacky “Izinyoka” Shikukutu ngoka a ningi ethimbo ele itaa dhenge oongonyo okwa li a galukile moringa nokusinda Limbani Masamba gwaMalawi niitsa molugodhi lwawo lwo International Welterweight lwomadhingoloko gahamano.

Walter Kautondokwa okwa sindi Reson Hobyani gwa South Africa nongonyo yimwe nopevi  mondjundo yo International Middleweight omanga Japhet Uutoni naye okwa sindi omukondjithi gwe Khanyakude Mukansi (SA) niitsa konima yomadhingoloko gahamano.

Molugodhi lwali talu kondjele epaya lyoIBO Africa Welterweight pokati ka Betuel ‘Tyson’ Ushona na Bongo Lipembo gokoDemocratic Republic of Congo (DRC), Ushona okwa dhengemo omukondjithi gwe niitsa momadhingoloko 12, moka aagandji yiitsa ayehe yatatu ya gandja olugodhi ku Ushona niitsa mbika 119-110, 118-110 noshowo 119-110.

Molugodhi lwondjundo yopaigwana yo lightweight pokati ka Paulus ‘The Hitman’ Moses na Sadiki Momba gwa  Tanzania, Moses okwa sindi omukondjithi gwe niitsa konima yomadhiingoloko gahetatu.

LEAVE A REPLY

Please enter your comment!
Please enter your name here