Endjala ota humitha Okaku komeho

0
263

 

OKAKU – Kansela gwoshikandjohogololo Okaku Joseph Kapya Endjala okwa ti okwi ilongekidha okugandja omayakulo koshigwana ethimbo kehe. Ndhino okwali edhi popi kuyele oshiwike sha ziko poshigongi naawiliki yoosenda adhihe moshikandjohogololo shoka.

Kansela Endjala ta ti oya hala ya hedhithe ehumokomehomo noku eta uuwanawa koshigwana opo woo kehe gumwe alye oshikuki shemanguluko lyoshilongo. “Otuna omadhiladhilo omanene mokuyambulapo oshikandjohogololo shetu,nonande twa taalelwa komashongo goshikukuta ota tu kambadhala tu kongele aakwashigwana yetu mboka ihaaya tema omakwatho yo ya mone omayambidhidho kuza kaanamutimahenda,” Endjala ta ti.

Gamwe gomomahumokomeho ngoka aaKaku yi ipyakidhila nago ongaashi oshipangelo shokEloolo shoka sha tameka nale okutungwa noshili pokupwa ngaashingeyi. Kansela okwa gwedhapo woo kutya oya thaneka pu kale pwa tungwa osasiona yopolisi meendelelo ndjono tayi tungwa pooha nombelewa yakansela. “ Aantu yetu ohaya ende unene oondjila oonde taya ka dhengitha iihako oshowo okukonga omayakulo gopolisi onkee otwa tokola opo tuya tungile osasiona yili popepi yo ya kale taya mono omayakulo ethimbo kehe,” Kansela ta gwedhapo ngaaka.

Okwa thanekwa opo mOkaku mu kale mwa tungwa endiki lyaanyasha mono taya kala taya pewa omadheulo  gopaungomba, oshowo taya kala taya ningilemo iigongi yo ya kale taya tungathana kiinima ya pamba aagundjuka. Kansela tati endiki lyaagundjuka otali ka kwathela unene aagundjuka mboka yaana iilonga , yo ya yambulepo oonkalamwenyo dhawo.

“Konyala oosikola adhihe dhili moshikandjohogololo shetu odhina olusheno oshowo omeya,otuna omathaneko opo tu andjaneke omeya momukunda kehe oshoka natango otuna dhimwe dhomomikunda dhaana omeya,otwa tungila aakulupe uundjugo notuna ehalo opo uundunda awuhe womomudhingoloko wu kale wa tulwa olusheno,otatu longo ngaashi tatu vulu oshoka otse omeho nomakutsi gepangelo,” Kansela ta tsikileko.

Kansela ta indile aakwashigwana ya yande elongithonayi lyomalovu niingangamithi mbyoka ta ti otayi eta omahepekathano nomadhipagathano momagumbo. Okwa pandula epangelo oku pitila moopolohalama ndhoka tadhi kwathele aanangeshefa aashona noyopokati nokuya yambidhidha sho tali yape omakwatho oshowo omashina ya vule ya yambulepo oongeshefa dhawo. Endjala ta uvaneke aaKaku kutya oya tegelela uuwanawa owundji onkee naya longele owala kumwe nepangelo.

 

LEAVE A REPLY

Please enter your comment!
Please enter your name here