‘Ngame onda valululwa ngashingeyi’

0
400

WINDHOEK- “Kandishiwo naanaa kutya oshaningwa ngiini.Oshoka kehe shimwe oshaningwa mepathimo lyeho.Otwa kala nuupyakadhi mekwatathano lyetu.” Ndele nee kashishi shoshili kutya ngame onda pitile mekende okuya mondunda ye ngaashi sha li sha kundanekwa miikundaneki,” niitya mbika omunandholongo Gabriel Johannes Petrus okwa tameke ehokololo kombinga yesiku ndyoka a li a zimine kutya okwa dhipaga omukudhona gwe nale Tuwilika Elizabeth Ekandjo sho e mu pondo mesiku 6 lyaJuni 2012.

Pethimbo lyoshiningwanima shika Ekandjo omunamimvo 21 okwa li omwiilongi momumvo omutine moshilongwa sho Information Technology mo Polytechnic ya Namibia.Omwiilongo nguka a zile moElim moshitopolwa Oshana okwa li hiilongo nawa na okwa li a pewa iimaliwa yokwiilongitha mbyoka inaa pumbwa okushunitha. Edhipago lye lyuudhudhu olya li lya gumu oshilongo ashihe, nehololo lyomadhiladhilo lya ningilwe moVenduka aahololimadhiladhilo oya indilile ompangu opo yi gandje egeelo edhigu kokutya lyomimvo odhindji mondjedhililo.

Tse otwa mono ompito ya pumba okutalelapo Endiki lyezulonkalo moVenduka, twa talelepo oshitopolwa oshitiheyal moka mwa edhililwa aapogoli aakukutu naadhigu mboka ye li metonatelo lyashigako molwashok mbaka oyo oshiponga. Petrus omunamimvo 35 oku li pamwe naanandholongo ooyakwawo ngaashi Gavin Beukes, ngoka ta longele egeelo lyomimvo 84. Gavin nomumwayinamati, Sylvester, oya pelwe ondjo muNovomba 2011 molwokudhipaga aantu yahetatu pofaalama Kareeboomvloer, ndjoka yili pokati kaRehoboth naKalkrand. Aanandholongo yalwe moshitopolwa shoka oya kwatelamo Fanuel Festus Shipanga, ta longele ondholongo yomimvo 46 omolwedhipago li nyanyalitha oshowo omunandholongo Ralph Mzuvukile Mtshibe, ngoka a geelwa molwekwatokoonkondo.

“Ngame onda valululwa ngashingeyi,” Petrus, omwanamati gwomunangeshefa omunedhina moNamibia, osho a popi nomutono taguulike okuuva nayi molwoshilonga shoka. Okwa popi omanga a kuutumba nawa meshofa lyomombelewa ya Kommissiona gumwe gwondholongo. Aanambelewa yondholongo oya longekidha opo oonkundathana dhi ningilwe mombelewa yomutonateli gumwe gwondholongo omolwegameno lyetu. Opwa li oshiningwanima shimwe konyala okathimbo okafupi sho opo ashike twa thiki mondholongo , sho omutonateli gwondholongo a zipo ashike kashona putse omunandholongo gumwe okwa tilitha omuniilonga mukwetu Selma Neshiko, omutoolinkundana gwa New Era Time Out desk, ngoka tweende pamwe naye oku ka shanga ehokololo kombinga yonkalamwenyo mondholongo.

Nando ongaaka tse otwa tsikile noonkundathana dhetu naanandholongo mwakwatelwa Beukes, Shipanga na Mtshibe – mboka ayehe ya nyenyeta kombinga yiikulya mondholongo anuwa yaana omulyo, aanandholongo yaana oongaku, aanambelewa mondholongo yaanomikalo oshowo yo ongo aanandholongo yaana sho haya longo. “Shoka ashike tse hatu ningi okulya nokukuutumba pomutenya,” osho mbaka ya ti.

Petrus okwa nyenyeta kutya egeelo lye mondholongo edhigu unene nokwa ulike okuuva nayi kwe sho ompangu ya tindi okupulakena eindilo lye opo andola komimvo dhegeelo lye ku kuthwe dhimwe.

Manga ayehe inaa ya ulika okuuvila nayi omapogolo gawo, Petrus okwa ti ye okuuvitile nayi eyono lye. Ye kuuvite nande uuntsa kiilonga mbyoka a longa, a gwedhapo a ti ye okwa gandjele ombili kofamili ya nakusa.

Ndele nee , Petrus okwa henuka okuhokolola kondandalunde kutya oshike shaningilwepo mesiku ndyoka mu Juni 2012 molukanda lwa Khomasdal sha Venduka ongula pokati kotundi 02:00 notundi 04:00.

Ompangu oya uvu kutya Petrus okwa dhipaga Ekandjo ngoka a li ta kambadhala okuhulithapo ekwatathano lyohole yawo.

Sho Petrus a pulwa ishewe niishewe[okanaku] kombinga yaashika okwa ti ye kehole okudhiladhila onakuziwa  oshoka ndjika otayi mu alula unene nenge otayi muuvitha nayi noonkondo. “Ngele omuntu oto dhiladhila kombinga yoshinima unene  oto iyetele uupyakadhi. Oshiwanawa okwetha onakuziwa yi kale ngaaka noku taalela onakuyiwa okutala kutya otayi eta shike,” osho a ti.

“Ndhoka omimvo odhindji tandi kala mondholongo. Kalunga oye awike eshishi kutya otandi ka zamo nenge ahawe.Otandi mu galikana a silendjohenda.Onda hala Kalunga a gume omitima dhaawiliki yetu opo yetu pe ompito ishewe.Kalunga na ye ohape aashitwa ompito oku itedhulula,” osho omulumentu nguka omushona apopile momayulu konima yokupulwa ngele okuna etegameno lyokumangululwamo mondholongo.

Petrus nayakwawo moshitopolwa oshitiheyali mboka taya longele omageelo gethimbo ele otwa kundathana nayo uule wootundi ne kombinga yomashongo  oshowo shoka ya tegelela omanga yo yeli mondholongo.

Petrus ngoka okuyeleka noonkwatwa oonkwawo a popi ashike uuna a popiwa naye okwa kala ethimbo olindji ta komona komutse okuzimina naashoka sha nyenyetwa kuyakwawo.

Mompangu Petrus okwa zimine kutya okwa dhipaga omukadhona gwe nale petameko lyiihokolola ye mOmpangu yOpombanda ya Venduka.Okwa zimine ashihe shoka shinasha nedhipago nokwiipatana ashike elundilo kutya okwa li a kwata Erica Embashu ombambyona, Embashu okwa li halala mondunda yimwe na nakusa Ekandjo pethimbo nguka a dhipagwa.

Petrus okwa li a kambadhala okwiidhipaga konima yoku dhipaga Ekandjo.Ihe omukwanezimo gwe gumwe ngoka a li a hokolele oshinima shika okwe mu itaalitha, opo kiidhipage ndele a ka lopote shika kopolisi.

Moonkundathana dhetu, Petrus okwa hala okupopya konkalo yawo moshitopolwa shawo, moka a ti kamuna iinyangadhalwa oyindji yezulonkalo, okwa ti ye okwiishangitha no NAMCOL niilongwa mbyoka ohayi mu kaleke iipyakidhila.

“Otandi ka shanga Ondjokonona Momaandaha,” Petrus osho a ti ta pampadhala omambo ge genasha nOmbiibeli.Sho a pulwa kutya otiilongele shike , sho pakutala pethimbo ta ka zamo mondholongo otaka aadhika omulumentu omukokele , omunangeshefa nale okwa yamukula kutya “ngele onda mono ompito yokuzamo  otandi kala ndina onzapo yasha”.

Petrus okwa ti otashi ende nawa neilongo lye. “Katuna mo aalongi muka. Ohatu ilongo kutse yene naashika oshidhigu.Oshali tashi kala oshipu ngele andola otwa li tuna omulongi ngoka tetu kwatha opo tu uveko mpoka tatu nyengwa,” osho a kommenda. Kakele koNAMCOL , Petrus okwa mona onzapo yeilongo lyoMbiibeli ethimbo ndyoka a kala mondjedhililo sigo oompaka.

“Ngame otandi ilongele odiploma montseyo yOmbiibeli,” osho a gwedhapo. Ihe shoka hashi kaleke Petrus tadhiladhila nawa nokunetegameno nonando ompito ye yoku kala ishewe omulumentu a manguluka oya fa yaapo, osho”Elongelokalunga ndyoka hatu ningilwa muka ohali tu kwatha shili. Itashi ti kutya uuna wa yona ouna oku ekelwahi,” osho he yaanona yatatu a popi.

Omutoolinkundana nguka okwe mu tala momeho nokupula kutya oshike naanaa ta yuulukwa muuyuni wopondje yomakuma gondjedhililo. “Otandi yuulukwa ofamili yandje naamwandje. Otandi indile epangelo li tale iipotha yetu noku tu pa uuthemba opo tu indile ethimbo lyomageelo getu li shonopekwe,” osho omulumentu hapopile pevi a thaneke.

LEAVE A REPLY

Please enter your comment!
Please enter your name here