Namwater a pewa ombedhi mepato  lyokanala

0
328

OUTAPI-Omukuluntupitithi gwo NAMWATER, Omundohotola Vaino Shivute, okwa li a pewa uusama kaawiliki yomalelo gopahedhi nokaanafaalama yomoshitopolwa shOmusati kombinga yethaneko lyehangano lye okupata okanala hoka kaza ko Calueque-oku kOshakati.

Shivute okwa li a talelepo Outapi nelalakano okugandja ethaneko lyehangano lye kombinga yomapekaapeko ngoka tali ningi kombinga yokulongulula ondama Etaka/Olushandja popepi nOutapi.

Pahapu dhe ethaneko okupata okanala olya etwa molwashoka ohaka kuthapo iimaliwa oyindji uuna taka opalekwa oshowo uuna taka kalekwapo, oshikwawo okena ondilo molwashoka omeya ohaga kuthwamo inaashi pitikwa kaakwashigwana oshowo ekanitho lyoomwenyo dhaantu mboka haya sile mokanala uuna mbaka ya gwilemo.

Oohapu dha Shivute kadha li dha pandika kaakalimo yomoshigongi  shoka mboka ya li aawiliki yopahedhi, aanafaalama, aawiliki yiitopolwa oshowo aakwashigwana.

Oyendji oya gandja ombedhi ku NamWater kutya kena esimaneko oshoka okuna ko ashike nasho nokuhupitha oshimaliwa mbyoka ha longitha moku opaleka okanala ndele ina yalula uuwanawa mboka hawu monika kaakwashigwana uuna taya longitha omeya ngoka. Oshowo uuna iimuna yawo tayi nu omeya ngoka mokakanala hoka.

Oya thaneke kutya NamWater na ka etepo ethaneko limwe  ndyoka tali utha nkene  mbaka taya vulu okulongitha nawa  omeya ngoka haga ende mokanala haka.Oshowo okulongekidha nawa  egandjo lyomeya kaakalimo yomomikunda oshilongo ashihe.

“Owa hala oku pata okanala molwa ashike iiningwanima iishona yowala yo yaashi oyindji moka aantu yamwe ya kanitha oomwenyo dhawo?Nena ngele ongawo natu edhileni woo ondjila ndhoka hadhi kanitha oomwenyo dhaantu miiponga yiiyenditho” osho omunashipundi shelelo lyOmusati a , Tataati Simon Shileka a pula.

Omukwaniilwa gUukwaluudhi, Josia Shikongo Taapopi okwa thaneke kutya Namwater nepangelo naya lelepeke okanala  opo ka ye kiikandjohogololo yilwe momikunda mwii opo  omikunda ndhoka dha pumbwa omeya dhi vule okumona omeya. “Otuna okulelepeka okanala ndjika okuyi fala muule moohogolo nokoohambo hwi opo iimuna yetu oshowo iiyamakuti yi vule okunwa omeya gomokanala ndjika  ngaashi oondjamba otadhi vulu okunwa omeya ngaka,” osho a thaneke.

Nando Namwater okwa ti oha longitha oodola oomiliona hamano komumvo okuopaleka okanala haka omolwefundja oshowo eyonagulo , omupopyo nguka ogwa ekelwahi kaanashigongi  mboka yati omayalulo ngoka ogo iifundja yowala .  “Oomiliona hamano odhi thike poodola hamano momuntu komumvo, dho ndhika odhi thike poosenda ,50 komuntu momwedhi noshowo posenda yimwe momuntu mesiku maantu omiliona yimwe mboka haya mono uuwanawa shuukilila okuza mokanala haka, naashika otashi vulika kuNamwater,’ omayalulo ngaka oga gandjwa ku Horst Kaminsky, omunafaalama gwiihape ngoka ha longele iihape pOlushandja.

Elenga lyokOmbadja, Matias Walaula, okwa indile opo epangelo li tale omikalo okweeta omeya  okuza koonzo dhilwe ngaashi okuza komulonga gwa Kavango, gwa Zambezi naangoka gwa Range. Okwa pula kutya omolwashike, itaatu tungu uukanala owundji ngaashi haka oku etela aantu omeya moshilongo.?’

Momupopyo gwe pehulilo Ngoloneya gwOmusati Erginus Endjala okwa tseyitha kutya otapa ka dhikwa okakommittee  hoka taka kala kathikama  mwaayehe mboka ya gumwa koshinima shika okushanga omanyenyeto oshowo omathaneko agehe  kombinga yokupata okanala haka , opo ihe ngaka otaga ka tulwa momushangwa ngoka tagu ka tuminwa kUuministeli wUunamapya Omeya nOmakuti.

 

LEAVE A REPLY

Please enter your comment!
Please enter your name here