Ombelewa yUukashikekookantu yapu no tayi ka patululwa mbala

0
347

OKATYALI –  Ngaashi omathaneko gali ga ningwa omumvo gwa piti opo moshikandjohogololo Okatyali mu kale mwa tungwa ombelewa yUuministeli wuukwashikekookantu , omathaneko ogali ga tulwa miilonga nombelewa oyali ya tameke okutungwa pehulilo lyo 2014.

Kansela gwoshikandjohogololo Okatyali  moshitopolwa shaShana Joseph Mupetami okwali a yelitha kuyele oshiwike shika mokutseyitha kutya limwe lyomomalalakano ngoka yo taya lalakanene moshikandjohogololo olyaadha esindano. Mupetami ta ti ombelewa ndjika oyali ya  thanekwa kaanambelewa yombelewa yUuministeli wUukashikekookantu moshilandopangelo shEvi lyOmapenda.

Omunambelewa mUuministeli wUukashikekookantu kombelewa onene kOvenduka, Shivute Iindongo mEtiyali lyoshiwike shika okwali a talelepo ombelewa ndjika ya tungwa pOkatyali nokwali a kwashilipaleke kutya etungo olyapwa okutungwa no tali ka kala lya patululwa pambelewa petameko lyomwedhi tuuka nuumvo.

Kansela Mupetami okwali a ti pethimbo ndika ombelewa oya pwa okutungwa. “ Ombelewa ndjika oyina oombelewa dhili ndatu mono mwa kwatelwa ombelewa ndjono tayi kala omuhungimwenyo, ombelewa yokugandja uuyelele oshowo eshangitho lyoothigwa, nombelewa yomahumokomeho moshikandjohogololo, otwa tegelela uuwanawa owundji tawu kala weya moshikandjohogololo shetu notwi ilongekidha okugandja omayakulo agehe gopantu,” Mupetami ta ti ngaaka,

Omunambelewa  mombelewa yoothigwa pOkatyali, Malakia Nehale okwati okwa pandula epangelo sho lya thaneke mOkatyali mu tungwe ombelewa oyo tuu ndjika. “ Otwa kala hatu yakulile aakwashigwana mboka taya shangitha uunona wawo wuuthigwa mombelewa ndjoka otse yene aakwashigwana tweyi thikamithapo, notwa kala hatu longelemo ihaatu futu nande osha, ondu uvite etumba sho ombelewa yetu yapu,” Nehale ta ti ngaaka.

Kansela okwa holola kutya oyi ipyakidhila noku eta omahumokomeho moshikandjohogololo shawo mono tati ngaashingeyi otamu tungwa etungo lyuuministeli wUunamapya shinasha negameno lyiihwa oshowo omakuti ndjono tayi kala tayi gandja omayakulo kaakwashigwana yopomudhingoloko. Mupetami ta tsikileko kutya okwi ilongekidha ku gandja omayakulo ngaashi tashi vulika ye a hedhithe uuwanawa koshigwana shoka shemu hogolola.

Ombelewa ndjino ya tungwa pOkatyali oyo yo tango tayi tungwa pamuthika gwiikandjohogololo moshitopolwa shaShana, molwasho haya longo nuudhiginini.

LEAVE A REPLY

Please enter your comment!
Please enter your name here