MOkashana mwa patululwa endiki lyiindulukomwa

0
259

 

OKASHANA – Ongula yOmaandaha oshiwike shika Omupevi minista mUuministeli wOmayambulepo gomoondoolopa oshowo momikunda Sylvia Makgone okwa patululile pambelewa endiki ndyoka tali kala hali nduluka iipumbiwa yopaunafaalama.

Shino oshali sha ningilwa pOkashana moshikandjohogololo Omuthiya.  Endiki lyomapendulepo gokomikumda lyaKashana moka omo tamu kala tamu longwa iinima mbyoka olya totwapo mo 1986 mewiliko lya Rossing Foundation. Ehala ndino olya hokololwa lya kala unene lya tala ombinga okugandja omahala gokulala oshowo okuthuwapo kaatalelipo, nokuya longekidhila iipalutha.

Omupevi minista Makgone pethimbo ta popitha aakwashigwana pepatululo okwa yelitha kutya pamayalulo oopelesenda dhaaNamibia dhili 28.7 aakwanaluhepo 15.3 oyeli monkalo yoluhepo ondhigu omanga oopelesenda 37.4 dhaantu yeli momikunda odhili monkalo yoluhepo oku yelekanitha naantu mba yeli mondoolopa omanga mboka yeli moondoolopa oyeli 14.6.

Makgone ta ti oshinakugwanithwa shUuministeli wawo ya kwashilipaleke kutya iitopolwa yokomikunda oshowo yomoondolopa oya mona omahumokomeho ngoka ga pumbiwa moshilongo , oshowo okukondjitha onkalo yoluhepo nuuthigona.

“ Endiki ndino lyiindulukomwa etitatu moshilongo lya landula ndyoka lya Ben Hur moshitopolwa Omaheke oshowo ndyoka tali adhika mOngwediva moshitopolwa Oshana, otatu indile aakwashigwana ya longithe omahala goludhi nduka ya ete omadhiladhilo gawo mwaashoka ya pumbwa lyo endiki taliya ndulukile ashihe shoka ya pumbwa, endiki olya thikamithapo koomilliona 6,nomashina nga taga adhikamo oga pula epangelo oodola emilliona limwe oshinkwanu hamano,” Makgone ta ti ngaaka.

Okwa gwedhapo kutya endiki ndino otali indilwa li longe nuudhiginini li longe muuwanawa woshigwana noshowo okugwanithapo oompumbwe dhaanafaalama moshitopolwa. Okwa tegelelwa endiki ndika li kale tali longo omatemba gokunwina iimuna,uundjugo ,omashina gokutsa niitopolwa  yoohauto. Otali ka gandja woo ontseyo nuunongo kaagundjuka mboka yaana iilonga sho tali ka gandja oompito dhiilonga oshoka mOshikoto kamuna oosikola dhopaungomba mono aagundjuka taya vulu ando ya kale taya imonene uunongo wopaungomba.

Makgone ta gwedhapo kutya Uuministeli owuna elalakano nehalo ya kale ya tunga omandiki nga ngaka kiitopolwa iheyali moshilongo, naangano otaga kala ga tungwa mbala mOmusati, Ohangwena, Karas,Hardap,Zambezi,Kavango, oshowo koKunene

Naftal Nakashwa omukuluntu gwendiki ndika okwa holola kutya oyali ya kwatwa kedhiladhilo ya tungepo endiki moka tamu kala tamu ndulukwa iipumbiwa mbyoka aanafaalama yopomudhingoloko ya pumbwa.

Nakashwa ta pandula ayehe mboka ye ya yambidhidha, oshowo Uuminsteli mboka tawu kambadhala nokukwashilipaleka kutya iitopolwa yokomikunda oya yambulwapo nehumokomeho otali ende nawa. Ta gwedhapo kutya iilonga yawo oya ya kolutenda onkee aakwashigwana naanafaalama naya gandje shoka ya pumbwa sho shi ndulukwe meendelelo.

LEAVE A REPLY

Please enter your comment!
Please enter your name here