Urikhob ota dhana nawa moThailand

0
231

Windhoek –Omudhani gwondapo gwokomeho mospana yoBrave Warriors, Sadney Urikhob okwa kala oye onkundana onene moliha yopombanda moThailand ehuliloshiwike lyayi molwashoka okwa li a dhana nawa nokwa kumike ospana ye yo Saraburi ndjoka ya dhana shi thike pamwe okoola  2-2 nospana yo Thai Port Osoondaha ya piti.

Omunamimvo  22-ina hepeka nando ethimbo sho a tameke lwotango uudhano  mospana ye yo Saraburi shoo ye a tulamo tango okoola mominute 23 konima yetameko lyuudhano . Shika okwe shi ningi moonkambadhala dhokudhana oye awike  sho a pitilile aagameni nenge aadhani yokonima ya Thai Port ye li yatatu omanga inaa thangelamo etanga ndyoka monete.

Okunyanyukwa kwospana ya Saraburi okwa li okufupi oshoka omudhani Lee Ho gwospana ya Thai Port okwa tulamo okoola opo oospana ndhika odha ka kala dhi thike pamwe yimwe muyimwe mominute omilongo 50. Ihe okudhana kwa Urikhob oshowo ondapo ye oya li oshinima oshidhigu kaadhani ya Port sho shika osho sha fala mpoka kutya Suradetch Thongchai okwa tulamo okoola nongeyi ospana yawo oya kala ishewe komeho mominute 69 dhuudhano.

Port, okwe shi pondola ishewe okutulamo okoola ontiyali opo oospana ndhika odha ka hulitha uudhano kehe yimwe yi  na ookoola 2-2 sho Wuttichai Tathong gwa Thai Port a thangelemo etanga komunute gwa hugunina.

Molwuudhano we mbuka uuwanawa Urikhob okwiimonene ehala moliha ya Thai  mospana yokoshiwike.  Omakwatathano paiintanet goTwitter no Facebook oga li taga kundathana kombinga yondapo ya Urikhob oshowo uunyakwa we wokudhana nawa etanga okupita po paakondjithi ye.

Larry Horaeb  a lalekwa ku Amazulu

Moonkundana dhilwe pondje yoongamaba omudhani nale gwo Brave Warriors gwokonima Larry Horaeb okwa lalekwa miilonga yokudhanena ospana ya South Africa , Amazulu. Ospana ndjika oya li ya tseyitha kutya oya mangulula noku laleka aadhani yeli yahamano mwaamboka mwa kwatelwa Horaeb .

Horaeb okwa joinine AmaZulu petameko lyomumvo guudhano gwo  2013/14 a ziilile koRamblers FC.Okwa li gumwe gwaaNamibia yatatu mboka ya li haya dhanene Amazulu momimvo 2013/14  yalwe yaali oyo Sadney Urikhob na Willem Mwedihanga.

Mumbaka yatatu Mwedihanga oye a li te shi enditha nawa  mo Amazulu, ndele na ye okwa li a thigipo ospana ndjoka molwashoka ndjika oya shunithwa pevi sho ya yi ko National First Division ya South Africa. Mwedihanga oha dhanene ngashingeyi ospana yoUniversiti yaPretoria (AmaTuks),hono a joina omuNamibia omukwawo, Ronald Ketjijere.

 

LEAVE A REPLY

Please enter your comment!
Please enter your name here