Gymnasium oyo enyakwa natango 

0
192

 

Windhoek – Ospana yokohi yomimvo 19 ha yi  dhana uudhano wo Cricket yosikola ya Windhoek Gymnasium, oya gamene ekopi lyayo muudhano wa Momentum mo Windhoek ehuliloshiwike lyayi.

Aamati mbaka oya dhenge ospana yaamati ooyakwawo yokosikola ya Windhoek Afrikaanse Privaatskool (WAP) medhingoloko lyahugunina Osoondaha ya piti. Mbaka oyo wo ya sindanapo uudhano wo Pro-Ed methigathano lyo T20.

Ethigathano ndika itaali pewathanwa lyuudhano wocricket olya tamekele Etitatu lyoshiwike sha yi, noospana dha kala tadhi dhana omaudhano gatatu esiku kehe. Uudhano mbuka wa kwashilipalekwa ku Momentum owa talikako ongo mboka tau humitha nawa komeho uudhano woludhi nduka moshilongo nonando mbuka opo ashike wa tamekelwe nawo  oomvula ndatu dha piti.

Ethigathano lyonuumvo  olya li lya shewa molwashoka aadhani aagundjuka mboka ta ya ka kalelapo Namibia methigathano lyaadhani yokohi yomimvo 19 omumvo tuuka koBangladesh oya li yu ulike ontseyo yawo muudhano mbuka.

Oosikola ndhoka dha li dha kutha ombinga methigathano ndika odho Windhoek High School naandjoka yaWalvis Bay Private, oshowo ndjoka ya ithanwa owina yedhina  Platteland Invitational side.

Windhoek Gymnasium  okwa ulike lela petameko lyuudhano kutya ye okwa hala okugamena ekopi ndika onkene okwa tameke ta sindana momaudhano ge agehe. Oku sindana kwawo okwe ya omolwa ospana sho ya longo nuudhiginini osho wo okudhana nawa kwaadhani yaali mospana ndjika yoo Niko Davin na Charl Brits shuulikwa komiyalu dhiitsa mbyoka yo ya gwedheleko ospana yawo pethimbo lyuudhano.

Davin oye omudhengi guutanga dhingi sho a dhenge nokumatuka iikando omathele 265 muudhano auhe. Pamwaalu gwopokati ye okwa tondoka konyala omalweetho geli 51molweetho lwe lwoku dhenga okatanga, omanga oshilyo shospana ye Brits, okwa li omukwati dhingi guutanga.Nguka okwa kwata uutanga wu li 10 momadhingoloko omilongo 29 nokwa etha oonakudhenga ya tondoke ashike lwiikando 74.

Omudhani  Tiaan Steenkamp gokoWindhoek High School okwa ulikwa oye omudhani dhingi methigathano ndika, molwa okudhenga nawa okatanga sho a dhenge noku matuka iikando 315, oshowo a kwata mo uutanga waadhengi 9.

Cricket Namibia (CN) okwa pandula Momentum sho natango ta tsikile  noku yambidhidha uudhano mbuka waanasikola. Ngashingeyi omeho otaga taalele kuudhano woliha ya Momentum Schools League, ndjoka tayi ningwa oshiwike tuuka.

 

LEAVE A REPLY

Please enter your comment!
Please enter your name here