Eilongekido lomaulikilo oipindi aNgwediva oli li metifa

0
208

ONGWEDIVA –Omaulikilo Oipindi aNgwediva okomudo okwa tameke nena. Omaulikilo aa otaa kalako okudja nena fiyo omefiku eti 29 Aguste neudo mendiki lomauikilo oipindi laNgwediva.

Nande odula ya dja ko ovauliki  445 ova li va kufa ombinga meuliko loipindi, omolwa ounini wonhele, neudo ovashingifi 440 va valeka eenhele mokati kavo mu na ovo ihava faula oipindi nghee ya tamekele. Ava oha va di  ko South Africa, Zimbabwe, Botswana, Kenya, Indonesia naJapan, pandjovo domupopiliko wElelo lodoolopa  ya Ngwediva Andreas Utoni. Okwa weda po vali kutya, ovakufimbinga  vopaiwana momauliko oipindi neudo ove li 35 omanga 2014 ova li 38. Okwa ti, omaulikilo oneudo okwa longikidwa nelalakano okuyandja etwomukumo  lokweeta po elunduluko movanangeshefa vetu opo ngeenge tashi ya kekwatafano loipindi va yambulwe po , voo va dule okukufa ombinga  momaulikilo oipindi opamufika wopashiwana fiyo opandodo yopaiwana. Utoni ta yelifa vali kutya, pefimbo loipindi, ovanangeshefa ova longikidilwa eemhito domapukululo lwoikando 10  taa ningwa kovakalelipo vomahangano a yooloka okuyambula po eengeshefa, okukwatafana novapindiki va yooloka oshoyo okuxwepopeka eyakulo nokweeta oilandifomwa ya hokiwa kovalandi.

Ewiliko lodoolopa ola eta po elunduluko okutambula moipindi ovakufimbinga veengudu da yooloka vanini, omahangano opaumwene, eli etatambinga mepangelo, eli fikamena oovene, ovashingifi oohandimwe novakashiwana va kufe ombinga momauliko oipindi neudo. Utoni okwa lombwela oshifo Kundana kutya, okudja nghee omaulikilo a tamekwa 2000 osha eta exumukomesho li iwetikile modoolopa yaNgwediva sha nana ovalongifi voshimaliwa vahapu ve shi longifile mexumokomesho lodooopa yaNgwediva.

Omupopiliko wodoolopa yaNgwediva okwa kumika ovapindiki kutya noneudo ewiliko lomaulikilo oipindi oli ilongekida okukwatela po elandulafano, nokwaamena omaliko ovapindiki pefimbo loipindi, kwa longikidwa ovaameni vomaliko moipindi 86 tava longele kumwe novapolifi vaNamibia eevili 24.

Kombinga yofuto pomuvelo neudo ota ti, ounona okudja peedula 6-13 otava futu N$ 10.00 omanga ovakulunhu okudja peedula 14 sha uka pombada tava futu N$ 20.00, etuwa otali futilwa N$ 10.00. Utoni okwa kumika oshiwana shi uye keyeululo loipindi pambelewa Aguste 22,2015 potundi onhi-10H00. Ta ti fiku leyeululo pambelewa koministeli yoshikondo shoipindi noipambele yeefabulika Immanuel Ngatjizeko, okudja potundi 06H00-12H00 pomuvelo itapa futwa sha. Ta kufile ko oshiwana kutya, ovatalelipo moipindi youdwaali ova li omayovi 110, okwa shiva ovatali voipindi neudo ve uye momwaalu munene.

LEAVE A REPLY

Please enter your comment!
Please enter your name here