Urikhob, ote sheenditha nawa muudhano

0
273

+Windhoek –Omudhani gwokomeho mospana yopashigwana ya Namibia, Brave Warriors, Sadney Urikhob ota tsikile okukala omugandji gwoonkundana muudhano woliha yopombanda ya Thailand omolwokutulamo ookoola kwe.

Urikhob ngoka ha dhana ta endelele okwe shi pondola ishewe ehuliloshiwike lyapiti okutulamo okoola sho ospana ye Saraburi ya li ya dhana naandjoka yoSuphanburi noku yi dhenga okoola yimwe monola.

Omudhani gwaNamibia nguka omugundjuka okwa kumike ospana ye ndjika Olyomakya gayi mesindano lyayo nokoola 1-0 sho ishewe a ningi oonkambadhala dhopaumwene mokuthangelamo etanga ndyoka a pewa okuza mokati kokapale nokwe shi pondola okuhenuka aadhani yaali yokonima omanga etanga ineeli thangela mokoola eli nana noonkondo adhihe.

Okoola ndjoka Urikhob a thangele monete yaa kondjithi yawo oyo ontiyali okuza tuu nkene a tamekele okudhanena ospana ya Saraburi moliha ya Thailand.

Urikhob, ngoka omimvo dha piti a ningi gumwe gwaadhani aanuunongo mokuthanga etanga moNamibia okwa talikako ongo gumwe gwaadhani ye hokiwe no ya hokitha uuna taya dhana etanga moliha hayi kwashilipalekwa kehangano lyoToyota mo Thailand.Okudhana kwe nawa huka otaku pandulilwa omukalo gwe ngoka ha longitha okutanauna aadhani yokonima noku ya thigapo ngomondapo oshowo omukalo gwe omwaanawa gwokukondolola etanga uuna eli pewa kaadhani ooyakwawo.

Moshilongo shUukwaniilwa sha Thailand omudhani gwomokati nale gwospana yo Black Africa, Awilo Stephanus na ye okwa kwathele ospana ye yedhina Krabi okusindana nookoola 2-1 sho ndjika ya dhengemo ospana yo Trat, sho omuNamibia  a tulamo okoola ye yotango ongo omudhani gwopaigwana ta dhanene Krabi ospana yi li moliha yotango  moshilongo shoka.

Stephanus, ha dhanene ospana yoKrabi pamwe na Tangeni Shipahu ngoka a joina ndjika okuza kospana yoArmy United, okwa li a tulamo okoola yotango yospana ye ndjika mominute omilongo 77 omanga omudhani omukwawo Laby Kassiaty okwa gwedhako okoola ontiyali mominute omilongo 87 noku fala uudhano wu kale nospana yawo yili komeho nokoola 2-0.Ndele nee ospana ya Trat oya kala tayi ponokele woo okuuka komeho  nomominute dha hugunina oye ke shi pondola okutulamo okoola yimwe sho, Borche Manevski a thangele monete nuudhano mbuka owa hulile mospana yimwe yi na ookoola 2-1.

Omudhani gwomokati mospana yoBrave Warriors okwa gandjwa molupe lwokuhehelwa kospana  ndjoka uule woomwedhi hamano okuza koBlack Africa. Omanga Shipahu ngoka a li tadhanene ospana Osotspa Saraburi okwa li  gandjwa oku kadhanena ospana yo Army United, hoka a li a dhana iikando yili 12 omanga inaa gandjwapo ishewe kospana yo Krabi FC uule woomwedhi omulongo na mbali.Mospana ndjika Shipahu  okwa tsakanene nomuNamibia omukwawo Stephanus.

Shipahu okwa li nale ha dhanene ospana yo Tigers moNamibia omanga inaa tembuka oku ka dhanena ospana yomoliha ya South Africa  yo Amazulu. Okwa li a yi kospana ya Thailand yedhina Osotspa Saraburi omumvo 2012.

 

LEAVE A REPLY

Please enter your comment!
Please enter your name here