Uulenga a pandula Kundana

0
331

ONGWEDIVA-Oshilyo oshikulu shomutumba gwopashigwana shoka shali sha kalela po ongundu yoCOD  Ben Ulenga osha ti Kundana oshifo oshiwanawa shoka sheya pethimbo lela.

Ulenga okwa ti ota halele Kundana omahalelelo yambeko sho ta gwanitha oomvula mbali nokwa hala nguka a dhiginine okunongopaleka aakwashigwana.

“Kundana oshifo sheya pethimbo lela na oshili tashi kundaneke, tashi ndungike sho otashi nongopaleke aakwashigwana melaka ndyoka li uvitike nawa unene kaapopipi naaleshi yOshiwambo moshilongo,” Ulenga ati ngaaka.

Ulenga okwa longitha woo ompito ndjika okuhalela aatooli nkundana ya Kundana omwenyo omule kombanda yevi opo ya wape okuya muule woshilongo ya kundaneke oshigwana omauyelele ngoka taga ndungike aantu.

Okwa ti ye okuna esimaneko enene lya Kundana, ashike okwa lombwele Kundana opo a nongopaleke aakwashigwana nelaka lyuukilila nolya pama.

“ Oshiwambo oshina oompango ngele tashi ya pakunyolwa na Kundana okweshi pondola oku shi shanga, ashike otandi kunkulile Kundana opo a dhiginine moku shanga elaka ndyoka a landula oompango,” Ulenga ati ngaaka.

Ulenga okwa tsikileko ta ti kutya Kundana oshifo shoka sha pumbwa oku longa nuudhiginini opo koomvula dhokomeho a kale i ithikamena ta kundaneke eli kuye mwene.

Ashike okwati sigo ongashingeyi kena naanaa omanyenyeto guuka muKundana oshoka oshifo tashi etitha omukumo.

Ulenga oye gumwe gwomaakwashigwana mboka ye hole oku tseyitha iipindi yawo moshifokundaneki sha Kundana.

 

LEAVE A REPLY

Please enter your comment!
Please enter your name here