AaKaku ya pewa omatalashe noshindji

0
212

OKAKU – Kansela gwoshikandjohogololo Okaku, Joseph Kapya Endjala, oshiwike shika okwa gandja omatalashe kaantu oyendji yomoshikandjohogololwa she.

Kansela Endjala okwa ti okwali a gandja omaindilo kiikondo yi ili noyi ili mono a kala ta indile aanangeshefa yemu yambidhidhe naashoka yena, ye a vule a kwathe nasho aakalimo yomoshikandjohogololo she.

“Aanangeshefa oyendji mboka yena oshigwana komutima oyali ya yamukula mompumbwe yetu , no ye shi kwashilipaleke kutya muule wethimbo efupi elela otaya ka kala ya gandja sha kaakalimo yomoshikandjohogololo shandje, otwali twa taamba omatalashe geli 250,omakumbatha ogendji,oongaku, iikamusino,oombindja oshowo oothewa,” Endjala ta ti ngaaka.

Kansela Endjala okwa holola kutya iinima ayihe mbika oya nuninwa aakulupe mboka yena oomvula okutameka po-80 okuuka pombanda oshowo iilema mbyoka yili momagumbo ihaayi vulu kwiikwatha yoyene. Moshikandjohogololo Okaku moka muna oosenda dhili 29 konyala adhihe odhali dha pewa kehe osenda oya pewa omakumbatha ga-6,omatalashe ga-5 nayilwe mbyoka ya gongelwapo manga opo aawiliki yoosenda yaka topolele aakulupe niilema mbyoka yili moosenda dhawo moka.

“Ethimbo kehe otandi yakula oongodhi aanangeshefa yahala oku tu pa omakwatho ngaashingeyi otwa tegelela omunangeshefa gumwe ngono a uvaneke te tupe omatalashe,oothewa nomakumbatha gaakulupe ngono a ti otaga kala ga thika mEtitano ndika twa taalela, otandi pandula ayehe ya holola noku ulika eitulemo lyawo moku kwatha oshigwana oshiNamibia,” Endjala ta gwedhapo ngaaka.

Kansela ta ti yalwe mboka ye mupe omakwatho ongaashi omunangeshefa Robby Amadhila,Oniimboto Trading, Akapandi J&P Groups, Ehangano lyokuhonga noku opaleka uuwe moNamibia oshowo Tambae. Oyendji ya gandja omakwatho okutumbulapo owala yamwe.

Omuwiliki gosenda yOnawa yaKambonde meme Justina Shoopala Ipumbu okwa ti, okwa pandula unene kansela gwawo ngono a mono shoopala opo a gandje omakwatho kaakulupe oshowo kiilema. Ta ti okwa halela kansela oye tuu nguka oonkondo oshowo omukumo moku longa oshilonga she shokuyakula oshigwana. Aakulupe mboka yali ya pewa omakumbatha oyali ya holola enyanyu lyawo noku halela kansela pamwe naayehe ye yape omakwatho oonkondo nomwenyo omule kombanda yevi, oshowo omayambeko ogendji.

Mattrasses Mattrasses1

LEAVE A REPLY

Please enter your comment!
Please enter your name here