Young Chiefs oopaleke mOshakati

0
257

OSHAKATI –Ospana yetanga lyokoompadhi yomOshakati, Young Chiefs Football Club oya ningile eopaleko lyondoloopa ndjoka Olyomakya gayi. Eopaleko olya ningwa kaadhani , kiilyo yewiliko lyospana ndjika oshowo kaayambidhidhi yospana oyo tuu ndjika. Eopaleko ndyoka lya kutha ootundi ndatu olya tamekele potundi ontiheyali ongula na olyali lya kwatelamo aadhani yeli omilongo 40, mboka ya kwathelwa kaaniilonga yomElelo lyoshilando shaShakati.

Omupopiliko gwoYoung Chiefs, Belle Nandjigwa, okwa ti aaopaleki oya li ya topolwa moongundu mbali, ongundu yimwe oya li tayi opaleke oshilando ya landula ondjila onene okuza kOkandjegedhi muuzilo woshilando  omanga onkwawo oya tameke kolukanda lwOmpumbu.

“Okuopaleka kwetu osho okuulika kutya tse inatwiitula ashike mokudhana etanga lyokoompadhi , ndele tse otuna wo oshinakugwanithwa  shuundjolowele nuuyogoki  wondooloopa , unene tuu  pethimbo lyiituthi ngaashi shoka shOmauliko gIipindi gOkomumvo gaNgwediva oshowo ngoka gOlufuko Cultural Festival taga ningwa oshiwike shika oshowo omwedhi tuuka,” Nandjigwa a fatulula.

Okwa ti oshinima shika sheetwapo koYoung Chiefs, ndjoka opo ya yelwa okukadhana koliha yopombanda ya Namibia Premier League (NPL) omumvo guudhano tuuka, osha ningwa okuindila aanangeshefa moshitopolwa , omahangano oshowo oohandimwe ya yambidhidhe ospana ndjika pashimaliwa oshowo pamikalo dhilwe dhiilongitho nosho tuu.

Okwa ti ospana ndjika otayi ka dhana nawa  okukondjela oliha yo NPL ashike, ngele aakalimo yomOshakati naayambidhidhi palwe otaya kala neitulemo okuyambidhidha ndjika moku yi pa omakwatho ngoka ndjika ya pumbwa.

Omupopiliko gwElelo lyOshakati, Jackson Muma, okwa popi ngaashika Nandjigwa a indile oshigwana shaShakati oshowo shoka oshinangeshefa shi kuthe oshiholelwa shehangano Oshakati Premier Electric (OPE), ndyoka lya pele ospana yoYoung Chiefs FC omatanga kuyele nuumvo.

“Euvaneko lyetu tse koYoung Chiefs, ngaashi yetu kwatha okuopaleka ondoolopa yetu , okupopya nawa noshigwana shaanangeshefa  opo ya kwathele nokuyamukula onkugo yospana ndjika nomakwatho gopashimaliwa,” Muma a ti.

 

LEAVE A REPLY

Please enter your comment!
Please enter your name here