Ondungethaneko yoku tunga ongeleka ompe mOnayena yayi miilonga

0
377

ONAYENA – Petameko lyomvula ndjika sho Omupevi Peresidende Omundohotola Nicky Iiyambo ali a talelepo egongalo lyaandjawo Onayena , okwali a eta ethaneko opo ongeleka oyo tuu ndjoka yi tulwe omawawa noku tanununwamo nenge pu tungwe ongeleka ompe ndjono tayi kala tayi gwanene aakwanegongalo ayehe.

Omusita gwegongalo Onayena, Nikanor Shuukwanyama okwa hokolola kutya oyali ya kuutumba nokakomitiye komatungo megongalo momasiku 26 Juli mono yali yi ikundu kombinga yetungo lyongeleka yawo ndyoka ekulu, oshowo yilwe yomiiyetwapo ya pamba egongalo. Aakwanegongali oyali ya gongala mOsoondaha ya ziko sho kwali kwa ningwa oshigongigongalo shopaulumompumbwe, yo aakwanegongalo ya kale ya tseyithilwa mbala omathaneko ngoka gokutunga ongeleka ompe.

“Otwa kala tuna ondungethaneko ygongalo twa kala twa hala nokuhalelela ando tu opalekulule ongeleka yetu moka hatu uvile nenge tu tunge ongeleka yimwe ompe, omathaneko ogali gayi miilonga nokangundumutima hano okali ka thaaneke opo ku kale kwa tungwa ongeleka yimwe ompe ndjono tayi kala pamuthika gopashinanena,” Omusita Shuukwanyama ta ti.

Tate Justus Haikali Omunashipundi gokangundu komatungo megongalo Onayena okwali eshi yelitha kutya oyali ya thaneke opo mOnayena mu tungwe ongeleka ompe molwaashoka ongeleka ndjoka yena ngaashingeyi oyina omisa odhindji no hayi loko shinene, no yena uumbanda kutya pamwe otayi ka gwapo monakuyiwa, sho itaya popile okuyi opalekulula oshoka ohashi vulika etungo li ka tsikile tali ningi omisa.

Aakwanegongalo oyali ya zimine noku koleka opo ku tungwe ongelaka ompe. “Otuna elalakano opo tu kale twa tunga ongeleka ompe mbala oshoka egongalo lyetu olyo yina yomagongalo agehe geli moshitayi shaMandongo, na omo mwa kunwa ompa yotango yevaangeli ndyoka lya taandele nokuya nuuyuni auhe moshilongo shika, notwa hala etungo lya tungwa pamuthika omwaanawa nopashinanena,” Aakwanegongalo ta yati ngaaka.

“ Omayele gOmuwa ogetu kwatha opo tu adhe etokolo lyahugunina tu tunge oteempeli ye ndjono tayi gwanene aakwanegongalo ayehe sho tetu lombwele pa Mateus kutya  Ka kuna ngoka ta andeke onguwo onkulu noshaando oshipe, onkee twa mono kutya oshoopala ngele tatu tungu owala ongeleka ompe tse tu gandje omayakulo kaakwanegongalo ayehe mboka yega pumbwa,” Shuukwanyama ta gwedhapo ngaaka.

Omusita gwegongalo ta ti oyena einekelo maakwanegongalo oshowo mookuume kegongalo no yena eitaalo itaali funga kutya ongeleka ompe otayi vulika. Omupevi Peresidende Iyambo pethimbo ali a talelepo egongalo noku eta ethaneko ya tunge ongeleka ompe okwali woo a gandja oshimaliwa shooN$20 000.00 , opo ku tamekithwe etungo lyongeleka ndjoka ompe. Aakwanegongalo mbono yali ya holoka oya koleke ethaneko noya holola enyanyu lyawo.

 

 

LEAVE A REPLY

Please enter your comment!
Please enter your name here