Ta tidhwa megumbo koyana yomusamane

0
327

OIPAPAKANE – Omukalimo gomomukunda Oipapakane moshitopolwa shaHangwena kena ombili molwomahepeko te ga ningilwa koyana yomusamane.  Hileni Ndapunikwa Festus goomvula dhopokati okwali a holola uudhigu we mbono tati owa tameke konima sho omusamane gwe a mana oondjenda.

Festus okwa hokolola kutya oyali ya hokana nomusamane gwe   Natanael Kalwenya, kaamangestrata oshowo pangerki mo 2012. “ Otwa kala tuli megumbo lyetu moka konima sho twa hokana, twa tameke ku opaleka egumbo lyetu oshowo okulanda iimuna yetu yomegumbo, otwa kala tuna ombili no ihatu ngwandjulathana, mo 2014 Kalunga okwali a zimbula omuholike gwandje noku mu fala muukwaaluhe,” Festus ta ti ngaaka.

Ta gwedhapo kutya iinima mbika oyali ya tameke konima sho omusamane gwe a hulitha. Aanona yomusamane mboka yena yina iili oyali ya tokola opo ya tidhe Festus megumbo ngoka a hokanwa kuhe, molwomatompelo  ngoka kutya anuwa,oshoka nguka kena okaana nomusamane nonande ya hokana kena uuthemba wokukala megumbo moka oshoka inaya mona uunona nahe.

“Momasiku 23 gaJuli oyana mbano yomusamane gwandje ngoka a hulako oyali ya fikepo egumbo lyandje ,ondunda yandje yokupungula oyali yeyi fikepo yo taya kumunapo omakuma gandje gomegumbo anuwa iinima yahe, oshinima shino osha kala tashi ehamekendje unene oshoka oya kala noku umbandje omalaka omawinayi, oya kala noku tidhandjemo, oyali ya ningi egumbo lyawo kohulo yepya konima sho ya fikepo egumbo lyandje noku thigandje pomutenya,” Festus ta popi ngaaka.

Okwali a tokola opo a ka lopote shoka sha ningwapo ku mwene gwomukunda gwawo Oipapakane, ngono ali eya nosheendo she a kwashilipaleke ngele shoka ta lombwelwa osho shili tuu.  Ta ti oshinima shino keshi uvitile nande ombili nota pula a kwathelwe koshigwana.

Mwene gwomukunda Oipapakane, Natanael Weyulu kepulo ngele ayihe mbino okweyi uva okwa holola kutya ayihe ya popiwa ku Festus oyo shili nokwa kala ta hepekwa koyana yomusamane gwe sho a mana oondjenda. Weyulu tati oyali yi ithana ando iihokolola mehuliloshiwike ndika lya piti ashike inaya holoka.

“ Okwali owala kweya omwana gomusamane gumwe ngono ali ati anuwa iihokolola itayi vulu okuya komeho oshoka oye awike elipo, otwali twa uvathana opo ngele inaya hala ya kale megumbo na Festus ando ya topole epya, nokonima sho ya ka topola epya oya kala inaaya halelamo Festus ye mu tidhamo noku fikapo oondunda dhe anuwa na zemo oshoka kena okaana nomusamane,” Weyulu ta ti ngaaka.

Mwene gomukunda oye tuu nguka okwali ati uunona mboka ka wuna uuthemba woku tidha Festus megumbo oshoka okwa hokanwa ena onzapo yehokano. Ta ti otaya kambadhala ya longe ngaashi tashi vulika ya tule ayihe kolutenda yo ya kandulepo omukundu nguka.  Ta gwedhapo kutya otaka kala a ithana iihokolola mbala yo ya adhe ehulilo nenge eyi tume kouhamba.

Gabriel Kalwenya ngono eli gumwe gomoyana yomusamane gwaFestus yo oyo taya tidhamo Festus noku fikapo egumbo lye okwali a tindi oku yelitha shoka sha ningwapo ta ti omalundilo owala nonande egumbo ndyoka mwa fikwa shili oondunda kuyo.

 

LEAVE A REPLY

Please enter your comment!
Please enter your name here