Peter Ondume yomomufitu:   Okuthigapo ehala lyomalugodhi

0
215
Peter Jungle Fighter

Omumvo 1983 manga ndili kehala lyolugodhi moNamibia, onda taamba elombwelo kutya nandi kiilopote kombelewa onene yodetachment yetu pOkatunhu moAngola. Ombelewa ndjika oya li konyala uule wookilometa 80 okuza koongamba dha Namibia nAngola. Nando ka kwali nda lombwelwa kutya otandi ithanenwa shike, kandali nomaipulo unene oshoka shika osho omukalondjigilile kutya uuna omukwiita goPLAN iithanwa kewiliko enene iha lombwelwa kutya ota ithanenwa shike.Nando onda kala ndishishi kombinga yomukalo nguka goku ithanako aakwiita kehala lyomalugodhi, onda li ndina omaipulo unene sho nda ithanwa pethimbo lyetulomiilonga lyelombwelo 10 ndyoka lya li tali kwatitha aakwiita mboka taya fekelwa ngiika ya ninga iilongithwa yomukolonyeki.Ngame onda li ndishishi kutya kandina shoka nda yona,onkene ngiika onda ithanwa molwashoka eithano lyandje otali ka humitha komeho oshinyangadhalwa shekondjelomanguluko.Sho nda thiki poombelewa oonene dhodetachment onda li nda lombwelwa ndi kiilopote kombelewa yopashitopolwa .Molwashoka onda li nda vulwa onda vululukwapo manga omasiku gaali omanga inaandi tsikila okuya kombelewa yopashitopolwa ngaashi nda lombwelwa. Onda li nda pewa aakwiita yatatu opo ya thindikile ndje kombelewa ndjoka unene tuu sho ndjika ya li kokule kashona. Otwa ende uule womasiku gaali manga inaatu thika koombelewa ndhoka dha li pEtalelomulavi. Pethimbo ndyoka ngame ndali nda ithanwa okushuna koAngola oombelewa oonene dhuukwiita dhoshitopolwa shetu odha kala tadhi lunduluka omalupita molwashoka aakwiita yomukolonyeki oya kala nokudhi homona noondhila. Aakwiita ya South Africa oya kala nokuponokela ookamba dhaakwiita yoPLAN moshitopolwa ashihe shaCunene, onkene oombelewa ndhika odha kala noku inyenga ethimbo nethimbo.Mokuthika kwandje pombelewa yoshitopolwa Omukuluntu guundaadhi, hailwa Namukokola okwa lombwele ndje kutya ondi ithanwako kehala lyolugodhi opo ndi tumwe komadhewo pondje yAngola. Ndele kali eshi tomona kutya openi naanaa ndina okuya, oshowo uukwatya womadhewo ngoka tandi ka pewa.Onkundana ndjika kaya li ya fuula ndje, oshoka kungame ondali ndi wete nda gwana no inandi pumbwa okudheulwa ishewe kombinga yokukondjitha omutondi.Pethimbo ndyoka ngame onda li ha ndi longele meni lyoshilongo tandi kondjitha omutondi, moka nda lwa omalugodhi  nonda sindana onkene inandi pumbwa okudheulwa ishewe. Shoka osho nda dhiladhila pungame mwene, nda dhimbwa kutya omukwiita kehe okwa pumbwa okudheulwa taku tsikile opo uunongo we wu kale wuuka pombanda. Nando ongeyi elombwelo olya gandjwa kutya nandi kiilopote onkene ongo omukwiita omuvuliki ngame onda vulika kelombwelo ndika.Onda kala poombelewa oonene iiwike itatu omanga inaa ndi tuminwa koombelewa oonene dhokommanda ayihe yetanga lyoPLAN. Oombelewa ndhika odha li kuumbangalantu womukunda gwaCassinga. Inandi yamo moombelewa ndele onda falwa kokamba ndjoka hayi pitilwa kwaamboka yuuka komadheulo naandjika oya li  kuumbangalantu yokandoolopa ka Cassinga. Okamba ndjika oyali tayi wilikwa ku Hailwa Akulyeembwa.Onda kala mehala moka omwedhi aguhe nopwaana ngoka a lombwele ndje kutya ondiithanenwa shike sigo oosho nda nyenyeta. Konima opo omunambelewa gumwe a lombwele ndje kutya onda li nda tegelela okuya ko Luanda, opo ndi ka tuminwe kosikola koshilongo hoka ye inaa tseya kutya osho shinipo. Ndele nee opwa li nale omifofoto kutya  otashi vulika tandi ka tuminwa ko Soviet Union nenge ko Yugoslavia okuka longwa ishewe uukwiita. Onda kala mokamba ndjika yokupitila sigo omuSeptemba 1983 sho nda yi pamwe nayakwetu yamwe kokamba hayi ithanwa Ondongo. Mokamba ndjika otwa li mo aakwiita yoPLAN 3 000 twa za komatanga ga yooloka. Okamba ayihe oya li hayi wilikwa ku hailwa Ruben Ashipala a tseyika wo Danger

Ashipala ngoka oye a li okommanda yetanga lyospeciala lyedhina Typhoon. Mokamba ndjika otwa kala tatu dheulwa pakwiita okwiidhimbulukitha onkalo yuukwiita.Otwa longwa  lela nkene tatu ponokele omutondi omutenya oshowo uusiku, otwa li wo twa ende iinano iile, otwa londo oondundu oshowo okupita momahala omadhigu okweenda twa humbata omitsalo omidhigu dhiikondjitho. Omailongekidho ngaka gopakwiita oga kala uule woomwedhi ndatu. Konima yago  ngame onda falwa kokamba natango yokupitila okuya palwe yili popepi noLubango, hayi ithanwa Onugulugombashe twa yi hoka naakwiita ooyakwetu yomwaalu omushona moka otwa kalamo uule woshiwike omanga inaandi lombwelwa kutya ondi lilemo shike mokamba ndjoka.Omunambelewa gumwe a za koombelewa dho PLAN okwa tseyithile ndje kutya ngame ondili mondjila okuya koLuanda oku ka tuminwa koSoviet Union ndika gwedhelweko kontseyo yandje yuukwiita.Otwa thigipo okamba ndjoka konima yiiwike iyali noku ya nondhila yomitsalo dhopakwiita yetanga lyomombepo lyaCuba okuya koLuanda. Mondhila moka opo nda ende mo lwotango onda li ndeendemo nayi oshoka oya li tayi nukanuka molwonkalo yombepo esiku ndyoka. Okuza mpoka onda li konyala nda gana kutya itandi keenda we mondhila , ihe onde shi ndhindhilike kutya itashi vulika oshoka koSoviet Union hoka tandi yi ondina ashike okuthikako mokweenda mondhila.Mokuthika moLuanda otwa falwa kokamba yokupitila yoSWAPO mono twa kala omwedhi gumwe manga twa tegelela okuya koSoviet Union. Muka otwa li twa pewa iilonga yoku opaleka mpaka naampeyaka otwa li  omathimbo gamwe twa ka helula ooskepa komatuliloskepa.Ethimbo ndyoka twali twaana shoka tatu longo otwa kala tatu inyanyudha tatu nu ombiila nosho tuu. Opo mpoka onda ndhindhilike kutya yamwe oya li taya hupu nawa okuyeleka natse mboka twali kehala lyolugodhi hoka tse twa li omathimbo ogendji ihaatu li nawa nomasiku gamwe ohatu kala nondjala oshowo nenota.Onkene pethimbo ndyoka ngame ondi iyadha nda fuuka konkalamwneyo ndjika lwotango okuza tuu nkene nda ningile omukwiita goPLAN omumvo 1977.Kuyele mu Januali 1984 otwa lombwelwa tu ilongekidhile ondjila okuya koSoviet Union. Otwa falwa kokapale koondhila ka LUANDA hoka twa ka londa mondhila yiilonga yomalweendo gomombepo ga Soviet Union , Aeroflot, onda li te dhiladhila kutya ngiika ndjika otayi kala ya fa yaaCuba ihe ndjoka oya li ondhila yoshinanena noyina iipundi iwanawa niipu okukuutumbwa, mondhila omwali woo aayakuli mboka yetu pe iikulya iiwanawa, oshowo omwa li muna omusika ndjoka omuntu to pulakene. Olweendo lwetu otwe lu tameke pohamano komatango moLuanda notwa thiki mo Moscow poheyali yongula esiku lya landula.Okuza moMoscow otwa falwa kenongelo lyetanga lyiilonga yomonanguwi ya Soviet Union ndyoka lya li lya tseyika nawa KGB. Moka otwa li twa dheulwa uukwiita tu vule okulonga meni lyomatanga gomutondi no pwaana ngoka tetu dhimbulula oshowo okudhikapo aakwiita yoguerrilla miilando.Omadhewo ngaka kagali uudhano nando.

LEAVE A REPLY

Please enter your comment!
Please enter your name here