Ohandi nika oluhodhi  ngele tandi tedha olweendo lwandje mopolitika

0
303

WINDHOEK-Nomeho ga kengeleka  noshowo newi tali kakama omunamimvo omilongo -70 Emanuel Muatara okwa hokolola olweendo lwe lopolitika meni lyoshilongo pethimbo lyekondjelomanguluko. Okwa gandja wo omatompelo kutya omolwashike uuvite kutya ye okwa pumbwa okupewa esimaneko lyashewa.Pethimbo ndika oye amushanga gwewawa lyaakuluntu moSwapo moshitopolwa sha Khomas okwa yalulwa wo ongo omukwiita omukulu gwekondjelomanguluko ha tyapula omauwanawa agehe ngoka haga pewa aakwiita mboka. Nando ongaaka , Muatara okwa ti okuuvite  okuna okupewa esimano lyuupenda omolwa iilonga ye mbyoka a longo mekondjelomanguluko lya Namibia. Okuuvite okwa pumbwa okusimanekwa omolweigandjo ndyoka uuvite aantu ye li dhimbwa. “Ondu uvite natango kutya  ngame ependafule lya dhimbiwa.Onda li ndi na okupewa ngaa nando ombandi, unene tuu sho nda li handi longo iilonga ya nika oshiponga okukala omupolisi goSwapo meni lyoshilongo,”osho a ti.

Muatara okwa totelepo opolograma moradio ndjoka yali tayi hwahwameke papolitika ndjoka ya li ya futama ongo opolograma yomahokololo, okwa li wo a dhikepo elyenge lyuupolisi moshilongo ndyoka lyali meholamo. “Oshiponga okukala omupolisi go Swapo. Onda li nda gamene Swapo. Onda hala okusimanekwa noku yalulwa nando ongo Okommanda yopolisi. Onda hala okupewa edhina ngaashika yalwe ya simanekwa. Ongame nda tameke “opoIisi ya Namibia,” osho Muatara ta hala okulila  a popi kombinga yiilonga yomeholamo yelyenge lyuupolisi mbyoka a li a dhikepo omumvo 1972 ya li yiithanwa Namibian Police, yi na iilyo ya pewa uukalata wuukwashilyo. “Uuna tandi tedha nokudhiladhila kolweendo lwandje lwopapolitika ohandi hala okulila oshoka “oombulu odha kotokela ndje sho dha ti nandi konge iilonga mosasiona yoradio,” Muatara a hokololele oshifonkundana New Era omanga ta thitikininemo omahodhi.

Olweendo lwa Muatara mopolitika olwa tameke muDesemba 1969 omanga a li omunambelewa moshipangelo shaShakati.Pethimbo ndyoka oshilumbu shedhina Stein oshemu lombwele opo a ka longe miilonga yOkutuma Omawi mOmbepo ya South West Africa[ Broadcasting Corporation (SWABC) ] mosasiona yelaka lyOshiwambo, neuvaneko lyondjambi ombwaanawa. Muatara okwa li omutakumi nomushangi dhingi gwOshimbulu pethimbo ndyo.

“Otu ndji mwakwatelwa na, Tate Shiimi Ya Shiimi, otwa li twa ningi omaindilo noku taambwa miilonga mbyoka. Tse otse yotango aaluudhe twa joina osasiona ndjoka.Mokati ketu omwa li omupopi moradio gumwe gwedhina Ono Angula. Atuhe otwa li twa dheulwa nawa noku tameka iilonga nawa. Shoka twa li inaatu nongela ooshoka kutya iilonga mbika oyali iiwinayi , oshoka osasiona oya li yoku andjaganeka omutoto. Ngele andola onda li nde shi tseya petameko , andola kandina esiku nda tokolele opo ndi taambe iilonga mbyoka,” osho a hokolola.

Iilonga yoradio yOshiwambo oya li ya talikako ongo mbyoka yoku taandelitha omutoto peha lyepangelo lyuukoloni.Ihe shika Muatara kali eshi dhiladhila pethimbo ndiyaka, sigo oosho omukwaSwapo, omukwawo, Benjamin Namalambo, emu lombwele kombinga yiilonga mbyoka ta longo. Namalambo okwa li a talelepo Muatara pegumbo lye moDonkerhoek, Katutura, ete mu pula: ‘Hailwa Muatara, omolwashike wa joina iilonga yomutoto yoombulu?’ Nakusa Namalambo konima okwa ka taaguluka oongamba  noku ya muundjendi moka a kamanena oondjenda. “Oye a patulula omeho gandje nonda tokola ndeethepo iilonga mbyoka nondi shune kOwambo.Molwashoka osha li sha nika oshiponga okweethapo iilonga mbyoka ashike ngaaka, onda fundju oombulu kutya otandi ehama. Onkene onda longele iinima yandje ye Namalambo ta fala ndje kegumbo lye moka nda kala omasiku gaali,” Muatara a fatulula.

Manga nda holama megumbo lyaNamalambo ewiliko lyoSwapo olya li lya gongala noku tokola kutya  ye ita  shuna kOwambo, oshoka ye ota vulu oku kwathela ongundu  nuuyelele womeholamo okuza komutondi, sho ta kala “omeho nomakutsi” goSwapo posasiona yOradio.

“Onda kaIa noku landula nawa kehe shimwe tashi ningwa posasiona ndjoka.Onda tsikile nokulonga nakehe shoka sha popiwa koombulu onde shi hokololele Swapo. Angula okwa koneke kutya ohandi kala naantu yo Swapo ye nokwa lopota ndje kiilonga. Ombulu odha tokola okuninga ndje omupopi mOradio , opo dhi tsikile nokutaandelitha omutoto gwadho.Ngame onda tindi nonde dhi hokololele kutya ngame omupopi gwelaka lyOshikwambi no kandishi nawa okushanga Oshindonga nenge Oshikwanyama ngoka ogo ga li omalaka ga yalulwa.Odha pula ndje kutya otandi vulu okulonga shike ngame nonda yamukula kutya  ohandi vulu okuhokolola omahokololo- onkene onda tameke opologalama yomahokololo,” osho a ti.

Nongaaka onda tameke opolograma yOshiwambo yokongulohi hayi ithanwa ‘Oshungi Kolupale Potshoto tsho musamane Muatara’.

Okwa longitha  ndjika okuuvithako aantu opo ya joine ekondjelomanguluko okupitila momahokololo, yo opolgrama ndjika oya tameke ya hokiwa kaantu oyendji unene tuu kaakalimo yomoKomboni ya Katutura, moka mwa li aaniilonga yokondalaka. Shoka Muatara a li inaa tseya ooshika kutya omuhona gwe  nani okuuviteko Oshiwambo.

Konima okwa ka tidhwa miilonga  noku falwa kosasiona yopolisi ya Katutura  konima sho a yaka eshina lyokunyanyangidha  okuza mosasiona. Eshina ndika olya li li na uuyelele mboka wa simana a li ena okuwu gandja kaakondjelimanguluko. Konima okwa ka tamanekwa kohi yoveta yUukulo mohofa yOpombanda nokwa sindana moshipotha shoka komeho gOmupanguli nakusa Bryan O’Linn niifuta ye yopaveta oya futwa kongelka ya Katoolika . Pokati komimvo  1973 no 1975, okwa kala noku edhililwa mondholongo omolwiilonga ye yopolitika. Ota dhimbulukwa wo kutya ethimbo limwe okwa li a lundilwa kutya oye gumwe gwaakwaSwapo mboka ya dhipaga Omuwiliki gwaHerero, Clemence Kapuuo, elundilo ndyoka ye a ekelehi.

Omumvo 1977 sigo 1982 Muatara okwa li gumwe gwaaNamibia omilongo 68 mboka ya li yeedhililwa moGobabis kohi yoveta yo AG26. “Mo 1982, otwa li twa ethiwa nokutulwa mondholongo yomegumbo osigo osho omahogololo ga ningwa omumvo 1989.Ka twa li twa pitikwa oku talelwapo kaantu ye vule yatano. Otwa li twa hepekwa nokudhengwa, onkene onda kambadhala oku iyaka mo  iikando itatu okulandula aamwandje yahamano muundjendi koBotswana, ndele onda li nda kwatwa.Manga ndili mondholongo yomegumbo ongeleka ya Katoolika oya pula epangelo opo ngame ndi falwe komissioni ya Gunichas moGobabis. Oya zimine opo ya kale taya langele ndje hoka,” Muatara osho a dhimbulukwa.

Manga  eli pomissioni mpoka okwa ningi omulongisikola, naashika oshe mu kumike opo a tsikile okwiilonga uulongi okupitila mo Academy okuza 1989, sigo  1993.

Okwa piti uulongi nokulonga Ondjokonona nOshimbulu sigo oosho a yi mopenzela mo-2005 poseko ya Immanuel Shifidi moKatutura.

Caption (Pic: Muatara.jpg):  Emanuel Muatara a nika oluhodhi sho a hokolola muupyakadhi mboka eenda mondjila ye yopolitika moshilongo.

LEAVE A REPLY

Please enter your comment!
Please enter your name here