Kundana okwa pandula eyambidhidho lyoye

0
244

Ando otwa li twaana eyambidhidho lyeni aaleshi yetu ando inatu vula okuya komeho uule womimvo mbali dhapiti.Omwe tu tsu omukumo, omwa landa oshifo,omwe tu talelepo nokutupa omathaneko kombinga yoonkundana oshowo omwa tula omatseyitho giipindi moshifo.Otwa igilila nookuli aaleshi yetu yamwe mboka ha ye tu shangele kepandja lyoFacebook ngaashi kokutya ‘lalapo nawa Kundana’ nenge ‘walalapo Kundana’, ‘itandi vulu okutegelela okukulesha Etitano ndika.’ Omatumwalaka ngoka ta ge tu kumike kutya ‘Kundana tsikila ngaaka’ ogendji itaa tu vulu okuga yalula.

Itatu shi itaale kutya Kundana okwa gwanitha omimvo mbali. Otatu dhimbulukwa esiku lyotango nawa, natango sho mu Juni 2013 twa kuutumba moshigongi naanangeshefa yokuumbangalantu, moshinyanga shiigongi mo Bennie’s Park and Entertainment Centre.Omoshigongi shoka tse twa lombwele aanangeshefa mbaka edhiladhilo lyetu okuetapo oshifonkunda shokoshiwike shanyolwa mOshiwambo amuke.

Osha shafa oshilonga oshidhigu.Oshoka ka twa li tu shiwo kutya aanangeshefa mboka oyo taya ka tseyitha iipindi moshifo shetu oshowo aaleshi kutya otaya ka taambako ngiini koshifo shika.Otatu kakala tu holike? Otatu kakala tuu nokugwanithapo omauvaneko getu okulonga, okugandja uuyelele nokunyanyudha mondjila no inaatu gama ombinga twaana okatongo oshowo inaatu endekela kombinga yontumba.

Oshali omasiku omi-23 Auguste 2013 – oomwedhi 24 dhapiti sho New Era Publication Corporation (NEPC) ehangano lyokunyanyangidha lya New Era lya pititha oshifo shotango sha Kundana. Nena tse otatu dhimbulukwa esiku ndika, tatu tyapula pamwe naaleshi yetu evalo lyomumvo omutiyali gwaKundana. Otwe mu pandula  aaleshi yetu aa inekelwa sho mwa kala ookastoma dhetu noshowo aaleshi yetu yuudha ohokwe okulesha Kundana oshiwike kehe, oshowo okutupa omathaneko nkene tatu hwepopeke omushangelo oshowo eholokepo lyoshifonkundana.

Ngaashi twe shi popile pethimbo twa tameke Kundana, oshifonkundana shika kashishi shaapopi yOshiwambo ayeke. Oshifonkundana shoshigwana, oshifo shomuntu kehe ngoka halesha nokuuvako Oshiwambo. Oshifonkundana moka hatu lopota oonkundana dha guma oshigwana sha Namibia.Tse pu Kundana otwa nyanyukwa oshoka  otwa sindana moshilonga shika shoku kundaneka.

Otuuvite enyanyu sho omwaalu gwaaleshi yetu gwa tsikile okuya pombanda uule womimvo mbali dhapiti nokonyala gwa thika paantu omayovi 13, 250 mboka haya landa oshifo shetu Etitano kehe.Aaleshi yetu otaya adhika apehe komahala gopopepi nokokule okuza ko Aus noRosh Pinah moshitopolwa sha //Kharas , naantu mboka haya landa Kundana moshitopolwa Erongo. Eeno tse oshifo shoshigwana shili.

Uukwatya wetu momakwathano gopashinanena – kokutya Facebook, twitter oshowo epandja lyetu mondjandjo yomakwatathano[intaneta] otau tsikile nokuhila aalanduli yomwaalu omunene.Otatu kumike aaleshi yetu ya longithe uuteknologi mbuka uupe mokulesha Kundana okupitila moocellphona oshowo mootableta dhawo. Kuuyelele wa gwedhwapo tutalelapo pokatala ketu pethimbo lyOmaulikilo Giipindi gokomumvo gaNgwediva okuza nena.

Otatu pandula aaleshi yetu mboka haye tu dhengele noku tu shangela okutupa omayele melongitho lyelaka lyOshikwanyama nOshindonga.Omolwayo oshifonkundana shika she shi pondola okunyola oonkundana nuukeka, dhili mondjila, inaadhi gamombinga dha nyolwa pamakankameno guutoolinkundana nopaithano lyuukundaneki. Omuntu iha yela ngomahegele gomongwa, otashi vulika twa longa nayi mpaka naampeyaka, ndele tse itatu shuna monima okusoshimpwiyu kutya oonkundana ndhoka tatu kundaneke odhili nawa, dhili mondjila,dha tala oombinga adhihe oshowo inaa dhi endekela ombinga yimwe no itadhi simonona.

Sindana na Kundana

Sindana oondjambi odhindji mwakwatelwa – oocellphona – medhimbuluko lyevalo lyomvula ontiyali ya Kundana. Ithaneka mwene na Kundana nenge talelapo okatala ka Kundana pOmauliko giipindi gokomumvo gaNgwediva . Tula ethano lyoye kepandja lyoye lyoFacebook ngoye to hili Kundana. Ethano ndyoka tali kakala lya hokiwa koyendji olyo talika sindana.

 

 

LEAVE A REPLY

Please enter your comment!
Please enter your name here