Natu kalekiipo oonkuluhedhi dhookuku

0
330

OKANKOLO: Oshitopolwa shaShikoto oshali sha unganeka oshituthi shuudhano womithigululwakalo , shono hashi kalako aluhe omumvo kehe. Oshituthi shika ohashi kala sha longekidhwa mekwatelokomeho lyUuministeli wElongo koshikondo shomithigululwakalo.

Oshituthi shika oshali sha tameke mEtitano lyayi sigo Osoondaha, sha ningilwa mosekundeskola yOnguti moshikandjohogololo Okankolo. Oongundu dhomaudhano dhaza kiikandjohogololo konyala ayihe mOshikoto odhali dha holoka opo dhiye dhi thigathanepo, mo mu tothwemo ndjoka hayi dhana yi vule oongundu oonkwawo.

Pethimbo ta popitha aakwashituthi elenga enene moshikandjo shAmuteya Tatekulu,Vilho Kamanya okwali a indile aantu ya kalekepo oonkuluhedhi nomitungilo dhomithigululwakalo. Ta ti omithigululwakalo nadhi simanekwe dho dhi kalekwepo ngaashi dha thigwapo kookuku yonale.

“Mokuputuka kwetu otwa adha omapukululo nomagando gi ili nogi ili ngoka ta ga holola nkene aakuluntu ya tondo nokukenyanana omaihumbato gontumba ngoka ga talwa omawinayi, no taga shundula omikalo noonkuluhedhi dhetu, onkene otatu kumagidhwa tu dhi simaneke tse tudhi kalekepo, tse tu iyuthe kudho woo,” Kamanya ta ti ngaaka.

Elenga enene Kamanya tali ti aakulumtu mboka ya tseyika nawa komadhina ngaashi oonkungulu dhomazimo noonamunganga oya dhikitha nokudhiginina omasimaneko gaa shoka kwa dhimbululwa tashi kwatelepo oonkuluhedhi dhawo.

“Ookuku yonale oyali ya simaneke iidhila nokutila iipwe, aanona oyali wo ya kumagidhwa ye yi dhiginine noku yi simaneka opo yaa ha se omaso kaa gena mutse nandungu, nenge ye etele omazimo gawo omipya nenge ya yonithe po oshilongo shawo, oohango dhonale odhali hadhi ningwa piitsali mekwatelokomeho lyoonamunganga, aalumentu oyali ha ya yi kuukongo hono haya ka yaha uudhila ashike methimbo ndino lyongaashingeyi iinima ayihe yopamuthigululwakalo oya dhinika unene kepipi egundjuka,” Ta gwedhapo ngaaka.

Omunambelewa omukuluntu gomithigululwakalo mombelewa  yelongo Aina-Paulina Muulila okwali a hokolola kutya oyali yena oongundu dha yooloka no dhili poondondo dha yoolokathana. “ Oongundu odhali tadhi thigathanapo mono twali twa hogololamo ndhoka dha dhana dhi vule oonkwawo, aagandji yiitsa oyali ya longo ngaashi shu uthwa noku gandja iitsa kwaamboka yeshi ilongela,” Muulila ta ti ngaaka.

Muulila ta ti oyali ya taamba oongundu dhi thike po-60  naadhani yeli lwopo-900. Tati omithigululwakalo ndhika odha ende nawa lela. Ta gwedhapo kutya okwa tengenekwa omithigululwakalo dhopashigwana dhi ka kaleko moshiwike shotango nenge oshitiyali shaDesemba tadhi ka ningilwa koKeetmanshoop moshitopolwa sha //Kharas.

Oongundu ndhoka tadhi ka kalelapo oshitopolwa shaShikoto  odho Waapandula yaza kOmuthiya,Kuku Laina yokOnayena,Gwashamba yokOniipa,Okangundu okashona kokOlukonda. Oongundu ndhika odha indilwa dhi tameke oku ilongekidha manga kuyele dho dhi kale dhi itulamo. Odhali dha pewa omakopi molwa eitulemo lyadho.

 

LEAVE A REPLY

Please enter your comment!
Please enter your name here