Oupendafule ina u xulila movakondjelimanguluko

0
253

Onghalo ei ili moNamibia oya fa tai ulike kutya oupendafule owa xulila moomeekulu nootatekulu noshoyo ootate noomeme ovo va kufa ombinga moita yekondjelomanguluko loshilongo.

Ashike nonande oshilongo osha manguluka, keshe umwe moNamibia ota dulu okuninga ependafule shaashi nonande oita oya xula, oshilongo onghee ngaho sha taalelwa komashongo elili nakulili nokwa pumbwa okulwifwa nelitulemo kOmunamibia keshe.

Omashongo ongaashi oluhepo, okuhena oilonga, okuekelashi ounona neehanana, ehepakafano lomomaumbo nosho yo okukwafela ovo vena omaulema naavo ihava dulu okuli kwafa vovene mwa kwatelwa eefiye, oo amwe omwaayo.

Mopaife, ovanhu ohava kala ashike tave tange ooTatekulu Toivo ya Toivo, Oo Kaxumba kaNdola, tatekulu Sam Nujoma, ooTatekuku Hifikepunye Pohamba, ooMandume ya Ndemufayo, oo Handrik Witbooi nooSamuel Maharero, ashike fye itatu diladila kutya vakwetu ava ova longa shili, na otuna oku va pandula nokuva dimbuluka fiyo ofiyo, ashike, omwaalu wavo ouna oku wedwa kepupi lopaife.

Hano omolwashike ito ningi ependafule momukunda woye, modoolopa yoye ukale epandafule tali dimbulukiwa komapipi taeya shaashi wa kondjela ovanhu voye weva kufa moluhepo?

Omukunda keshe owa pumba okukala una ependafule lao. Hano omunhu oo ta dulu okutota po nande opoloyeka ile eepoloyeka odo tadi eta po oilonga noikulya, nota di kufa ovanhu oluhepo.

Oto dulu vali oku eta po oshikonga shoku lwifa omahepekafano omomaumbo, omo to unganeke ovanhu vomomudingonoko woye ndele tamu eta po oietwa po oyo mwa tala kutya ota i dulu okulwifa oimbuluma ei.

Kundana okwa didilika Christina Fonsech nOhamba yaUkwanyama Meekulu Martha Madinomho Nelumbu onga vamwe vomOvanamibia ovo tu na oku tala nawa, na oku didilikwa onga omapendafule.

Umwe ota ka hala okutya osho sha ningwa ile hashi ningwa kuFonsech eshi a wilika etote po lelyenge lovakainhu novalumenhu tava lwifa oimbuluma hano o Women and Men Network, oshili oshitukulwa shoilonga yaye. Ashike ovapopiliko vangapi vopolifi veya po noshinima osho noveshikwatela komesho moitukulwa yavo? Fonsech okwa tameka oku lwifa oimbuluma omanga a li ashike o Sagent mOshana ndele okwa twikila fiyo okoKhomas ndele tashi i noshilongo ashishe.

Meekulu Mwadinomho naye okushi okupandulwa, shaashi osha pumba omuleli a fikame ndele ta pula aveshe ovo vena ounona inave va hala veva twale kuye.

Eheno shili ohamba, ashike ovaleli vangapi va pula opo ova etelwe ounona?

Hano naave oto dulu okukala ependafule lopefimbo letu.

Otuna na yoo okukoneka kutya nanande okupakwa koHeroes Acre okuwa ashike, ovo va pakwa ko ovo ashike oupendafule.

Omapendafule omo eli ile omo ali momikunda detu, amwe okwa lwa oita yekondjelomanguluko, amwe okwa lwa oita yaMandume ile yaWitbooi, amwe katu ashi nokuli, ashike omo ngaa a pakwa mokati ketu omo. Hano natu longeni tu ningeni omapendafule efimbo letu, mokutunga nokuyambula po oshilongo shetu, ngee omomaxupilo ile omonghalafano.

LEAVE A REPLY

Please enter your comment!
Please enter your name here