Anton Lubowski, omuSWAPO omutiligane (1952 to 1989)

0
322

Eso lya Anton Lubowski sigo onena kali shiwike nkene lyeende, kaku shiwike kutya olye uumbu ondjembo ndjoka ye mu dhipaga, ndele onkalamwenyo ye otayi dhimbulukiwa ongo yomutseyimpango muuthemba womuntu, oshilyo shaaniilonga ngoka etonde uukwamuhoko omuntu ito itaale ngele ino kala popepi naye.

Esiku 12 lya Septemba 1989, ooholo dhuumbwa okuza mosheenditho tashi pitipo manga Anton Lubowski ta zi mosheenditho she odhe mu dhipaga komeho gegumbo lye mepandaanda lya Sanderburg moKlein Windhoek. Lubowski okwa si manga ena omimvo 37 a thigiko omuselekadhi gwe Garbielle Schuster noyana aashona yaali Almo na Nadia.

Oomwedhi hamano konima yeso lye medhipago lyoshiyakela , omushangi David Beresford okwa nyola kutya oombuthulu dhiikuti odha li natango tadhi monika momweelo gwolugumbo lwegumbo moka Lubowiski a dhipagelwa pashiyakela. “Momukalo gwontumba ehala ndika olyoopalela okuningwa ondhimbulutho.Hangaashi ndjoka yomuyapuki-oshoka Anton kali mongundu ndjoka, ndele ye omuntu ngoka eso lye tali talikako ongo efikilondjambo, ndyoka lya nyanyudha nokuuvitha nawa iikalunga iiholi yiita, mbyoka ya li ya lopela ombinzi ye pethimbo ondjembo yo AK47 ya kungu omulilo okuza handiyaka yepandaanda lya Sanderberg,”

Beresford osho a nyola membo lye kombinga yonkalamwenyo ya Lubowski pamwe nayina yomusi nguka. Sigo okonena edhipago lya Lubowski, olya ningwa kuwalye, no kapena ngoka eshi kutya ondjembo ndjoka yemu li oya li momake galye.Konima yomakonakono ogendji kapena shoka sha monikapo kakele kokulundila ehangano lyedhina Civil Cooperation Bureau (CCB) ndyoka lyali mewiliko lyiilonga yomonanguwi yepangelo lyonale lya South Africa.

Omukalo moka a dhipagwa ogwa eta omawalyaeko kutya ye okwa li ondaadhi ya South Africa, oshilongithwa shepangelo lyokakombo noludhi, omuniilonga gwomeholamo gwelelo lyuukoloni anuwa. Omilombo ndhoka odha mwenekwa noku ekelwahi momambo nomiinyolwa oyindji mbyoka ya ka holoka konima yeso lye.
Pethimbo lyiihokolola komeho goKommissi yoTruth and Reconciliation,(TRC) mo South Africa, omutoolinkundana ngoka ha hadha nokukongoshili kohi yiiholekwa omuSouth Africa, Max du Preez, okwa li a kondjitha omipopyo ndhoka kutya odho, owala oonkambadhala dhepangelo lyokatongo lya South Africa okuluudhika
edhina lya Lubowski. Megumbo Lubowski oye ependafule, omutseyiveta miipambele yuuthemba womuntu ihaa tenguka, omunene evule nomwenyo gogwene- oku tala omuthika gwe omuntuntuu moSwapo nomumati omutiligane gwoSwapo.”.

Lubowski okwa valwa momasiku 23 Febuluali 1952 moLuderitz, omunona omutiyali gwa Wilfried Franz na Molly. Okwa li omumati gwotango mepipi etitano mezimo lyoo Lubowski moNamibia. Pomimvo 13, Lubowski okwa tuminwa kosikola koStellenbosch hoka a manitha osikola ye momumvo 1970. Konima yosikola Lubowski okwa yi muukwiita ngaashi sha li shuuthilwa omulumentu omutiligane kehe gwepipi egundjuka.Opo ihe okwe kiilonga ooveta tango ko Univesiti ya Stellenbosch , nokonima
okwa ka tsikila koUnivesiti ya Kaapa. Konima yeilongo lye okwa longo omunambelewa gwopaveta moWindhoek nokwa ningi oshilyo shehangano lyaatseyiveta lya Lorentz na Bone omumvo 1978. Okwa ningi oshilyo shaatseyiveta mo1980 noku hogololelwa kehangano lyo Luderitz Foundation Regional Committee moka a longo kombinga
yehwepopeko lyoshilando shoka pamahupilo.

Osha li pethimbo ndika monkalamwenyo sho a tameke okuninga omunandjungu mopolitika. Momumvo 1979 Lubowski okwa joina Namibia National Front (NNF), ndele pahapu dha he “ye okwa kutha onkatu yotango oku ya mo SWAPO” meni lyootundi dhimwe konima yoku ya mombelewa yaatseyiveta,” sho a li a tumwa a ka popye nomuyakulwa omuluudhe mondholongo. Lubowski okwa ti okwa ndhindhilike eyooloko pokati ka NNF noSWAPO olya li moshitopolwa shomahupilo. Okwa ti
NNF okwa li a thikamenapo omahupilo gomumwe omanga SWAPO okwa li a thikamenapo omahupilo gopasosiale.

Okwa popiwa a tile: “O NNF itayi ka ningapo omaliko ga ninge goshigwana , kakele ngele otashi ningwa mokufuta mboka ya kuthwa omaliko ngoka, nenge ngaka otaga kuthwako omolwuuwanawa waantu ya Namibia. Ondi shishi kutya nguka omwiityo gwaandjagana ndele shika itashi kala ompango oku kutha omaliko ga ningepo goshigwana.” Pahapu dhaakuluntu ye Lubowski okwa tameke mbala okushanga iinyolwa yopapolitika miikundaneki yomoshilongo, oshinyolwa she shotango osha li kombinga yemanguluko lyomahupilo lya Namibia oshowo omategameno nomadhiladhilo thaneko gaagundjuka aaNamibia.

Iilonga ye mbika oye mu tula mekwatathano lyuukilila naayambidhidhi yoSwapo, nomomumvo 1979 okwa li iilongekidha okuya koBotswana , Angola na Zambia oku ka konga uuyelele kombinga yiipotha yopapolitika. Olweendo nduka lwa Lubowski olwa li olunene oshoka okwa tsakaneke lwotango aawiliki yopombanda yo SWAPO.
Okwa joina ongundu ndjoka omumvo 1984.

Konima yaashoka okwa li oshilyo shosheendo shoSwapo shoka sha li moonkundathana dhombili dha Namibia koLusaka okwa li wo oshilyo mosheendo okuya ko London poshigongi shokudhimbulukwa omimvo 100 dhuukoloni moNamibia.Okwa li wo a tsakaneke Ominista Yiikwapondje ya Fransa pehala lyoSwapo. Omumvo 1985 okwa li a
kalelapo Ongongahangano yOongeleka moNamibia mOkommissi yUuthemba wOmuntu moGeneva, nomomumvo 1986 okwa li oshilyo mosheendo sho Swapo koshigongi shombili nemanguluko lya Namibia moVienna sha Austria.

Okwa li a joina osheendo shomuperesindende gwoSWAPO okutsakaneka aanapolitika ya Ndowishi yoKuuninginino momumvo 1986. Omumvo ogo tuu ngoka , Lubowski okwa ningi oshilyo shehangano lyaaniilonga yopashigwana lya Namibia nenge[National Union of Namibian Workers (NUNW), sho a mono oonkondo  dhopapolitika ndhoka dhili miikaha yaaniilonga. Okwa li wo omuwiliki gwehangano NAMLAW, ehangano ndyoka a li a tameke omumvo 1987 okungongapo ooveta ndhoka tashi vulika
dhika longithwe konima yemanguluko. Omumvo 1988 okwa kwatelele osheendo shaalongwantu aaNamibia,aawiliki yaaniilonga, yaanafaalama, aakiintu aanamagumbo
oshowo aanangeshefa okuya ya ka tsakaneke Omuperesidende gwo SWAPO Omundohotola Sam Nujoma moStockholm, Sweden oshowo moKabwe, sha Zambia.
Omumvo tuu ngoka gwo 1988, Lubowski okwa pewa ondjambi ya Bruno Kreisky molwokwaadha kwe oshindji miipambele yuuthemba womuntu.

Iilonga ye yopapolitika oya li ye mu tula mekondjithathano nepangelo lyuukoloni.Okwa talikako oye omutseyiveta gwotango ta edhililwa mondholongo omumvo 1985. Shika osha landula omakwato ogendji , gahamano gomugo , gaali gomwaangoka a kala iikalekelwa uule wethimbo ele.

Etumwalaka lye lya hugunina moshigwana olya li: “Aantu naya imange kumwe moNamibia kashina mbudhi kutya oyolwaala luni, oludhi luni, aalumentu nenge aakiintu nenge ohaya hempulula shike”.

LEAVE A REPLY

Please enter your comment!
Please enter your name here