Namibia okuuka pombanda meyalulo lya FIFA nomahala gatatu

0
205

WINDHOEK- Namibia okwa yi pombanda nomahala gatatu mokuyalulwa momusholondondo gwiilongo mbyoka hayi dhana etanga lyokoompadhi lyolutu oluwiliki lwetanga muuyuni halu ithanwa FIFA. Elunduluko ndika olya nyolwa moshikundaneki sholutu nduka shomwedhi nguka.

Pondondo ndjoka onti 111 muuyuni Namibia okwe ya po konima yokusindana po uudhano wo COSAFA Cup mu Mai nuumvo oshowo sho a dhenge Zambia methigathano lyaCHAN, nonando a dhengwa ku Zambia moLuska nokuNiger momathigathano goCHAN naAFCON. Namibia okwa mono iitsa ya gwana oku mu tula pehala eti 32 momusholondondo gwAfrica oshowo pehala eti 111 momusholondondo gwiilongo iidhanitanga lyokoompadhi muuyuni.Moomwedhi dha ziko Namibia okwa li pehala eti 114 muuyuni omanga moAfrica okwa li 33 pahapu dha FIFA.

Argentina osho oshilongo oshidhanitanga shili pehala lyotango muuyuni sha landulwa ku Belgium na Ndowishi pehala etiyali netitatu. Omanga muAfrica  Algeria oye eli pehala lyotango eta landulwa ku Cote d’Ivoire.

Namibia okwa li pehala etimilongo 68 omumvo 1998 konima sho a li eshi pondola okuya kethigathano lyekopi lyiigwana yAfrica koBurkina Faso omumvo ngoka.

Eholoko muudhano mbuka womanyakwa gAfrica olyo lya li lyotango lyaNamibia moAFCON, shika osha fala keinyengo lyaadhani ya Namibia oku ka dhanena oospana dhimwe ngaashi ndhoka miilongo yilwe.Ondondo yopeviivii ndjoka  Namibia a li a pewa momusholondondo nguka oondjoka yokukala pehala eti 161 momumvo 2005.

LEAVE A REPLY

Please enter your comment!
Please enter your name here