Ovalumenhu va kundafana nghene vena okukeelela omahepeko.

0
288

LÜDERITZ – Ovalumenhu mongerki ya ELCIN mOshitayi sha Rosh Pinah moshitopolwa sha //Kharas ovayemba omadipao oo taa ningwa kovalumenhu moshilongo, moku dipaa ovakainhu oshoyo okulidipaya voovene konima yaasho.

Johannes Shikongo adja keongalo la Bethel kOranjemund moshipopiwa shaye osho a yandja moshoongalele shovalumenhu vomoshitayi sha Rosh Pinah , vali vaongala meongalo la Eben Ezer mo Lüderitz ehulilo shivike olo twadja, okwa kumaida ovalumenhu vakale ovatiliKalunga opo va kale ovalumenhu vena elandulafano moshiwana.

Ovalumenhu vakale vena onhele yoku xungila momaumbo , opo vamone omhito yo ku pukulula omaludalo avo. Momhito yatya ngaha omo oovene vomaumbo tava mono kutya omaludalo avo apa okwa puka, naa pewe ehandukilo lili mondjila, moo omo yoo tava mono kutya omaludalo avo okuli mondjila, no kwe li longela okupandulwa. Momhito yatya ngaha omo yoo ovadalwa tava mono omhito opo vapule omayele kovadali vavo.

Moshipopiwa shaye Shikongo okwa tumbula kutya ovakainhu ova Namibia ova pumbwa okuli fimaneka , nokufimaneka yoo ovalumenhu vavo, opo ashike  taku dulu okuyepwa ominyonena odo tadi ningilwa ovakainhu moshilongo. Ta ti ominyonena noiponga ihapu itai holoka ngee opena efimanekafano.

Okwa popya yoo kombinga yovalumenhu novakainhu ovo hava kufa ondjila ihupi okukala pamwe onga omulumenhu nomukainhu,” Okuli tula kumwe nyeevene, oshafa ashike wahanga onghoshi yaakama ndele to tulamo omutwe woye mokanya kayo. Mokanya konghoshi ihamu alukasha.” Osho Shikongo atumbula. Ovalumenhu moshitayi sha Rosh Pinah ova kundafana moule wanghene kuna oku keelelwa oiponga aishe oyo hai dulu oku etwa kovalumenhu. “ Oku keelela okudule okupanga”.

Elifas Kadhikwa  omuwiliki omutivali meongalo la Eben Ezer nokuli mewilikongudu loshitayi sha Rosh Pinah moshimhungulonga shovalumenhu, okwa tumbula kutya oshoongalele shovalumenhu osha enda nawa, nonande omaongalo avali inaafika, omaongalo atatu oo ali a ongala okwa kundafana sha ta shi tungu ovalumenhu moshitayi.

Omaongalo oo ali a ongala Eben Ezer lomo Lüderitz, Bethel wokOranjemund oshoyo Mesias woko Rosh Pinah. Epandela lovalumenhu ola findanwapo kovalumenhu vo keongalo la Bethel kOranjemund, omanga Eben Ezer mo Lüderitz a mona ekopi.

 

LEAVE A REPLY

Please enter your comment!
Please enter your name here