TUYENI KOLUPALE LA TUYENI: VaNamibia vakwetu hano moitukutuku yeni muna oilulu?

0
289

Vakwetu oshili ame ngeno okwa li ngo pena nande okandoongi haka dulu okulondwa okudja koushimba ndele fiyo okOwambo, ayee ame ngeno oshili opo tamu hangenge pokati kaTjiwarongo naKahandja opo nda nyomanana ku ndoongi wange ndiwete kutya shapo kundoongi xwepo vali shidulife omatuwa.

Ndele oshili nofuto yange yokufuta oubesha nomatuwa okutwala ovanhu kOwambo ondiwete kutya shapo nande ondeende andi landelepo ndoongi wange omeya meefalama omo, oshima ashike andi kafika keumbo nombili inandi mona oshiponga nonande ndoongi naye hanuka ngo ondiwete kutya ita elekwa nokukondama kwoitukutuku.

Vakwetu domashendjo nandi djepo utale, osheshi oituwa ota i endelele yafa taivele komitwe, nomatukutuku oo oshili otaalotoka unene ngomunhu oto hale okutya pamwe oyo oilulu nokuli ei haipopiwa. Shiwana onda hala oshili okumu dimbulukifa kutya oituwa nande ta i lotoka ngaha, napamwe osho hamu mono sha wapala oshili she keemwenyo detu otwa loloka ne nai paife molwaashi oufiku nomutenya ohatu kanifa ovanhu na vamwe vaningwa oingudu nokuli osho kwali inava teelela.

Oshili ota sheetifa unene onghenda, eshi moshilongo shetu kwali tuna mo oita ndele otwalwa nokumangulula oshilongo shetu opo tu kale tuna ombili yamanguluka, ashike shima tu ndele otoli pula ove toshi kondolola nawa okudja tuu pemanguluko opo oiponga yomeendjila moshilongo shetu oshili oya kala unene yaduva nokuya pombada noku shi yeleka manga okwali oshilongo inaa shi manguluka.
She moituwa omo paife oshili ohatutilamo ne, nomoilulu oyo mukwete vati oyeendifo paife otwa nyanyalamo ne osheshi vamwe twa shaala pomutenya na vamwe vatulwa moluhepo omaumbo amwe oshili okwa dimapo molwa oiponga yomeendjila.

Vakwetu Tatekulu Sebastian ya Ndeitunga, okomanda yomatanga opolifi moshilongo omu, tatekulu oove omuwiliki weemwiya daShinana, odo hadidulu okumanga omunhu nde naye teleetele onghenda shilikololela koikoya a kaula onyanga ei a ninga. Tatekulu ame omuNamibia omutekulu woye andi ku indile na ohandiku alikana nefimaneko noponhele yovaNamibia aveshe ava vehole eemwenyo,tatekulu ondahala ukomande ovapolifi vokukwatelapo oveta nelandulafano lomeendjila opo vakale tava mange nokuditikilila ovakauli nyanga vomeepate.Ame nokuli ohandi kala andi lipula ngaha, ngeno okushangwa outiketa oku kwakalapo nde takudipo ndele ovakaulinyanga aveshe moikoya inasha nekwatafano noveta yomeendjila, ndele omatukutuku avo tava kala haa va kufwa filufilu ndele taa ningipo nande oepangelo nande okwa kakala taatwala ovakulupe keependjela komikunda kwinya ava ihava dulu okweenda, vakwetu oshili otwa loloka otamu tu manepo noyeendifo.

Ame nokuli efimbo limwe oshili ohandi kala andi lipula kutya napamwe hano efimbo oituwa ha i kala ta i kondama hano pamwe ohamukala mwelivakamo nye tamu fiyemo ashike ovatwalelwa, ashike ne eshi tashiku limbilike neendalaiva dimwe opo handimonene oiponga opo. Mefimbo lonale ngeenge owa  hange omunhu tai molweendo oto hange omunhu a hafa ewete kutya otakatalelapo ovashivikile vaye na okuudite kutya otaka fika nombili ina mona nande osho oshiponga shasha. Oshili moku shiyeleka ne nefimbo lopaife oto hange omunhu tai molweendo ndele ngeenge we mu tale koshipala shaye oshanyika oluhodi ngomunhu ototi pamwe nokuli okwa lombwelwa nande eenghali nale nokuli. Ashike kapena shimwe oko kutya ashike omunhu ou, okwa tila molweendo nokulonda moituwa molwaashi keshi naana ngeenge otaka fika nombili inaa shakeneka oshiponga mondjila omo.

Ashike ne eshi tashi mbadaleke osheshi kutya, imwe yomoiponga yomeendjila yalopotwa moshilongo shetu, otai ulike kutya okushinga nouhasha nokuhafimaneka eeveta domeendjila vamwe tava shingi nokuli veli koshi yodungo, ei oyo imwe yomwaayo ha yeetifa oiponga meendjila da Namibia. Ame mwene mokuyeleka oiponga yomeendjila efimbo eli ndapashuka ndiwete omatuwa, noku faafanifa nefimbo omu tuli ngaha, oshili otashi tilifa onghenda omatuwa koninama yokukondama ndele oto hange omatuwa ayaka omudilo ndele amwe taapipo nokuli filufilu navamwe omo havapile omo na ihatu mono po sha, eshi osho shimwe tashi kuulikile kutya oiyendifo ei ohaikala tai shingililwa.

Vashingi voitukutuku ne nye vakwetu, napamwe hano omwapumbwa okweefapo okushinga nye muye nande okeehambo noke falaama kwinya mukalife eengobe nye muka shinge outemba vokunanwa keendongi nokeenghambe, shaashi navo ovena omalola vafa eetuwa napamwe omahooli okwanyika oshiponga kunye vaholike.
Omukulu wonale okwati ou weeheshi okukwena, shapo eenghali danyoko inouda, vakwetu otwa loloka oiponga yoomendjila oyetu fiya pomutenya unene oshili vaholike tamekeni ne okulundulula, nonande haku lundulula oku kwokuvaka oinima yovanhu ndele mu shendje hano omikalo dokushinga meendjila.
Meme, hanga nda dimbwa odikwa koshilwa ne,vatekulu vange hano eshi hamulande eembapila dokushinga nye mweheshi okushinga, hano ohamu ka shinga meepate dilipeni vaholike?

JOHN YA TUYENI
CELL 0812988549
MR TUYENI76@GMAILA

 

LEAVE A REPLY

Please enter your comment!
Please enter your name here