Ya ligamena koshigwana molwompumbwe yosheenditho shoskola

0
491

OMUNTELE – Osikola yaReverend Juuso  Shikongo ndjoka ya totelwepo momvula yo 2011, noyina ondondo okuza po 8sigo o-12 oshowo aalongi yeli 17 naanaskola yeli 385 oya pumbwa osheenditho shoskola. Enongelo ndika olili mewiliko lyOmukuluntuskola, Pinehas Ekongo.

RJS oya konekiwa hayi piti nawa moshitopolwa shaShikoto okuza tuu sho ya totwapo mo-2011. Enongelo ndika otali adhika moshikandjohogololo Omuntele nolya lukilwa  ngoka ali nale Omusitagongalo megongalo Omuntele moomvula dhapiti ,Reverend Juuso Shikongo.

Metine lyoshiwike sha ziko Omukuluntuskola pamwe nomulongi go Agriculture oshowo aanona yomondondo ontihetatu (8), oya li yi itsuwa ookilometa oonshona okuza posikola nohauto yomukuluntuskola ya papa egulu molwoshiviha oshoka aanona oyali ya londa mobaki oshowo yalwe ya londa mokatemba molwa ompumbwe yosheenditho. Aanaskola mbaka oyali ta ya yi molweendoilongo pu limwe  lyomomahala geli momudhingoloko Omuntele.

Omukuluntuskola  Ekongo kepulo kutya omolwashike ya tokola opo  yaye nuunona wumwe wuli mokatemba okwali a hokolola kutya  halyo ando lyali elalakano ashike oya nyengwa owala kosheenditho shoshene. “ Ohashi kala oshiwanawa noshiwinayi oku etapo omadhiladhilo geli mondjila nogu uka, nondi wete kutya osha puka oku tula uunona mokatemba unene sho tatu ka talelapo ashike ka tuna kutya otatu ningi ngiini molwompumbwe yosheenditho ndjoka yetu adha,” Ekongo ta ti ngaaka.

Ekongo ta gwedhapo kutya oyeli mompumbwe onene yosheenditho shoskola, tati olundji nopendji osheenditho she shopaumwene osho hashi longithwa unene ngele aanaskola ta yayi momalweendoilongo, okuya fala kiipangelo uuna ya yakukilwa komikithi uusiku oshoka okapangelo kopomudhingoloko ohaka longo owala ohetatu sigo ontano komatango, tati aalongi nayo ohaya kwathele kombinga yimwe niiyenditho yawo yopaumwene.

Omukuluntuskola tati osikola otayi kambadhala naashoka tayi vulu moku gongela oshimaliwa shokulanda osheenditho shoskola,oya patulula omayalulo gombaanga mono aavali taya kala haya futu nokutulakosha molwosheenditho shika. “Otatu indile koshigwana oshiholike oshowo kaanamutimahenda ye tu kwathe nokashona hoka yena yo ya yambidhidhe , opo tu vule tu lande osheenditho shetu tse tu kale tatu ka talelapo omahala gi ili nogi ili,” Ta tsikileko ngaaka.

Osikola oya longekidha opo kehulilo lyomvula ya ka kale yena egongelo lyoshimaliwa lyosheenditho hono taya hiya aanangeshefa oshowo oohandimwe mboka yena oshigwana komutima yo ya kwathele noku yambidhidha osikola ndjika. Omukuluntuskola ota monika kongodhi yo 0812324144. Ta pandula kwaayehe taye keya kwathela.

Vehicle2

 

LEAVE A REPLY

Please enter your comment!
Please enter your name here