Oondjila okOmuthiya ehuliloshiwike ndika

0
270

ONDANGWA – Ethigathano lyokakadhonadhingi moshitopolwa shaShikoto lyali lya thaanekwa li kaleko petameko lyomwedhi nguka nolyali lya kalekwa, otali ka ningwa ehuliloshiwike ndika.

Ethigathano lyokakadhona dhingi  olya unganekwa kaagundjuka yomOshikoto pamwe naanangeshefa moshilongo nelalakano lyokuhanganitha uukadhona mbuka wuna ehalo lyoku kutha ombinga momathigathano goludhi nduka. Okwa tegelelwa ootaliwashele yeli 15 yaka kuthe ombinga methigathano lya hugunina mboka ya za  kiitopolwa ya yoolokathana.

Oshiindingili shino, opo tashi ningwa lwotango mOshikoto notashi kala ongomalolelo. Otashi ningwa mOlyomakaya ngaka mondoolopa yaMuthiya. Oshiindingili oshili mekwatelokomeho lyo Elegance Magazine oshowo Elelo lyopashitopolwa shOshikoto.

Omudhindi gwoshinyanyangidhwa shika sho Elegance May Hikumwah okwe shi tseyitha kutya molwomayambidhidho ngono ha mono okuza kaakwashigwana okwali a tokola opo a gandje woo sha moshigwana oshoka ohashi mu kwatha olundji.

“Manga inaatu dhiladhila tu etepo ethigathano ndika mOshikoto otwali woo twa gandja omakwatho kaanona mboka aadhinwa oshowo aayelele mbono taya mono iihuna no kayena mpoka taya mono omakwatho miitopolwa yokuushayi, otwa hala aantu yetu momikunda ya mone uuwanawa mboka ya pumbwa yo ya kale yu uvite kutya nayo oya pumbiwa, yo ya tseye woo kutya moshigwana omuna aantu yena ohenda nayo noya hala okuya yambidhidha,” Hikumwah ta ti ngaaka.

Oontana dhanelende odha tegelelwa dhi ka opaleke ondoolopa yaMuthiya oshowo pomatala mpoka hapu landithile aakwashigwana, shino tashi tameke ongula yOlyomakaya, omanga oshiindingili inaashi ka tameka komatango. Oshiindingili osha mona omayambidhidho kuza ko Coca-Cola,Shoprite,Omulaulu Investment,Omukwa Fishing, Roadhouse Omuthiya,Adego Investment nomahangano galwe woo.  Okakadhonadhingi otaka ka sindana oshindji notaka ka kala ka futilwa osikola yawo uule womvula ta yi ya ayihe.

Okwa tegelelwa aahikingalo aaNamibia yaka mwenyeke esiku mono Exit oye ta ka kala ta dhana onkandangala onene pethimbo lyoshiindingili shika ta ku tiwa otashi ka kala shopandjokonona.

 

LEAVE A REPLY

Please enter your comment!
Please enter your name here