Omaishangitho ga gwedhwapo mOshikoto

0
221

OMUTHIYA – Omunambelewa omukuluntu mombelewa yomahogololo mOshikoto, Helena Nangolo- Namadhila okwali a tseyitha kutya nomoshitopolwa shaShikoto omwa unganekwa omaishangitho gomahogololo ga gwedhwapo.

Namadhila ndhino okwali edhi popi omwedhi gwayi pethimbo ali a tsakanene naaleli yoondondo dha yoolokathana mOshikoto. Oshigongi shono shali sha ningilwa moMuthiya oshali sha kalwa kookansela yiikandjohogololo ayihe yomOshikoto, aakuluntu yopolisi , aaleli yopamuthigululwakalo oshowo gamwe gomomahangano gopaumwene.

Oshigongi oshali shaningwa okugandja uuyelele kaaleli yo yaka gandje woo mbuka kaalelwa yawo. Namadhila okwali a yelitha kutya moshitopolwa shaShikoto omwa longekidhwa omaishangitho gomahogololo ngono ga tameke oshiwike shika ano okuza momasiku ga-5 sigo omomasiku 22 Aguste nuumvo.Omaishangitho ngaka otaga ningwa omolwomahogololo gaawiliki yiitopolwa oshowo omalelo giilando noodoloopa ngono taga ka kalako kuyele muNovomba.

“Omaishangitho ngano ga gwedhapo oga ningilwa aantu mboka yali inaaya gwanitha oomvula 18 sho omaishangitho gali ga ningwa omvula ya piti, mboka ya tembuka okuza kiikandjohogololo yilwe yayi kiikwawo oshowo ngoka woo ena okakalata ke komahogololo ka kana nenge ka teka, otwa tegelela aantu ayehe mbaka ya kale ya holoka pethimbo lyomaishangitho yo ya kale ya mona uukalata wawo womahogololo uupe,” Namadhila ta ti.

Ta gwedhapo kutya omaishangitho ngaka otaga ka ningilwa koosenda dhili 61 moshitopolwa ashihe shaShikoto, nokwa tegelelwa aantu ayehe mboka yaana uukalata womahogololo, ya longithe ompito ndjika yo yi imonene uukalata wawo  yo yaka kuthe ombinga momahogololo ngoka ga thaanekwa okukalako pehulilo lyomumvo nguka.

Namadhila ta indile ayehe mboka ta ye ya oku ishangitha ya etelele uumutse wawo woshilongo, onzapo yevalo nenge ngele okuna oombaapila yokuhinga eyi etelele, ta ti itaku ka shangithwa omuntu keenapo nande shimwe shomwaambika. Okwa indile opo aantu ya tameke okwiishangitha pomasiku gopetameko opo ya yande omikweyo omile komasiku ga hugunina yo yaa ka hupeko.

“ Aanambelewa yetu yomahogololo oyi ilongekidha moku gandja eyakulo ndika, notaya ka kala yeli pomahala gomaishangitho okuza otundi -8 yongulonene sigo otundi-7 komatango, nondi inekela otaya ka gandja eyakulo ewanawa ndyoka mwa pumbwa, aakalimo yomomudhingoloko gwaNiipa nayo otaya ki ishangilulitha uukalata womahogololo oshoka oshikandjohogololo Oniipa osha tendwa tashi kakala ondoolopa ngaashingeyi, kongeni omalandulathano ngoka gena omahala nomasiku gomaishangitho ngoka twapa ookansela yiikandjohogololo ayihe,” Namadhila ta tsikileko ngaaka.

LEAVE A REPLY

Please enter your comment!
Please enter your name here