Pohamba a pula oRuacana i yandje eyakulo

0
291

RUACANA – Omupresidente mukulu Hifikepunye Pohamba okwa pula ewiliko lodoolopa yaRuacana moshitukulwa shaMusati, li longe noudiinini li kale ewiliko liwa momalelo eedoolopa moshilongo.

Elelo lodoolopa yaRucana ola totwa po modula 2005, ola wanifa eedula 10. Poshivilo shedimbuluko lekalepo lelelo eli oule weedula 10  sha tyapulilwa poRuacana moshitukulwa shaMusati  exuliloshivike la djako Omupresidente mukulu, Pohamba okwa pula ovakomesho melelo lodoolopa yaRuacana va yakule oshiwana nawa.

Odoolopa yomaumbo e fike lwopeyuvi lwaapo oimwe yomomalelo 50 moshilongo a tulwa po kepangelo eshi oshilongo sha manguluka okuyakula oshiwana. Presidente nale Pohamba ta yelifa kutya, okudja pemanguluko loshilongo 1990, epangelo ola tula po omukalo opo pa totwe omalelo oitukulwa a kwashilipale kutya otaa yandje eyakulo tali hafifa ova yakulwa. Omupresidente nale Pohamba ta kumaida ewiliko li kwashilipaleke kutya, oshinakuwanifwa  shomawiliko oitukulwa moshilongo ashishe  a yandje eyakulo liwa koomuni ngaashi sha ufwa momulandu wexumifokomesho loshilongo.

Modoolopa yaRuacana mwa didilikwa ashike omusholondodo wovaningi vomaindilo omaumbo u li koshi yo-60 nande kamu na naanaa omhumbwe yedu, ewiliko ola tuwa omukumo li kwashilipale kutya modoolopa omwa longekidwa edu lokutunga eengeshefa, omwa andjanekwa omeva nolusheno,  opo ovalongifi voshimaliwa va tokole okulongifila oimaliwa yavo modoolopa nokuyambula po eliko loshilongo nolodoolopa ya Ruacana. Manga oshilongo inashi manguluka oRucana oimwe yomeedoolopa da li konima,ashike paife omwa tungwa omaumbo omaludi amwe okwa tungwa kehangano Build Together,   oimwe yomeedoolopa tadi endelele mokuyambuka po, oyo aike odoolopa moshikandjohoololo shaRuacana shina ovakalimo ve fike pomayuvi 27 000.

Odoolopa yaRuacana oimwe yomeedoolopa da lukwa moshitukulwa shaMusati Okahao, Oshikuku nOutapi oo u li oshilandopangelo shoshitukulwa shaMusati. Odoolopa yaRuacana oiyadi eemhito dokweeta po oshimaliwa molwa omutungilo wayo eshi i li popepi newo lomeva kombinga yokonooli. Omupresidente nale  Pohamba ota ti, elelo ngeenge ola eta po omafaneko omayambukepo mahanpu, nena otaa ka nana novanyasha ava va tembukila keedoolopa dakula va dule okweeta eemhito doilonga modoolopa ei tai dulu kunana ovatalelipo vahapu molwa oushitwe wayo.

LEAVE A REPLY

Please enter your comment!
Please enter your name here